“Si Jehova ang Magapauswag”

ANG Hudiyohanong mga sinulat nagsugilon kanato nga nanag-awit o nanaglitok ang tapos-nadiyesterong mga Hudiyo sa Salmo 113 ngadto sa 118 sa okasyon sa ilang mga kapiyestahan. Kining mga salmoha, nga nailhang Hallel, adunay saad: “Si Jehova ang magapauswag kanimo . . . Kamo mao ang ginapanalanginan ni Jehova.”​—Salmo 115:​14, 15.

Sulod sa 1984 kining mga pulonga giawit pag-usab​—dili sa literal kondili sa simbolikong paagi​—sa kapiyestahan sa laing matang. Sila mao ang 1984 “Pag-uswag sa Gingharian” Distritong mga Kombensiyon nga gihimo sa mga Saksi ni Jehova diha sa daghang bahin sa kalibotan. May katarongan ba sila sa pagpili sa “Pag-uswag sa Gingharian” ingong tema sa ilang kombensiyon ug sa pagpadapat sa mga pulong sa salmista sa ilang kaugalingon?

Namatikdan sa mga Taga-gawas ang Pag-uswag

Mahitungod sa mga Saksi sa Belgium ang pamantalaang Le Jour misulat: “Ang 1984 nga temang ‘Pag-uswag sa Gingharian’ tukma kaayong nagbatbat niining grupoha . . . Gikan sa 600 lamang sa 1945, sila adunay gidaghanon karon nga kapin sa 22,000, diin ang maong numero wala maglakip sa mga kinabig ug mga tumutuo.” Ug sa Pransiya ang pamantalaang Le Provenca̧l mitaho: “Usa ka gatos ug lima ka tuig human sa pagkatawo sa ilang kalihokan, ang mga Saksi nagatubo sa gidaghanon sa makusog nga paso.”

Apan, ang nakadani sa pagtagad sa kalibotan, dili lamang sa pagdaghan sa mga Saksi kondili sa ilang dili-hitupngang estilo sa kinabuhi. Nakadayeg ang mga taga-gawas sa mga tawo nga dayag nga gipanalanginan sa mga hiyas nga halos dili na makita ning walay gugma, mahugaw, ug walay panaghiusang kalibotan. Ang direktor sa estadyom sa Florence, Italya, pananglitan, mikomento: “Nasayod ako, nga hakog ang akong panglantaw, apan nangandoy ako nga himoon sa mga Saksi ni Jehova ang ilang asembliya dinhi sa estadyom kada duha ka bulan. Niana nga paagi kanunay mahinlo kini. Katingalahan kamo.”

“Katingalahan nga mga tawo kamo,” miuyon ang usa ka trabahante sa displihanan sa mga awto duol sa Southampton, England, nga tugkaran sa kombensiyon. Ang trabahante miingon: “Samtang ang kalibotan naggubatay ug nag-awayay sila malinawon kaayo ug silang tanan nanagpahiyom. Makauulaw nga ang tibuok kalibotan dili sama kanila.”

Gibatbat sila sa usa ka magsusulat nga taga Finland si Heli Savin ingong “panon sa katawhan sa pito ka libong batan-ong mga babaye ug mga lalaki, mga amahan ug mga inahan, mga lola ug mga lolo, [kinsa] . . . napormang usa ka dakong pamilya diin taliwala kanila naglungtad ang maayong pamatasan ug pagkamatinahuron ngadto sa uban.” Ang magsusulat mipadayon: “Ang labing maayong talan-awon, sa akong opinyon, mao ang mga batang lalaki sa panuigon sa atong ‘magubtanong mga tin-edyer.’ . . . Kagakoson ako kanila ug sa pagsinggit: ‘Aduna pay nabiling paglaom sa katawhan!’”

Pagkab-ot sa mga Kinahanglanon sa Pag-uswag

Sa karaang panahon, ang hinatag sa kinatas-an nga pag-uswag nagadepende sa pagsalikway sa katawhan sa Diyos sa pagsimbag diyosdiyos, sa pagbutang sa bug-os nga “pagsalig kang Jehova,” ug sa “pagkahadlok” kaniya. (Salmo 115:​4-13) Ang mga Saksi ni Jehova karon naningkamot nga makab-ot kining maong kinahanglanon. Nga tinuod silang nahadlok kang Jehova gipunting sa usa ka mamumulong sa kombensiyon kinsa mibatbat: “Ang mga Saksi ni Jehova sa tanang bahin sa yuta maoy matinuorong mga estudyante sa Bibliya. Sa pagkatinuod sila ‘magpangurog’ sa Pulong sa Diyos samtang sa kanunay sila nagakuhag tukmang kahibalo sa mahigugmaong mga katuyoan sa ilang Dakong Magtutudlo.”​—Tan-awa ang Isaias 66:2.

Kining tinguha sa pagpahimuot kang Jehova makita sa pagpili sa materyal nga gihisgotan sa programa sa kombensiyon. Ang balaang sukdanan sa pamatasan gipasiugda. Usa ka makapatandog nga drama sa Bibliya nagpakita kon sa unsang paagi nawad-an ang karaang Israel sa panalangin sa Diyos sa dihang gisalikway ni Achan ang diyosnong debosyon ug misugod ug lakang sa pagkadili-maunongon. Tinguha sa mga Saksi ni Jehova nga mapugngan ang hitabo nga sama niini diha sa Kristohanong kongregasyon karon.

Ang mga kombensiyon naghatag sa mga Saksi ni Jehova ug igong higayon sa pagpakitag pagsalig sa ilang Diyos. Pananglitan, usa ka saksi sa Switzerland gisultihan sa Mayo nga paundangon na siya sa trabaho sa kataposan sa Hunyo tungod sa mga rason may kalabotan sa relihiyon. Bisan pa niining pinansiyal nga kakulian, midumili siya sa pagkompromiso sa iyang baroganan ug mipadayon sa paghimog mga plano sa kombensiyon alang sa iyang pamilya sa siyam. Dayon, sa panahon sa iyang kataposang semana sa pagtrabaho, gisultihan siya nga dili siya papahawaon sa iyang trabaho, ug ngani hatagan siya ug mas maayong trabaho, ug ang mga adlaw nga iyang gihangyo aron makatambong sa kombensiyon kuhaon gikan sa iyang panahon sa bakasyon. “Ang problema lang,” siya mitaho, “mao ang pagpabangon ug sayo sa mga bata aron makaabot sa dapit sa kombensiyon sa tukmang panahon.”

Kini ug ang susamang mga eksperyensiya nagpakita kon sa unsang paagi gipabilhan ug dako sa mga Saksi ni Jehova ang espirituwal nga instruksyon nga ginatagana sa ilang mga kombensiyon. Ngani, usa ka kartero sa Finland kansang aplikasyon sa pagbakasyon wala aprobahi misuhol sa usa sa iyang kauban sa trabaho ug $35 ang adlaw sa pagbuhat sa iyang trabaho. Unya miingon siya: “Takos nianang maong bili ang asembliya. Hunahunaa lang ang akong masipyatan kon nagpabilin pa ako sa balay!”

Diha sa 127 ka kombensiyon sa 15 ka nasod sa Uropa, dihay 11,918 ang bag-ong gibawtismohang mga Saksi, diin daghan kanila bag-o pa lang misalikway sa ilang pagsimbag diyosdiyos.

Lakip niadtong mihimog deklarasyon sa katilingban, midawat nga ila na karong giisip si Jehova ingong “ilang katabang ug ilang taming,” mao sila si N. K. ug ang iyang 19-anyos nga igsoong babaye si E. G. nga gikan sa Sweden. (Salmo 115:​11) Mga Hitano sila. Ang pag-usab sa ilang naandang kinabuhi nagkahulogan ug pagbungkag sa lig-on kaayong sosyal nga bugkos ug sa pagpalibre sa ilang kaugalingon gikan sa daghang dulot nga pagkagamot nga mga tradisyon, lakip sa pipila ka porma sa pagsimbag diyosdiyos. Tapos sa bawtismo si E. B., nga membro sa iladong koro sa katedral sa Graz, Austria, mikomento: “Diha na lamang nga misugod ako sa pagtuon sa Bibliya uban sa mga Saksi ni Jehova nga akong naamgohan nga ang mga kalihokan sa koro direktang nalangkit sa pagsimbag diyosdiyos.”

Sa pagkamatuod, ang tanang mga butang nga magatabon sa Maglalalang ug sa iyang pagsimba gawas sa atong kinabuhi ug hunahuna maoy usa ka porma sa idolatriya. Ingon niini ang pagpanugal alang sa usa ka mainitong magdudulag poker. Apan pagkawalay kasegurohan sa iyang kinabuhi! Uban sa usa ka libo ka dolyar sa usa ka adlaw, sa sunod adlaw wala siyay kuwarta. Sa nakadangat sa pagpabili sa tinuod nga bahandi​—espirituwal nga mga bahandi​—iyang gitalikdan ang iyang idolatrosong kinabuhi sa pagpanugal ug gibawtismohan sa Mo-i-Rana, Norway.

Ang uban nangahimong biktima sa idolatriya sa pagsalig sa tawhanong mga teoriya, mga pilosopiya, ug mga kagamhanan imbes sa Diyos, kansang paglungtad ilang ilimod o isalikway. Si Vito, 37-anyos nga enhinyero sa tren gibawtismohan sa Avelino, Italya, nag-ilustrar niining puntoha. Usa ka ateyesta, komunista, ug hugot nga magtutuo sa ebolusyon, iyang gilantaw ang relihiyon nga mao “ang opyo sa katawhan.” Apan ang iyang ateyestikong pagtuo natay-og sa nakombinsir siya sa mga Saksi sa nagkasumpaking teoriya sa ebolusyon. Miresulta kini ug pagtuon sa Bibliya. Wala na siya magpangutana pa sama sa ginahimo sa kanasoran: “Hain, karon, ang ilang Diyos?” apan ingong Saksi ni Jehova, siya mipahayag: “Ang among Diyos anaa sa langit.”​—Salmo 115:​2, 3.

Pag-uswag Taliwala sa Gamay ug Dako

Si Jehova mao ang “buhi nga Diyos, nga mao ang Manluluwas sa tanang matang sa mga tawo.” (1 Timoteo 4:​10) O sama sa pagkapahayag niana sa Salmo 115:​13: “Iyang panalanginan kadtong mahadlok [kaniya], gamay ug dagko.” Busa daghan taliwala sa bag-ong nabawtismohang mga Saksi ni Jehova mga ordinaryong mga lungsoranon, giisip nga gamay, apan adunay uban usab kinsa, sumala sa kalibotanong panglantaw, maisip nga mga dagko. Ang “tanang matang sa mga tawo” girepresentar. Tagda ang pipila ka pananglitan.

Sa miaging tuig usa ka pangunang magdudula ug tinahod kaayong coach sa mga dula gibawtismohan sa Helsinki, Finland.a Iyang gisugdan sa pagsangyaw ang 14-anyos nga babaye nga iyang gibansay. Diha sa iyang tulo ka oras nga panahon sa pagbansay sa pagkamagdudula, iyang gilakip ang usa ka oras nga pagtuon sa Bibliya! Karon, sa 1984, bisan pa sa pagsupak sa pamilya ning babayehana, gibawtismohan siya diha sa usa sa mga kombensiyon sa Finland.

Ang superintendente sa Sunday school sa Baptist Church sa Tinipong Bansa, sa nakakat-on sa kamatuoran, misugod sa pagbukas sa iyang klase sa pag-ampo kang Jehova. Siya miingon: “Maayo ang pagsanong sa mga estudyante niana, apan sa akong katingala ang uban sa mga magtutudlo, maingon man usab sa kaubang mga membro sa iglesya, nabalaka. Kadaghanan kanila mogawas sa akong mga klase, nga moingon nga lahi kaayo ang akong gitudlo gikan sa gitudlo sa ‘Reverendo.’ Tinuod, lahi gayod kadto tungod kay ang materyal nga akong gigamit gikan man sa Akong Basahon sa mga Estorya sa Bibliya. Mikuha akog 30 ka kopya sa Estorya sa Bibliya, gipalit kini dili gikan sa amot sa ikapulo alang sa klase. Akong gihatagan ug kopya ang ‘Reverendo,’ nangayo sa iyang pag-uyon. Sa ulahi iyang giduol ako, nga nag-ingon: ‘Maayo kaayong pagkasulat ang libro, nakaangay gayod ako niana, matahom kaayo kini. . . .’ Nausab ang iyang tinamdan sa iyang nabasa ang magpapatik sa libro​—ang Sosyedad sa Watchtower.” Kining gipakitang pagkasalingkapaw nakatabang sa babaye sa pagbulag sa pagkaulipon sa Babilonyang Bantogan ug siya gibawtismohan sa Cicero, Illinois, nga kombensiyon.

Sa Sweden gikuha sa 20-anyos nga babaye ang usa sa mga libro sa Sosyedad gikan sa estante sa libro sa iyang inahan ug gisugdan kini sa pagbasa. Nawili sa iyang nakat-onan, misugod siya pagtubag sa mga pangutana sa ubos sa matag pahina ug gisulat ang mga tubag diha sa kuwaderno. Iyang gibasa ang libro ka lima ug napuno ang duha ka kuwaderno sa iyang mga tubag. Human nga mibulag sa relihiyon sa estado sa Sweden, iyang gitawag ang lokal nga Kingdom Hall ug nakakontak sa mga Saksi.

Magtutudlo sa Portugal ang usa sa nabawtismohan kinsa, sa iyang kaugalingong pulong, miingon nga siya kanhi “bug-os nga nagpahinungod sa pagpukan sa kagamhanan.” Laing matang sa maggugubat, nga kanhi direktor sa tunghaan sa karate ug nakadawat ug ganti, gibawtismohan sa Austria. Sa Espanya usa ka batan-ong babaye, nga nakaagi sa pagpamaligyang droga, pagpangawat, ug imoralidad, sa panuigong 22 abandonadong siyang asawa ug umaanak. Hapit na siyang mohunong sa pakigbisog, kay naghunahuna siya sa paghikog sa wala pa mahibalag sa mga Saksi ni Jehova.

Ang uban midawat sa kamatuoran sulod lamang sa pipila ka bulan. Ang uban nagkinahanglan pag dugang panahon. Ang usa ka inahan gibawtismohan sa Alemanya nga dunay silingan nga mga Saksi ni Jehova sulod sa 11 ka tuig. Apan wala siya magsugod sa pagpakitag interes sa ilang mensahe hangtod nga misugod ang mga anak sa Saksi sa pagsangyaw ngadto sa iyang mga anak nga 8 ug 11 anyos. Ug sa pagkahimong usa sa mga Saksi ni Jehova, ang 91-anyos nga Aleman misunod sa panig-ingnan sa iyang amahan, kinsa gibawtismohan sa sayosayo pa​—nga eksaktong 88 ka tuig​—sa 1896!

Ang uban nakaeksperyensiya ug katingalahang paagi nga nagpadayon ang “Pag-uswag sa Gingharian” ilalom sa paggiya sa manulonda. (Tan-awa ang Pinadayag 14:​6, 7.) Nagtuo ang 22-anyos nga lalaki sa Netherlands sa reinkarnasyon ug nagpraktis sa espiritismo. Gisimba niya ang adlaw ug ngani naglaom nga moabot ra ang adlaw nga mahimo siyang bahin niini. Aron makab-ot kining tumonga, determinado siya nga mamatay, sama sa iyang pagkapahayag niana, ‘sa bisan unsang paagi sa Marso 1983.’ Nahibalag siya sa mga Saksi sa Pebrero!

Tungod ning dakong pag-uswag taliwala sa “tanang matang sa mga tawo,” sa gamay ug sa dako, unsay atong malaoman sa umaabot?

Aduna pay Daghang Moabot!

Makatino kita nga adunay daghan pang moabot. Una sa tanan, nagsaad si Jehova ug dugang pag-uswag. (Tan-awa ang Isaias 60:​22.) Ikaduha, sama sa gipadayag sa mga numero nga gipakita sa nagauban nga kahon, aduna pay dakong posibilidad nga mouswag. Matikdi ang porsentahi sa mga tawo nga mitambong sa mga kombensiyon nga labaw sa labing taas nga gidaghanon sa aktibong mga Saksi ni Jehova kay sa 1984. Matikdi, usab, ang gidaghanon sa bag-ong nabawtismohang mga Saksi sa miaging tuig sa pag-alagad, diin ang tanan karon miduyog sa pagsangyaw sa maayong balita sa natukod nga Gingharian sa Diyos ngadto sa uban. Sa walay duhaduha, nakatukod ang mga kombensiyon ug tukmang basehanan alang sa dugang nga pag-uswag. Human sa kombensiyon sa Hannover, Alemanya, si K. V. mipahayag ning paagiha: “Sa mahigugmaon ug sa prangkang paagi ang programa sa kombensiyon nagkuha sa pagtagad sa pangunang mga kondisyon sa pag-amot sa pag-uswag sa Gingharian​—mga butang may kalabotan sa atong personal nga kinabuhi, sa mga relasyon sulod sa kongregasyon, sa mga tinamdan alang sa organisasyon, ug sa kinabuhi sa pamilya.”

Dili iya sa mga Saksi ni Jehova ang pasidungog niini nga pag-uswag. “Dili kanamo, O Jehova, dili kanamo.” sila modawat dayon. Hinunoa kini maoy “tungod sa mahigugmaong kalulot [sa Diyos], ug tungod sa [iyang] pagkamatinud-anon,” ug sa iyang panalangin nga kining pag-uswag nahitabo ug magpadayon sa pagpanalangin sa umaabot.​—Salmo 115:​1; tan-awa usab ang Zacarias 4:6.

Malipayon sa pag-alagad sa ilang Diyos, gidapit sa mga Saksi ni Jehova ang “tanang matang sa mga tawo” sa tanang dapit nga sa personal mahimong bahin sa kauswagan sa Gingharian pinaagi sa pakigduyog kanila sa pagpamulong sa mga pulong ni Hallel: “Apan kami magapadayon sa pagdayeg kang Jah sukad karon ug hangtod sa walay kataposan.”​—Salmo 115:18.

[Mga footnote]

[Kahon sa panid 20]

MGA GIPAMULONG SA MGA KOMBENSIYONISTA:

“Nagtuo akong kulang ang 1,000 ka pulong sa pagbatbat sa akong gibati sa apresasyon kang Jehova alang ning espirituwal nga piyesta.”—R. S., Luxembourg

“Nakita nako ang ebidensiya sa panalangin ni Jehova sa pagluwat sa pulyetong The Divine Name That Will Endure Forever. Dugay ko nang gihandom nga makabaton ako ug sama niini. Daghan kaayong salamat!”​—A. L., Federal Republic of Germany

“Alang kanako usa ka personal nga panalangin gikan kang Jehova ang pagluwat sa reperensiyang Bibliya . . . Pagkatagsaon! Nakabasa ako sa Bibliya ka tulo. Ang bag-ong Bibliya maoy usa ka padasig aron basahon kini pag-usab.”—A. P. ug J. J., Tinipong Bansa

[Graph sa panid 22]

(Alang sa bug-os nga pagkahan-ay sa teksto, tan-awa ang publikasyon)

1984 “PAG-USWAG SA GINGHARIAN” DISTRITONG MGA KOMBENSIYON SA TINIPONG BANSA UG SA UBANG KANASORAN SA UROPA

Kinatas-ang numero sa Porsentahi sa Bag-ong nabawtismohang

mga Saksi sa 1984 tumatambong sa mga Saksi sa tuig

kombensiyon kay sa pag-alagad sa 1984

sa kinatas-an sa 1984

Austria 15,618 37% 790

Belgium 20,499 39% 1,009

Britain 97,495 40% 5,166

Denmark 14,337 62% 391

Finland 15,263 54% 629

France 82,458 34% 4,708

F.R. of Germany 109,102 29% 4,288

Italy 116,555 45% 9,060

Luxembourg 1,129 18% 54

Netherlands 27,812 51% 841

Norway 7,670 48% 328

Portugal 27,220 71% 1,859

Spain 56,717 49% 3,671

Sweden 19,526 29% 845

Switzerland 12,378 41% 713

United States 690,830 53% 35,618

Total of 69,970

[Mga Letrato sa panid 19]

Ibabaw: Ang mga kombensiyonista paingon sa ilang pagsangyaw sa Hannover, Alemanya

Ubos-wala: Bag-ong reperensiyang Bibliya sa Edinburgh, Scotland

Ubos-tuo: Walay rasanhong pagpihig—Hapones nga mga Saksi ni Jehova nga mitambong sa Dortmund, Alemanya