Usa Ka Pagsalig Nga Dili Gayod Mabudhian
“SALIG lamang sa imong kaugalingon, ug dili ka mabudhian sa uban.” Bisag kining makantalitahong pahayag gihimo sa 250 ka tuig kanhi, daghan karon ang nagapahayag ug samang mga sentimento. Ang espiritu sa pagkawalay pagsalig kaylap sa katilingban.
Si Leo, nga nagplano nga magminyo pag-usab, miinsister sa pagpapirma sa iyang pangasaw-onon sa dili pa ang kasal ug usa ka kasabotan nga naggambalay sa igahatag nga sustento kon ugaling mahitabo man nga may diborsiyo sa umaabot. Ang kaminyoon wala na itimbang sa pagsalig.
Si Larry, larawan sa daghang walay-trabahong mga batan-on, nagreklamo: “Dihang mahibalo ang katilingban nga madaog ka niya, iya kang ibutang sa gamayng lungag ug biyaan ka didto, mao kanay ilang buhaton.” Nawad-an siyag pagsalig sa katilingban sa katibuk-an.
Tapos sa dili pa dugayng iskandalo nga nalangkit ang iladong ebanghelisador sa telebisyon, si Juanita, nga niadto tig-amot, mimahay: “Usa kini ka panglimbong, kadtong tanan.” Bisan ang relihiyosong mga lider dili kanunay kasaligan.
Sa maalamon, ang Bibliya nagpasidaan batok sa inosenteng pagsalig sa mga tawo ug sa tawhanong mga institusyon. Ang salmista misulat: “Ayaw pag-ibutang ang imong pagsalig sa mga prinsipe, ni sa anak nga lalaki sa tawo.” Apan, ang mao gihapong salmo, nagtambag kanato sa pagsalig sa usa, usa nga dili gayod magaluib sa pagsalig, ang labing-makagagahom nga Diyos.—Salmo 146:3, 5.
Tinuod, ang mga lider sa nasod, bisan ang tanang mga nasod, kanunayng nagaangkong nagasalig sa Diyos. Sa pagkatinuod, daghang mga kuwartang papel sa Tinipong Bansa ug mga sinsilyo sulod sa usa ka gatos ka tuig dunay panultihon: “IN GOD WE TRUST” o Sa Diyos Kita May Pagsalig. Apan gipakita sa kasaysayan nga inay nagasalig sa Diyos, ang katawhan sa katibuk-an nagasalig sa ekonomiya, sa militar, ug sa politikal nga gahom.
May mga tawo bang tinuod nagasalig sa Diyos ang makit-an karong panahona? May kaayohan ba sila sa pagbuhat niini? Sa unsang paagi nakahatag kini kanilag kaayohan?
Sa ting-init sa 1987, diha sa ginatos ka mga siyudad sa tibuok amihanang hemisperyo, milyonmilyon ang nagtigom sa pagpamatuod sa ilang pagsalig sa Diyos. Ang tema sa ilang mga kombensiyon, nga giorganisar sa mga Saksi ni Jehova mao: “Pagsalig Kang Jehova.” Usa ka mantalaan sa Norwich, Inglaterra, miingon, nga ang tema sa kombensiyon karong tuiga nagpabanaag sa kaylap nga disposisyon sa pagkanawad-ag paglaom sa kalibotan. Apan inay magkaguol sa kapakyasan sa mga institusyon sa kalibotan, ang mga Saksi nagtigom sa pagpalandong sa mga paagi nga sila makapalig-on sa ilang pagsalig kang Jehova ug sa pagrepaso sa mga kaayohan nga ihatag nianang dalana.
Unsay nakapahiusa niining mga tawhana? Ang ilang pagsalig sa Diyos ug sa iyang Pulong, ang Bibliya. Gibatbat sa artikulo sa mantalaan sa Granada, Espanya, ang ilang motibo sa pagtambong sa kombensiyon: “Ang tibuok nga mga pamilya mibiyahe ngadto sa Granada, mga batan-on, mga ginikanan ug mga apohan, aron sa pagpamati sa pulong ni Jehova, tungod kay mao kana ang gisugo sa Bibliya. Kini ang nakapahiusa sa mga pamilya ug sa pagpalig-on sa bugkos sa panaghigala.”
Pagsalig sa Diyos Gipakita Niadtong Mitambong
Alang sa kadaghanan, ang pagkapresente sa kombensiyon maoy usa na ka ebidensiya sa ilang pagsalig kang Jehova. Tinuod kini sa kaso ni Simone Grijmonprez, nga mitambong sa kombensiyon sa Kortrijk, Belgium, kada adlaw bisan pa sa grabeng sakit nga siya kinahanglang hatagag oxygen sa unom ka oras kada adlaw.
Mitambong sa kombensiyon sa El Ferrol Espanya, mao si Roberto González nga paralisis sa mga kamot ug mga tiil ug bug-os panahon usab nga ministro. Bisan pag naglingkod lamang sa silya sa bakol ug magkasakit sulod sa duha o tulo ka bulan kada tuig, siya nagagugol sa aberids ug hapit 90 ka oras kada bulan sa pagsangyaw diha sa kadalanan ngadto sa mga higala ug sa mga silingan bahin sa bili sa pagsalig sa Diyos. Siya makasulti sumala sa kasinatian tungod kay ang pagsalig niya kang Jehova ang nakahimo kaniya sa pagbuntog sa iyang pagkagiyan sa droga, usa ka batasan nga nakahatag kaniyag rekord sa kapolisan sa pito ka pag-aresto ug dili-matambalang paralisis sa panuigong 18. Siya nakatabang nag pito sa iyang mga kauban kanhi sa pagsalig sa Diyos inay sa mga droga aron sa paghimo sa kinabuhi nga takos pagakinabuhian.
Mihimo ang uban ug mga pagsakripisyo sa panalapi aron makatambong. Tinuod kini diha sa daghang mga Saksi sa kapuloan sa Azores nga nagkinahanglang mobiyahe sa laing isla aron makatambong sa kombensiyon sa Angra do Heroi̇́smo. Usa ka pamilya sa lima migugol ug duha ka bulan sa pagpatambok ug duha ka baka aron ilang ikabaligya aron may ikaplete.
Pagsalig sa Diyos Nagkahulogan sa Pagsalig sa Iyang mga Sukdanan
“Salig kang Jehova ug pagbuhat ug maayo,” miingon si salmistang David. (Salmo 37:3) Busa, ang mga Saksi nagtuo, nga ang sinserong pagsalig sa Diyos kinahanglang ipakita sa maayong paggawi. Busa, ang pag-alagad sa usa ka kasaligang Diyos mao ang nagapalihok kanila nga mahimong kasaligang katawhan. Usa kini ka butang nga gipabilhan sa daghang mga tumatan-aw.
Diha sa Le Havre nga kombensiyon sa Pransiya, usa ka enhinyero sa telepono nagtaod ug kable sa telepono sa mga pasilidad sa istadyom ug mipahayag ug kabalaka sa pagbiya sa iyang kasangkapan nga walay magbantay. Gipasaligan siya sa opisyal sa lungsod: “Wala kay kabalak-an bahin niana uban sa mga Saksi. Ang labing mangil-ad nga mahitabo mao nga imong makita unya sa ulahi nga mas daghan ang imong gamit tapos niana kay sa una.”
Diha sa usa sa mga kombensiyon sa Sweden, gibilin sa tag-iya sa usa ka hotel ang tanang mga yawi sa iyang hotel diha sa mga Saksi nga maoy nag-organisar sa kombensiyon. Iyang gitugotan sila sa pagpalakaw sa hotel nga walay bisan usa sa iyang empliyado nga presente. “Wala pa namo kini mahimo sukad,” miingon ang tag-iya, “apan may pagsalig kami kaninyo.” Human sa kombensiyon, mipahayag siya sa iyang katagbawan sa paagi sa pag-atiman sa mga Saksi sa palibot.
Apresasyon Gipahayag sa Paggawi sa mga Saksi
Ang pagsalig sa Diyos nagapalihok usab sa mga tawo sa pagpadapat sa iyang mga sukdanan sa pagkahinlo ug pagkahapsay. Kini ang nakatukmod kanila sa pagtanyag sa ilang mga serbisyo ingong mga boluntaryo ug sa pagtabang sa pagtambayayong sa pagtrabaho. Kining bahina sa mga kombensiyon namatikdan.
Ang mayor sa Terni, Italya, nagpadala sa mosunod nga telegrama ngadto sa mga delegado sa kombensiyon nga nagtigom niadtong siyudara: “Buot kong ipahibalo ang mga pagbati sa pagtahod ug pagpabili sa tibuok nga siyudad alang sa hataas nga pagbating sibika nga gipakita sa paggamit ug sa pagpangandam sa mga pasilidad nga gipagamit kaninyo. Mainitong pangomosta niadtong nakigbahin sa kombensiyon.”
Usa ka kapatas sa Ice Hall sa Mikkeli, Finland, nakapaniid sa espiritu sa mga Saksi nga miboluntaryo sa pag-organisar sa kombensiyon, miingon: “Wala akoy nakitang negatibo dinhi, puro positibo lamang! Ang espiritu sa buluntaryong mga trabahante tagsaon. Makalipay ang pagtan-awg mangayaong katawhan nga nalipay sa ilang buluhaton.”
Usa ka drayber sa bus nga presente sa kombensiyon sa Nancy, Pransiya, miingon: “Dili ako pamilyar sa mga Saksi ni Jehova, apan mas nakaila ako kanila karon. Sa miagi nakadungog ako kanunay ug negatibong mga pulong bahin kanila. Apan karon lahi na ang akong pagtan-aw sa mga butang. Maglisod ako sa paghubit sa maayong pagbati sa pagkaania dinhi. Walay pagtinuloray, walay kasuko, ug ang tanan mahapsay nga pagkapalakaw.”
Sa Pergusa, Italya, usa ka mantalaan nagpatik ug sulat nga gisulat sa usa ka grupo sa lokal nga mga molupyo nga nagpasalamat sa mga Saksi sa ilang maayong paggawi, ilabina sa ilang kahinlo, ug sa paagi sa ilang pag-atiman sa mga pasilidad sa istadyom. “Angay nga sama kanilag paggawi ang tanan,” miingon ang usa ka sulat, “apan sa pagkaalaot lahi ang mga butang dihang ubang matang sa mga tigom ang himoon.”
Daghang mga pakigpulong sa kombensiyon nagpasiugda sa panginahanglan sa pagsunod sa mga hiyas sa Diyos. Nagapaningkamot ang mga Saksi sa paghimo niana. Ang uban nadasig kaayo sa kauswagan nga ilang nahimo niining direksiyona.
Usa ka ahente sa mantalaan, diin ang iyang tindahan duol sa lugar sa gihimoan sa kombensiyon sa Edinburgh, Scotland, miingon: “Malipay kaayo ako dihang moabot ang mga Saksi sa Murrayfield! Maayo kaayo sila ug matinahuron dihang mosulod sila sa tindahan—walay magtinulorary, walay magreklamo, walay mag-unahay aron masilbihan. Makalipay kaayo nga ania sila dinhi, ug nagapaabot ako sa pagkakita kanila kada tuig.”
Usa ka magsusulat sa Belgium miingon: “Wala pa ako makakitag sama niini.” Laing tigbalita miingon: “Sa atong panahon, imposible, gikan sa tawhanong hunahuna, nga ang maong dagkong mga tigom maorganisar pa gihapon sa atmospera sa panag-igsoon.”
Si Tomas Bresky, usa ka tig-interbiyo sa telebisyon sa Sweden, presente sa kombensiyon sa Lulea, Sweden. Iyang gilaktod ang iyang mga impresyon niining paagiha: “Daw malumay ka . . . tapos sa pakig-uban niining mga tawhana sa pila ka adlaw. Malig-on kaayo ang ilang pagtuo, walay pagkompromiso, malig-on sa ilang pagsalig sa Bibliya. Kinsay dili madani sa usa ka organisasyon nga nagalihok? Dihang nagsilbi sa 10,000 ug pagkaon, daw sama lang kini nga nagpasag pila ka tinapay ug mga isda. Kinsay dili gustog malinaw ug mapailobong mga bata? Dinhi imong makita ang tinuod nga disiplina ug kahusay.”
Mga Kandidato sa Bawtismo Nagpakitag Pagsalig Kang Jehova
Diha sa tanang kombensiyon, dunay higayon aron makapasimbolo ang mga delegado sa ilang pahinungod pinaagi sa pagbawtismo sa tubig. Ang pakigpulong nga nag-una niining seremonyaha nagpatin-aw nga ang maong desisyon nagpabanaag sa pagsalig kang Jehova. Daghan niadtong mipresentar sa ilang kaugalingon alang sa bawtismo nakasinati na sa mga kaayohan sa maong pagsalig.
Diha sa kombensiyon sa Navan, Ireland, si Noel Donaghue gibawtismohan. Dili pa dugay sa miagi, pobre kaayo siya, nagpuyo sa gubaong balay sa Liverpool, Inglaterra, ug wala gani makatagad sa iyang kaugalingon tungod sa depresyon ug dakong kaguol bahin sa mga kahimtang sa kalibotan. Nagkaluya ang iyang panglawas, ug naghunahuna siya sa paghikog. Sa kataposan, sa Pebrero 1984 giputol ang iyang tiil tungod kay mikaging kini gumikan sa katugnaw.
Sa ulahi niadtong tuiga mipauli siya sa iyang panimalay sa Ireland ug nakontak sa mga Saksi ni Jehova. Wala magdugay misugod siya sa pagtambong sa mga tigom, ug ang iyang kaguol napulihan sa tinuod nga paglaom alang sa umaabot. “Ang unang katunga niadtong tuiga makalilisang,” siya miingon, “apan ang ikaduhang katunga maayo kaayo.” Karon may masanagon na siyang panglantaw, nga napabanaag sa tubag dihang gipangutana siya kon sa unsang paagi nakahimo siya sa pagsangyaw sa balay-balay pinaagi sa iyang artipisyal nga tiil. “Buweno,” siya mitubag, “mas maayo na lang kay dili na ako magkaproblema pa sa tugnawng tiil sa panahon sa tingtugnaw!”
Lakip sa mga kandidato sa bawtismo mao ang mga tigulang nga nakakat-on usab sa pagsalig sa Diyos. Diha sa distritong kombensiyon nga gihimo sa Colombes Stadium duol sa Paris, si Claudine Adolphe, usa ka 91-anyos nga tigulang nga babaye, gibawtismohan. Ang iyang anak nga babaye nahimong Saksi sa pila ka tuig nga miagi, ug si Claudine, bisan pa sa iyang pagkatigulang, nakapaniid sa pagtuo ug sa paagi sa kinabuhi sa mga Saksi ni Jehova. Namatyan ug daghang sakop sa pamilya, nalipay kaayo siya sa paglaom sa Bibliya sa pagkabanhaw nga gipatin-aw ngadto kaniya. Misugod siya sa pagtuon sa Bibliya ug midangat sa pagkaila kang Jehova ug sa pagsalig kaniya, ang Diyos nga nagasaad sa pagbangon sa mga patay ngadto sa kinabuhi.
Si José Benito, nga gibawtismohan sa El Ferrol, Espanya, makapamatuod usab sa bili sa pagsalig kang Jehova. Sulod sa upat ka tuig siya nakigbisog sa pagbuntog sa iyang pagkagiyanon sa droga apan wala molampos. Dayon misugod siya sa pagtuon sa Bibliya uban sa mga Saksi ni Jehova, ug ang tukmang kahibalo sa Pulong sa Diyos, lakip sa kusog nga gitagana sa Diyos, ang nakahimo kaniya sa pagpalayo gikan niining batasana. Siya dugay nang may apresasyon sa espirituwal nga mga butang, ug samtang ilalom sa impluwensiya sa droga, tigsangyaw siya diha sa mga bar ug sa mga iskina sa karsada bahin sa iyang kaugalingong doktrina mahitungod kang Jesus ug sa panginahanglan ug kalinaw. Mayubitong gianggaan siyag “ang apostol” sa mga tawo sa iyang lungsod. Karon iyang giagak na ang iyang kinabuhi sibo sa mga kinahanglanon sa Diyos ug nakakat-on sa pagsangyaw sa mas dungganon, makataronganong paagi.
Apresasyon sa Programa ug sa mga Giluwat sa Kombensiyon
Ang mga Saksi, nga mitambong gikan sa daghang mga nasod, nalipay sa matun-anong programa ug sa gitagamtam nga pag-ubanay. Usa ka bug-os nga magwawali, nga nakaalagad ug 43 ka tuig ingong madreng Katoliko, miingon: “Ang tagsaon tibuok-kalibotang panaghiusa ang nakapatingala kanako kanunay. Makadaghan nang nakasulti ako sa akong kaugalingon: ‘Si Jehova lamang nga Tig-organisar ang makaorganisar ning maong mga kombensiyon, tagsaon diha sa usa ka kalibotan nga dugang nagkabahinbahin sa tanang kalihokan sa kinabuhi!’”
Usa ka amahan sa tulo ka anak gikan sa Stoke on Trent, Inglaterra, misulat: “Ang tanang pakigpulong daw may punto ilabina alang kanato. Ug matag gabii dihang mopauli kami, nagpasalamat kami ni Jehova sa paghimog tagana alang kanamo.”
Diha sa mga kombenisyon sa pinulongang Kinatsila, ang tumatambong nalipay sa pagdawat sa librong Aid to Bible Understanding sa Kinatsila. Usa ka igsoon sa Granada, Espanya, nakabaton ug kopya ug nagpakli niana dihang naghulat sa estasyon sa gasolina atbang sa gihimoan sa kombensiyon. Ang usa sa mga katabang nakamatikod sa titulo sa libro ug miingon: “Mao kana ang akong gikinahanglan, usa ka butang aron matabangan ang mga tawo sa pagsabot sa Bibliya. Sa pagkatinuod wala gayod ako makasabot niana.” Mitanyag ang igsoon sa pagtabang kaniya, ug nasugdan ang pagtuon sa Bibliya uban ning tawhana sa semana human sa kombensiyon.
Labaw sa tanan, gipasiugda sa programa sa kombensiyon ang panginahanglan sa pagsalig sa Diyos ug sa iyang Gingharian inay sa tawhanong mga institusyon. Sa Italya, namatikdan sa usa ka inilang magsusulat kining tagsaong bahin sa pagtuo sa mga Saksi ni Jehova. Siya miingon diha sa tibuok-nasod nga sibya sa telebisyon: “Sila lig-ong nagtuo niining maong balita . . . sa madaogong pagbalik ni Kristo, nga tinuod nga nasulod diha sa mga sinulat sa Bag-ong Testamento. Ikaingon ko nga kining mga temaha ginapadaplin lamang dili lang sa Katolikong Iglesya kondili sa tanang dagkong mga relihiyong Kristohanon. Ilang gikuha kini gikan sa sentro nga mao ang orihinal Kristohanong pagtuo, ug nadiskobrehan ug balik kini niining mga kalihokan [ang mga Saksi]. Niini nga diwa kini maoy tinuod nga pagbalik, usa ka tukmang pagpabalik.”
Kining “pagbalik” sa paninugdang mga doktrinang Kristohanon ang nakahimo sa mga Saksi sa pagpuli sa pagduhaduha ug pagtuo, pagkawala sa paglaom ug paglaom, ug pagkawalay pagsalig ug pagsalig. Sila nahibalo nga ang Diyos dili gayod mobudhi sa ilang pagsalig kaniya. Kining mga serye sa mga kombensiyon nagpasundayag nga mapuslanon ang pagsalig sa Diyos ug sa pagkinabuhi nga sibo sa maong pagtuo. Sa natapos ang programa, mipauli ang mga delegado sa ilang mga balay nga mas determinado pa sa ‘pagsalig kang Jehova uban sa bug-os nilang kasingkasing.’—Proverbio 3:5.
[Chart sa panid 21]
1987 NGA MGA TAHO SA KOMBENSIYON HANGTOD KARON
Nasod Gidaghanon sa mga Kinatas-ang Gidaghanon sa
Kombensiyon Tumatambong Gibawtismohan
Austria 5 24,686 360
Belgium 7 31,121 319
Britain 15 155,743 1,212
Denmark 5 23,029 200
Finland 6 26,144 284
France 19 138,683 2,705
Germany 24 159,361 1,455
Greece 5 28,811 418
Ireland 2 4,326 61
Italy 34 221,227 5,496
Luxembourg 1 1,458 8
Malta 1 674 13
Netherlands 9 43,510 231
Norway 4 12,703 218
Portugal 12 55,057 1,102
Spain 15 105,591 2,394
Sweden 10 30,099 312
Switzerland 5 19,459 261
18 ka Nasod sa Uropa 179 1,081,682 17,049
23 sa Ubang Nasod 223 1,866,875 23,270
Total 41 ka NASOD 412 2,948,557 40,319
[Letrato sa panid 17]
Ang drama ni Rahab
[Letrato sa panid 17]
Roberto González, Espanya
[Mga Letrato sa panid 18]
Ibabaw: Claudine Adolphe, Pransiya
Tunga: Crystal Palace National Sports Centre, Inglaterra
Bawtismo simbolo sa pahinungod