Ang Pagsalig Hinungdanon Alang sa Usa ka Malipayong Kinabuhi

LISOD kaayo nga mahilo gumikan sa pagkaon. Ang tawo nga kanunayng mabiktima niini kinahanglang mag-amping sa iyang mga batasan sa pagkaon. Apan kon siya dili na mokaon aron dili mahilo, siya dili realistikanhon. Mas daghang problema ang motungha kay sa masulbad kon siya dili na mokaon. Walay mabuhig dugay kon walay pagkaon.

Sa samang paagi, masakit kon ikaw budhian. Ang kanunayng pagkabiktima sa pagbudhi tingali makatukmod kanato sa paghunahunag maayo bahin sa atong gipiling mga higala. Apan, ang paglikay sa mga tawo aron kita dili mabudhian dili mao ang solusyon. Nganong dili? Tungod kay kita dili magmalipayon kon kita maduhaduhaon sa uban. Aron makabaton ug kontentong kinabuhi, kita nagkinahanglan ug mga relasyon nga pinasukad sa pagsalig sa usag usa.

“Ang pagsalig maoy usa sa mga kinahanglanon alang sa tawhay nga pagpakiglabot sa uban sa matag adlaw,” nagkomento ang librong Jugend 2002. “Ang tanan nangandoy nga sila dunay kasaligan,” nagtaho ang mantalaang Neue Zürcher Zeitung. “Ang pagsalig makapauswag sa kalidad sa kinabuhi” sa punto nga kini “hinungdanon aron mabuhi.” Sa pagkatinuod, ang mantalaan nagpadayon, kon walay pagsalig, “ang tawo dili makasagubang sa mga suliran sa kinabuhi.”

Sanglit kita nagkinahanglan man ug tawo nga kasaligan, kinsa may atong kasaligan nga dili kita mameligrong budhian?

Salig Kang Jehova sa Bug-os Mong Kasingkasing

“Salig kang Jehova sa bug-os mong kasingkasing,” gisultihan kita sa Bibliya. (Proverbio 3:5) Sa pagkatinuod, ang Pulong sa Diyos sublisubli nga nagdasig kanato sa pagsalig sa atong Maglalalang, si Jehova nga Diyos.

Nganong makasalig man kita sa Diyos? Una, tungod kay si Jehova nga Diyos balaan. Si manalagnang Isaias misulat: “Balaan, balaan, balaan si Jehova.” (Isaias 6:3) Wala ka ba madani sa ideya sa pagkabalaan? Sa pagkatinuod, angayng madani ka tungod kay ang pagkabalaan ni Jehova nagpasabot nga siya putli, halayo sa tanang buhat nga daotan, ug bug-os nga kasaligan. Dili gayod siya mogawi sa dunot nga paagi o mang-abuso, ug kita dili gayod niya budhian.

Dugang pa, kita makasalig sa Diyos tungod sa iyang katakos ug tinguha sa pagtabang sa mga tawong nag-alagad kaniya. Ang iyang supremong gahom, pananglitan, maoy nagpaposible kaniya sa paglihok. Ang iyang hingpit nga hustisya ug kaalam maoy naggiya sa iyang paagi sa paglihok. Ug ang iyang dili-hitupngang gugma maoy nagtukmod kaniya sa paglihok. “Ang Diyos gugma,” misulat si apostol Juan. (1 Juan 4:8) Ang gugma sa Diyos nag-impluwensiya sa tanan niyang ginahimo. Ang pagkabalaan ni Jehova ug ang iyang ubang talagsaong mga hiyas naghimo kaniya nga usa ka maayong Amahan, usa nga atong kasaligan sa bug-os. Wala na gayoy laing mas kasaligan pa kay kang Jehova.

Salig Kang Jehova ug Magmalipayon Ka

Ang laing lig-ong katarongan sa pagsalig kang Jehova mao nga siya makasabot kanato nga labaw pa kay kang bisan kinsa. Siya nahibalo nga ang tagsatagsa ka tawo dunay dakong panginahanglan alang sa usa ka lig-on, dumalayon, ug masaligon nga relasyon sa Maglalalang. Ang mga tawo nga dunay ingon niana nga relasyon mobatig mas dakong kasegurohan. “Malipayon ang tawo nga lig-on ug lawas nga nagbutang sa iyang pagsalig diha kang Jehova,” mihinapos si Haring David. (Salmo 40:4) Minilyon karon ang bug-os kasingkasing nga nagpahayag niining panghunahuna ni David.

Tagda ang pipila ka pananglitan. Si Doris nakapuyo na sa Alemanya, Dominican Republic, Gresya, ug sa Tinipong Bansa. Siya miingon: “Ako malipayon kaayo nga misalig kang Jehova. Siya mahibalong moatiman kanako sa pisikal, espirituwal, ug emosyonal. Siya lamang ang labing maayong higala nga mabatonan sa usa ka tawo.” Si Wolfgang, usa ka magtatambag maylabot sa balaod, mipatin-aw: “Nindot kaayo nga may kasaligan ka nga indibiduwal nga naghunahuna gayod sa imong kaayohan, usa nga makahimo—ug magahimo gayod—kon unsay labing maayo alang kanimo!” Si Ham, nga natawo sa Asia apan nagpuyo na karon sa Uropa, mikomento: “Ako masaligon nga kontrolado ni Jehova ang tanang butang, ug siya dili masayop, busa malipay kong mosalig kaniya.”

Siyempre, ang matag usa kanato kinahanglang mosalig dili lamang sa atong Maglalalang kondili sa mga tawo usab. Busa, si Jehova, ingong maalamon ug may-kasinatiang higala, nagtambag kanato kon unsang matang sa mga tawo ang angay natong saligan. Pinaagi sa mainampingong pagbasa sa Bibliya, atong mahatagag pagtagad ang iyang tambag bahin niini.

Mga Tawo nga Atong Kasaligan

“Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan,” misulat ang salmista. (Salmo 146:3) Kining inspiradong mga pulong motabang kanato sa pagdawat nga daghang tawo ang dili takos sa atong pagsalig. Bisan ang mga tawong tinamod sama sa mga “hamili” niining kalibotana, sama sa mga eksperto sa linaing mga natad sa kahibalo o kalihokan, dili dihadiha nga mahimong takos sa atong pagsalig. Ang ilang ihatag nga giya sagad nga makapahisalaag, ug ang pagsalig sa maong “mga hamili” moresulta gayod ug kahigawad.

Siyempre, kini dili rason nga kita dili na mosalig sa tanang tawo. Ugaling lang, klaro nga kita kinahanglang magmapilion kon kinsay atong saligan. Unsang sukdanan ang angay natong gamiton? Ang usa ka pananglitan sa karaang Israel tingali makatabang kanato. Sa dihang kinahanglang magtudlo ug mga tawo nga mangabaga sa bug-at nga responsabilidad sa Israel, si Moises gitambagan sa ‘pagpili ug mga lalaki nga may katakos, may kahadlok sa Diyos, kasaligan nga mga lalaki, nagadumot sa dili-minatarong nga ganansiya.’ (Exodo 18:21) Unsay atong makat-onan gikan niini?

Kini maoy mga lalaki nga nagpasundayag ug diyosnong mga hiyas sa wala pa saligi ug mga katungdanan. Ila nang napamatud-an nga sila may kahadlok sa Diyos; sila may lalom nga pagtahod sa Maglalalang ug nahadlok sa pagpasuko kaniya. Nakita sa tanan nga kining mga tawhana naghimo sa ilang bug-os nga maarangan sa pagtuboy sa mga sukdanan sa Diyos. Sila nagdumot sa dili-minatarong nga ganansiya, nga nagpaila sa moral nga kalig-on nga nagpugong kanila nga dili madaot tungod sa gahom. Wala nila abusohi ang pagsalig sa uban aron sa pagpalambo sa ilang personal nga mga interes o niadtong sa ilang mga paryente o higala.

Dili ba maalamon nga atong gamiton ang samang sukdanan karon sa dihang mopili sa mga tawong atong saligan? Kita ba may nailhang mga tawo kansang mga panggawi nagpakita nga sila may kahadlok sa Diyos? Sila ba determinado sa pagsubay sa iyang mga sukdanan sa paggawi? Sila ba dunay integridad nga maoy nagtukmod kanila sa paglikay sa pagbuhat ug daotan? Sila ba matinud-anon mao nga dili nila maniobrahon ang kahimtang aron sila ang makabentaha o aron makuha ang ilang gusto? Ang mga lalaki ug mga babaye nga nagpasundayag niining mga hiyasa seguradong takos sa atong pagsalig.

Ayawg Kaluya Tungod sa Panagsang Kahigawad

Kon bahin sa paghimog desisyon kon kinsay atong saligan, kinahanglang magpailob gayod kita, kay kinahanglang mapamatud-an una nga ang usa ka tawo kasaligan. Ang maalamong lakang mao ang pagpakitag pagsalig sa usa ka tawo sa anam-anam, inanay nga paagi. Sa unsang paagi? Buweno, tingali atong panid-an ang paggawi sa usa ka tawo sulod sa usa ka yugto sa panahon, nga panid-an kon unsay iyang buhaton sa partikular nga mga kahimtang. Ang maong tawo kasaligan ba sa ginagmayng mga butang? Pananglitan, iya bang ibalik ang iyang gihulam nga mga butang sama sa iyang gisaad ug siya ba moabot sa untop nga panahon sumala sa gikasabotan? Kon mao, nan mahimong kasaligan nato siya sa mas importanteng mga butang. Kana maoy subay niining prinsipyoha: “Ang tawo nga kasaligan sa labing gamay kasaligan usab sa dako.” (Lucas 16:10) Ang pagkamapilion ug pagkamapailobon makatabang kanato aron malikayan ang dakong kahigawad.

Apan, komosta man kon dunay tawong magbudhi kanato? Ang mga estudyante sa Bibliya mahinumdom nga niadtong gabii nga gidakop siya, si Jesu-Kristo gibudhian gayod sa iyang mga apostoles. Gibudhian siya ni Judas Iskariote, ug ang uban mikalagiw sa kahadlok. Gilimod pa gani ni Pedro si Jesus sa tulo ka beses. Apan nasabtan ni Jesus nga si Judas lang ang mibudhi nga tinuyo. Bisag gibudhian nianang malisod nga panahon, gisulti gihapon ni Jesus ang iyang pagsalig sa nahibiling 11 ka apostoles pipila lang ka semana sa ulahi. (Mateo 26:45-47, 56, 69-75; 28:16-20) Sa samang paagi, kon sa atong pagtuo kita gibudhian sa tawong atong gisaligan, mas maayong atong timbangtimbangon kon ang gituohang pagbudhi pamatuod ba sa usa ka di-kasaligang espiritu o sa umalagi lang nga kahuyangan sa unod.

Ako ba Kasaligan?

Ang tawong modesisyon nga magmapilion kon kinsay iyang saligan kinahanglang magmakataronganon ug mangutana sa iyang kaugalingon: ‘Ako ba kasaligan? Unsang makataronganong mga sukdanan sa pagkakasaligan ang akong angayng dahomon sa akong kaugalingon ug sa uban?’

Siyempre, ang kasaligang tawo kanunayng mosulti sa tinuod. (Efeso 4:25) Dili niya ipaayon ang iyang mga pulong sa tawo nga iyang kaestorya aron makabaton ug personal nga kaayohan. Ug kon siya manaad, ang kasaligang tawo mohimo sa iyang bug-os nga maarangan sa pagtuman niini. (Mateo 5:37) Kon dunay motug-an kaniya ug kompidensiyal nga butang, ang kasaligang tawo motipig sa sekreto ug dili motabi. Ang kasaligang tawo matinud-anon sa iyang kapikas. Siya dili motan-awg pornograpiya, siya dili maghunahunag mga butang nga makapukaw sa seksuwal nga gana, ug siya dili magbirigbirig. (Mateo 5:27, 28) Ang tawo nga takos sa atong pagsalig magkugi sa pagpanginabuhi alang sa iyang kaugalingon ug sa iyang pamilya ug dili moapil sa sayon nga pagpanguwarta pinaagi sa pagpamentaha sa ubang tawo. (1 Timoteo 5:8) Ang paghinumdom niining makataronganon ug Kasulatanhong mga sukdanan motabang kanato sa pag-ila sa mga tawong atong kasaligan. Dugang pa, ang pagsunod sa maong mga sukdanan sa panggawi motabang sa matag usa kanato sa pagkahimong takos sa pagsalig sa uban.

Makapalipay unya ang pagkinabuhi diha sa usa ka kalibotan diin ang tanang tawo kasaligan ug diin ang mga kahigawad tungod sa pagbudhi mahanaw na! Kana ba usa lamang ka damgo? Kini dili damgo alang sa mga tawo nga nagtuo gayod sa mga saad sa Bibliya, tungod kay ang Pulong sa Diyos nagtagna bahin sa nagsingabot nga matahom nga “bag-ong yuta” nga wala nay pagpanglimbong, pagpamakak, ug pag-abuso ug wala nay kasubo, sakit, ug bisan kamatayon! (2 Pedro 3:13; Salmo 37:11, 29; Pinadayag 21:3-5) Dili ba mas maayong magpakisayod ug dugang bahin niini nga palaaboton? Ang mga Saksi ni Jehova malipayng mohatag kanimo ug dugang nga impormasyon bahin niini ug sa uban pang hinungdanong mga topiko.

[Hulagway sa panid 4]

Ang pagkamadudahon makapawala sa kalipay

[Hulagway sa panid 5]

Si Jehova mao ang labing takos sa atong pagsalig

[Mga hulagway sa panid 7]

Kitang tanan nagkinahanglan ug mga relasyon nga pinasukad sa pagsalig sa usag usa