Usa ka Kombensiyon nga Nakapauswag sa Atong Pagsalig Kang Jehova
ANG atong langitnong Amahan, si Jehova nga Diyos, nahibalo kon unsay atong kinahanglan. Ug iyang gibutang kini sa mga hunahuna sa iyang dedikadong mga alagad kon kinsa ang nagadumala sa iyang buluhaton sa yuta sa pagtagbaw sa maong panginahanglan. Tinong mao kini ang ikaingon bahin sa “Pagsalig Kang Jehova” Distritong mga Kombensiyon, nga gihimo sa tibuok yuta gikan sa Hunyo 1987 paunahan. Sila tinuod gayod nga nakapalig-on sa mga Kristohanon batok sa kawalay pagtuo, pagduhaduha, ug pagkawalay pagsalig nga kaylap sa kalibotan.
Ang temang “Pagsalig Kang Jehova” maayo kaayong pagkatagik sa programa. Gipasiugda kadto sa mga pahayag nga kusganon ug tunong gayod sa punto, nga timaan sa pagkamadayganon ug pagkaprangka. Kining tanan nakapalig-on sa mga mamiminaw sa pagsalig kang Jehova. Sila namauli nga napasilsil pag-ayo ang tema diha sa ilang mga kasingkasing ug mga hunahuna, determinado nga pinaagi sa ilang mga lihok ug sa ilang mga pulong ilang imantala sa tanan nga sila bug-os nga nagasalig kang Jehova.
“Salig Kang Jehova, Kamo nga Katawhan”
Kadtong mga pulonga nga makita sa Isaias 26:4 nagpahayag sa tema alang sa unang adlaw. Tukma kaayo, gibuksan ang programa uban sa pakigpulong “Ikiling ang Imong Dalunggan sa mga Pulong sa Diyos.” Gipakita sa mamumulong nga kining ekspresyona nga makita sa makadaghan diha sa Pulong sa Diyos, nagkahulogan sa paghatag bug-os nga atensiyon sa hunahuna ug kasingkasing sa gipamulong, uban sa katuyaon sa pagpadapat sa butang nga nadunggan. Nagkahulogan kana sa pagpugong sa kaugalingon ug sa pagpaminaw pag-ayo sa gipamulong, sa dili pagpalatagaw sa hunahuna. Pinaagi lamang sa pagkiling sa atong dalunggan nga mapalig-on ang atong pagsalig kang Jehova ug mapukaw kita sa paglihok sa gipamulong. Ug dili ba angay mao kini ang atong kaisipan dihang ipatin-aw ang pulong sa Diyos, sama diha sa atong mga miting sa kongregasyon?
Gipahayag sa tsirman sa kombensiyon ang sunod nga ulohan, “Kadtong Nagasalig Kang Jehova Malipayon nga Ania Dinhi.” Iyang gipunting nga kon mas dako ang atong pagsalig kang Jehova, mas dako ang atong kalipay. Ang pagsalig kang Jehova nagkahulogan sa bug-os nga pagsalig kaniya. Kon mas dako ang atong kahibalo bahin kang Jehova ug ang atong pagmahal kaniya, mas molig-on ang atong pagsalig kaniya. Dili kay usa lamang ka panultihon ang tema sa atong kombensiyon. Atong ginapakita ang atong pagsalig kang Jehova sa daghang paagi, ilabina sa atong pagpakitag konsiderasyon sa uban. Sa kalipay sa tanan, sa konklusyon sa iyang pahayag, gipresentar sa tsirman ang unang giluwat—usa ka mabulokon, praktikal nga instrumento sa pagsangyaw. Kadto mao ang tract nga Kon Nganong Ikaw Makasalig sa Bibliya.
Tapos gihisgotan ang iladong pananglitan ni David dihang giatubang ang higanting Goliat, gipasiugda sa sunod nga mamumulong ang “Sa Unsang Paagi Misalig ang Uban Kang Jehova” sa modernong panahon. Pananglitan, dihay usa ka igsoong babaye kang kansang dili-magtutuong bana, nagdalag posil, ug gihulga siyang patyon kon magpadayon sa pagtambong sa mga miting. Gipakita sa uban ang ilang pagsalig kang Jehova dihang gisultihan nga ang ilang kinabuhi nahasandig sa pagdawat sa pag-abuno sa dugo. Ang mga batan-on nakahatag pamatuod sa ilang pagsalig kang Jehova pinaagi sa pagsukol sa mga pag-ipit sa pag-apil sa mga dula o sa pagpangagpas sa hataas nga edukasyon human makatapos sa hayskol.
Gitapos ang programa sa Biyernes sa pakigpulong “Usa ka Katawhan nga Lahi Gikan sa Kalibotan.” Atong gipakita nga kita may pagsalig kang Jehova pinaagi sa paghimo sa atong paggawi sa kaatbang nga sekso nga walay ikasaway, pinaagi sa pagtugot sa Kristohanong mga prinsipyo nga maoy momando sa atong kalingawan, ug pinaagi sa paglikay sa tanang sapot ug pamostura nga mopahanap sa kalainan sa lalaki ug babaye. Busa pinaagi sa atong pagpalahi gikan sa kalibotan, sa matag karon ug unya usa ka gamhanang pagpamatuod ang mahatag, nga misangpot sa pipila sa pagdawat sa kamatuoran.
Sa Biyernes sa hapon, gisugdan ang programa sa pakigpulong “Nakapatulin ang Pagpayunir sa Espirituwal nga Pag-uswag.” Ug pagkatinuod niini! Pinaagi sa Pulong ni Jehova, sa iyang balaang espiritu, ug sa iyang organisasyon, nagatagana ang Diyos sa atong gikinahanglan sa pag-uswag aron mahimong “usa ka tawong hamtong,” apan ang pagpayunir mopahimutang kanato aron mahimong mas maayo ug makagamit sa bug-os pa niining tanang espirituwal nga mga tagana. (Efeso 4:13) Pinaagi sa mga interbiyo, giasoy sa mga payunir kon sa unsang paagi ang bug-os panahong ministeryo nakahimo kanila sa pag-ugmad sa bug-os pa sa bunga sa espiritu sa Diyos, sa pagpakita sa dugang gugma alang sa mga tawo, aron mahimong labi pang episyente diha sa ministeryo, ug sa pagsalig kang Jehova sa mas dako pa, busa nagaugmad sa suod nga relasyon kaniya. Kining tanan nakapatulin sa ilang espirituwal nga pag-uswag.
Gipahayag sa sunod ang keynote nga pakigpulong, “Usa ka Katawhan nga Masaligon Kanunay Kang Jehova.” Ang makapapukaw nga pakigpulong nagpakita nga kita lahi gikan sa kalibotan tungod kay bug-os kitang may pagsalig kang Jehova. Binase sa nagkalainlaing mga teksto gikan sa basahon ni Isaias, gipakita sa mamumulong nga atong nakita kining madasigong mga tagna natuman diha sa mga Saksi ni Jehova tungod kay kita may pagsalig sa Diyos. Uban ang pagsalig, nagahulat kita sa panahon sa duol nga umaabot dihang ipasundayag ni Jehova ang iyang kasuko sa tanang mga nasod ug dayon moabot ang Paraiso.
Ang mga kombensiyonista nadasig sa “Pagpakaylap sa Maayong Balita sa Tanang Higayon.” Tapos nga gipasiugda ang kahinungdanon sa pagbuhat niini, gipakita sa mga pasundayag ang paagi sa paggamit sa bag-ong tract nga Kon Nganong Ikaw Makasalig sa Bibliya diha sa pormal ug impormal nga pagpamatuod. Siyempre, gusto natong magdala kanunay niining maong mga tract, kay ang pagpakaylap sa maayong balita sa tanang higayon maoy ilhanan sa tanang saksi ni Jehova ug maoy paagi sa pagpakita nga kita may pagsalig Kaniya.
Gipabilhan ug dako mao ang pakigpulong “Mga Ginikanan—Abota ang Kasingkasing sa Inyong Anak Gikan pa sa Pagkamasuso.” Aron magdako ang bata nga may pagsalig kang Jehova, ang iyang pagbansay kinahanglang magsugod sukad pa sa pagkamasuso ug kinahanglang hatagan sa pangunang pagtagad. Niining paagiha lamang nga posibleng masumpo ang tanang daotang mga impluwensiya sa telebisyon, sa tunghaan, ug sa dalan. ‘Pakitaa ang bata diha kanimo kon unsay inyong gusto nga modako ang bata,’ gisultihan ang mga ginikanan. Oo, ang pagpakitag maayong pananglitan mao ang labing maayo sa pag-abot sa kasingkasing sa bata. Ang tanang bahin sa balaang pag-alagad kinahanglang moabot sa natural nga paagi ug makalipay kon ang palibot sa balay tinuod nga may espirituwalidad. Dili gayod nato ihikaw ang panahon ug paningkamot nga nalangkit. Padayona usab ang pag-abot sa kasingkasing sa bata pinaagi sa maayong komunikasyon. Pagpakitag kalig-on uban ang gugma, ug paghatag ug rason dihang maghatag disiplina. Dayega ug gantihi kon takos, apan ayaw gayod hiphipi ang imong anak.
Nakapatin-aw sa seryosong mga problema taliwala sa ubang batan-ong mga Saksi mao ang pakigpulong “Mga Batan-on—Pagbantay Batok sa Pagsubay ug Duha ka Sukdanan sa Kinabuhi.” Nganong ang uban naningkamot sa pagsubay ug duha ka sukdanan sa kinabuhi? Tungod kay gusto sila nga kahimut-an sa ilang mga ginikanan ug sa kongregasyon apan nahadlok sa pagbiaybiay sa ilang kalibotanong mga katalirongan. O tingali nagtuo sila nga may nakulang kanila nga kalingawan kon sila dili manabako, moinom ug mga droga, ug makigbahin sa gidiling sekso. Apan sa yano dili ka makaikyas sa kamatuoran nga ang pagsubay ug duha ka sukdanan sa kinabuhi makahatag pasipala kang Jehova, kasubo sa ilang mga ginikanan, ug kaguol sa ilang kaugalingon. Ang bisan kinsa nga magapugas sa unod magaani ug pagkadunot, samtang ang pagbaton ug maayong relasyon kang Jehova, bug-os nga mosalig kaniya, nagabantay sa usa gikan sa pagsubayg duha ka sukdanan sa kinabuhi.—Galacia 6:8.
Puwersadong gipasiugda kining mga prinsipyoha diha sa drama nga misunod dayon. Nag-ulohang Maunongong Pagpasakop Kang Jehova ug sa Iyang Organisasyon, nasudlan kini ug kalan-on alang sa hunahuna sanglit gipasundayag niini nganong napugos ang usa ka ansiano sa pagkanaog sa iyang katungdanan tungod kay ang iyang anak nga babaye nadiskobrehang nagsubay ug duha ka sukdanan sa kinabuhi. Nakapukaw ang drama ug daghang madasigong mga ekspresyon sa apresasyon.
“Salig Kang Jehova ug Pagbuhat ug Maayo”
Gibase sa Salmo 37:3, mao kini ang tema sa ikaduhang adlaw sa kombensiyon. Human sa paghisgot sa teksto sa adlaw, nga nagdasig sa pagbuhat niini sa kada adlaw, gipasiugda niining programaha ang tulo ka bahin nga simposyom nga nag-ulohang “Pagpakita sa Atong Pagsalig Kang Jehova.” Gipadayag sa unang mamumulong ang panginahanglan sa paghimo niini “Pinaagi sa Makugihong Pagtuon sa Pulong sa Diyos.” Atong buhaton kini aron malikayan ang lit-ag sa pagkawalay pagtagad ug sa mga laang sa materyalismo, seksuwal nga imoralidad, ug apostasiya. Ang Sosyedad nagatagana ug dagayang mga giya sa pagtuon sa Bibliya, sama sa bag-ong Watch Tower Publications Index 1930-1985. Pinaagi lamang sa pagpahimulos sa bug-os niining mga tagana nga atong mabatonan ang maayo, masaligong relasyon sa atong langitnong Amahan ug aron mahimong epektibo ingong iyang mga saksi.
Gipasiugda sa sunod nga mamumulong ang kamatuoran nga ang pagsalig kang Jehova mahimong ikapakita “Pinaagi sa Pagbuhat sa mga Butang nga Nakat-onan.” Oo, buot nato nga kita mamumuhat sa Pulong, nga nagatagad sa tanang panahon nga mouswag. Sa unsa nga bahin? Aw, diha sa atong relasyon sa uban, sa atong pamiste ug sa pamostura, sa pagpangita pag-una sa Gingharian sa Diyos, ug sa pagpauswag sa pakigdait ug panaghiusa taliwala sa atong mga igsoon! Aron malikayan ang sala sa pagkamapangahason, kinahanglang magbantay kita sa atong dapit sa pamilya ug sa kongregasyon. Busa kon atong ipadapat ang mga butang nga atong nakat-onan, makita sa tanan nga kita may pagsalig kang Jehova.
Gitapos ang simposyon sa panaghisgot sa ulohang “Pagpakita sa Atong Pagsalig Kang Jehova—Pinaagi sa Atong Pagkugi Diha sa Kanataran.” Sa pagbuhat niini, atong gipakita ang atong gugma sa Diyos ug sa atong silingan ug nagapanalipod sa atong kaugalingon. Tingali natagbaw na kita sa dagaang, taphaw nga pag-alagad, apan matagbaw ba si Jehova? Dili ba giawhag kita sa iyang Anak nga magkugi? (Lucas 13:24) Ang pag-uswag nga kanunay natong makita diha sa mga magmamantala, mga payunir, ug sa aberids nga oras nga ginagugol sa pag-alagad sa kanataran angay mopukaw kanato sa paghimog dugang pa. Dili ba? Pinaagi sa madasigong buluhaton, makahatag kitag maayong pananglitan, ginapakita nato ang atong pagsalig kang Jehova, ug makanaton sa iyang pag-uyon.
Sunod mao ang hangyo alang sa atong konsensiya diha sa pakigpulong “Bansaya ang Pagbuhat sa Bug-os Pa.” Pagkadagayang gitagan-an kita ni Jehova sa espirituwal ug sa materyal! Atong ginapakita ang atong apresasyon pinaagi sa pagsundog kaniya sa pagpamatuod ug sa pag-amot sa pinansiyal nga paagi sa buluhatong pagsangyaw. Makahimo ba kita sa pagpamenos sa mahalong mga kalingawan aron makaamot ug dugang pa?
Ang pakigpulong sa bawtismo, “Ang Imong Dedikasyon ug Bawtismo Nagapabanaag sa Pagsalig Kang Jehova,” nagpakita nganong mosalig kita sa Diyos ug dili sa tawo. Ang bawtismo sa tubig nagkahulogan sa pagkamatay sa atong paggawi niadto ug gibangon sa usa ka paagi sa kinabuhi nga kaharmoniya sa kabubut-on sa Diyos. Sukad dinhi, kinahanglang magpadayon kita sa ‘pagbansay sa hustisya, paghigugma sa kalulot, ug magmakasaranganon sa paglakaw uban sa atong Diyos.’ (Miqueas 6:8) Lakip niadtong gibawtismohan mao ang 8-anyos nga batang babaye nga nagadumalag duha ka pagtuon sa Bibliya uban sa mga kauban sa tunghaan, usa ka tawong 79-anyos, ug 44-anyos nga bakol.
Ang programa sa Sabado sa hapon gisugdan sa pakigpulong “Pagbuhat sa ‘Hinungdanong mga Butang’ Aron sa Pagpahimuot sa Diyos.” Gibase sa Buhat 15:28, 29, gipakita niini ang panginahanglan sa pagpasinati sa atong mga doktor bahin sa atong baroganan maylabot sa dugo sa dili pa moabot ang problema ug sa paghatag maayong mga sugyot kon sa unsang paagi pagahimoon kini.
Ang pakigpulong nga nakapukaw ug maayong komento mao ang “Makatungdananong Pagpanganak Ning Panahon sa Kataposan.” Gipahayag mao ang timbang nga hunahuna, gipakita nga samtang ang pagpanganak makahatag daghang kalipay, mohatag usab kini ug daghang responsibilidad ug usahay mosangpot ug mga kaguol sa kasingkasing, sama sa panahon dihang magkaproblema ang mga anak. Ang mga inahan ilabina ang mag-antos sa espirituwalidad tungod sa palas-anon sa pagpanganak.
Dayon miabot ang pakigpulong “Mga Ansiano—Bantayi ang Gisalig Kaninyo.” Kining butang nga gisalig mao ang pagbantay sa panon sa Diyos—pagpanguna, pagpakaon, ug pagpanalipod niana, sibo sa Isaias 32:1, 2. Ang pagbuhat sa mga kaakohan sa panimalay samtang nagaatiman sa mga buluhaton sa kongregasyon nakahawas ug tinuod nga hagit. Aron makabantay ang mga ansiano sa gisalig kanila nagkahulogan usab sa paglikay sa mga lit-ag sa materyalismo, sobrang kalingawan, ug dili-maayong mga kalingawan. Lakip niadtong giinterbiyo diha sa Dortmund nga distritbong kombensiyon sa Federal Republic of Germany mao ang usa ka ansiano nga nagabantay sa gisalig kaniya kapin na sa 60 ka tuig.
Ang pakigpulong “Magmasinugtanon Niadtong Nagapanguna” makataronganong misunod. Ang gugma motabang kanato aron makapasakop ug magmasugtanon sa mga magtatan-aw sa kongregasyon ug mopugong kanato sa pagpakitag pagkadili-mapailobon tungod kay sila dili hingpit, sama kanato. (Hebreohanon 13:17) Pinaagi sa pagpakitag pagtahod sa mga ansiano sa mga butang dagko ug gamay, atong gitabangan sila sa pagpas-an sa ilang mga palas-anon inay maghatag dugang kabug-at kanila.
Natapos ang programa sa Sabado uban sa tulo ka bahin nga simposyom “Buhi ang Pulong sa Diyos,” nga gibase diha sa Hebreohanon 4:12. Gipakita sa unang mamumulong nga kini buhi tungod kay “Kini May Gahom nga Makapausab.” Karong panahona, sama sa panahon sa Bibliya, kita dunay daghang mga pananglitan nga nagapakita kon sa unsang paagi ang pagsalig sa Pulong sa Diyos nakapalihok sa mga tawo sa paghimog dagkong mga kausaban sa ilang mga kinabuhi ug nakahatag kanilag gahom sa pagsangyaw nga walay kahadlok.
Gipakita sa ikaduhang bahin sa maong simposyom nga ang Pulong sa Diyos “Mas Mahait Kay sa Duhay Sulab nga Espada.” Kini nakapahimo usab kanato sa pagputol sa bakak nga mga pagtulon-ang Babilonyanhon. Nakatabang usab kini kanato sa ‘pagbulag sa kalag ug sa espiritu’ sa pagkaagi nga kini nakatabang kanato sa pag-ila sa atong mga aksiyon ug sa atong tinuod nga mga motibo. Pinaagi sa paggamit sa “espada” niining paagiha, mas kahimut-an kita ni Jehova ug dugang nga makabaton ug kalinaw sa uban ug sa atong kaugalingon.
Gipakita sa panapos nga bahin nga buhi ang Pulong sa Diyos tungod kay “Kini Nagalig-on ug Nagapalihok sa Atong Kasingkasing.” Diha sa Bibliya, ang pulong “kasingkasing” sa katibuk-an gigamit sa mahulagwayong paagi ug nagpasabot sa kinasulorang pagkatawo nga makita sa atong mental ug emosyonal nga mga hiyas. Ang Pulong sa Diyos makalig-on sa atong kasingkasing pinaagi sa pagpadayag sa iyang katingalahang mga hiyas pinaagi sa iyang pakiglabot sa katawhan. Ang dili-mahakugong gugma sa Diyos nakapukaw kanato sa pagsundog kaniya. Diha sa iyang panapos nga mga pahayag, girepaso sa mamumulong ang rekord sa Watch Tower Society sa pag-imprinta ug mga Bibliya ug nalipay ang tumatambong sa pagpahayag sa pagluwat sa usa ka matahom deluxe nga edisyong de-bulsa sa New World Translation.
“Salig Kang Jehova Uban sa Bug-os Mong Kasingkasing”
Kining tema sa Dominggo, gikuha gikan sa Proverbio 3:5, nga gihisgotan sa usa ka ansiano nga maoy nagbukas sa programa ug gihisgotan ang teksto sa adlaw. Dayon miabot ang nagausisa sa kalag nga pakigpulong “Gibali-wala Mo ba ang Balaang mga Butang?” Ang kalibotan nagtuo nga kini walay utang sa Diyos, apan ingong mga Saksi ni Jehova, kita nahibalo nga aron makabaton sa iyang pag-uyon, kinahanglan atong sundon ang matinumanong mga tawo sa karaan pinaagi sa pagpakitag apresasyon sa balaang mga butang. Gihisgotan sa mamumulong ang 13 kanila, lakip niini mao ang ngalan sa Diyos, ang iyang Pulong, ang iyang balaang espiritu, ang iyang mga kasugoan, ang iyang makitang organisasyon, ang atong relasyon sa Diyos, ang atong mga miting, ug ang atong mga pribilehiyo sa pag-alagad. Kon tinuod natong gipabilhan kining balaang mga butang, atong unahon kini diha sa atong mga kinabuhi, mosalig kang Jehova sa bug-os, ug pagabalosan niya.
Sunod miabot ang puwersadong pakigpulong “Dumti sa Bug-os ang Makauulawng Dalan sa Kalibotan.” Tungod sa pagkaprangka niini, nakabangon kinig mga pahayag sama sa, “Mao gayod kanay among gikinahanglan!” Sanglit kaylap ang pagkadaotan, kinahanglang magbantay ang mga Kristohanon batok sa pag-uyon sa imoralidad ug sa kapintasan. (2 Timoteo 3:1-5) Busa, dili gayod kita motan-aw o mamati niining mga pagsibya diha sa TV o sa radyo, o mobasa bahin niini diha sa mga basahon. Sa pagkatinuod, dili gayod nato hunahunaon kini. ‘Ang tinuod nga mga Kristohanon nga nagatinguha sa pagbaton ug maayong relasyon kang Jehova dili gayod makiglabot sa pornograpiya,’ dili, bisag diyutay na lang!
Ang programa sa Dominggo sa buntag gitapos uban sa makatandong nga drama sa Bibliya nga Luwason ni Jehova Kadtong Nagatawag sa Iyang Ngalan. Gihisgotan niadto ang daghang mga hitabo sa kinabuhi ni Josue. Sa realistikanhon, gipasundayag niadto ang pagtan-aw sa mga molupyo sa Jericho sa pagmartsa sa mga sundalo sa Israel libot sa siyudad sa adlaw-adlaw. Gipasiugda usab ang dakong pagtuo ni Rahab, nga misangpot ug kaluwasan kaniya ug sa iyang panimalay. Sa pagtapos, ang tanan gipangutana: ‘Ikaw ba may malig-ong pagtuo ug pagsalig sama kang Josue ug sa iyang maisog nga mga kauban? Kon mao, kita makalaom nga makabahin sa kataposang kadaogan ni Jehova batok sa iyang mga kaaway.’
Ang gipasiugda diha sa publiko bahin sa “Pagsalig Kang Jehova” Distritong Kombensiyon miabot pinaagi sa pakigpulong nga nag-ulohang “Sa Atong Makahahadlok nga Panahon, Kinsay Imong Tinuod nga Kasaligan?” Gipatin-aw ang kamatuoran nga ang katawhan dakog panginahanglan ug tuboran sa pagsalig! Sa dayag, gipakita niadto ang kaubangan sa pagsalig diha sa mga tawo. Busa, ang Pulong sa Diyos nagtambag kanato sa pagsalig kang Jehova ug mihatag kanato ug malig-ong mga katarongan sa pagsalig. Kinahanglang mosalig kita kaniya tungod sa iyang mga hiyas ug sa iyang rekord sa pagluwas niadtong misalig kaniya, si Haring Hezekias mao ang makapukawng pananglitan. Sa dili madugay ang samang kaluwasan ang matagamtam sa mga tawo kang kansang kurso sa paglihok nagapakitag pagsalig kang Jehova.
“Padayon sa ‘Pagkinabuhi nga Madaiton’” mao ang tema sa pakigpulong nga misunod dayon. Aron magkinabuhi nga madaiton nagkahulogan sa pagkahimong aktibo sa pagpasiugdag pakigdait. Nagkahulogan usab kini nga madaiton kita sa atong kaugalingon tungod sa pagbaton ug maayong konsensiya. Pinaagi sa pagpasundayag sa mga bunga sa espiritu sa Diyos, ilabina ang gugma ug pagpugong sa kaugalingon, makahimo kita sa pagkinabuhing malinawon uban sa atong kaugalingong pamilya ug sa mga igsoong lalaki ug babaye diha sa kongregasyon.
Walay duhaduha bahin sa kamatuoran nga gisangkapan kita niining kombensiyona sa “Pag-atubang sa Umaabot nga May Bug-os nga Pagsalig Kang Jehova.” nga maoy ulohan sa kataposang pakigpulong. Pagkamaayo nga pagkasumariya niini sa programa! Gipasiugda sa mamumulong nga sa adlaw-adlaw kita kinahanglang mosalig kang Jehova uban sa atong bug-os nga kasingkasing, tagdon siya sa tanan natong mga paagi, ug pasagdan siya nga maoy motultol sa atong mga dalan. (Proverbio 3:5, 6) Gipabilhag dako sa mga kombensiyonista ang pagkadungog sa 16 ka bag-ong mga pakigpulong publiko, ang mga cassette sa The Watchtower, ug sa giprinta pag-usab nga artikulo bahin sa dugo nga migula sa Awake! ug mabatonan aron atong ikahatag ngadto sa atong mga doktor. Oo, nalipay kita sa pagkasayod bahin sa pagluwat sa laing drama sa Bibliya diha sa cassette, ang giprinta pag-usab nga bound volumes sa Watchtower (1960-79), ug ang publikasyon sa dugang tulo ka tract!
Ang tanang mitambong sa “Pagsalig Kang Jehova” Distritong Kombensiyon napabaskog sa espirituwal nga paagi. Sila karong panahona andam sa pag-atubang sa umaabot nga may bug-os nga pagsalig sa ilang langitnong Amahan. Ug ang tanan napadasig sa kataposang tambag: “Samtang atong gihulat ang umaabot, hinaot
maghiusa kitang tanan sa pagpamatuod pinaagi sa atong paagi sa kinabuhi nga kita may ‘pagsalig kang Jehova.’”
[Chart sa panid 26]
Nagkalainlaing Distritong mga Kombensiyon nga “Pagsalig Kang Jehova”
Tumatambong Gibawtismohan
Austria 24,686 360
Brazil 442,731 7,626
British Isles 156,417 1,225
Colombia 82,321 1,852
Demark 23,029 200
Federal Republicof Germany 159,361 1,455
Finland 26,144 284
France 138,683 2,705
Hong Kong 2,661 49
Ireland 4,326 61
Italy 221,227 5,496
Jamaica 18,540 184
Japan 232,904 3,416
Korea 82,296 2,013
Malaysia 1,154 15
Norway 12,703 218
Portugal 55,057 1,074
Puerto Rico 49,953 377
Spain 105,591 2,394
Sweden 30,099 312
Switzerland 19,459 261
Trinidad 10,649 132
United States 1,288,313 13,562
Venezuela 100,777 1,664
Zimbabwe 45,544 580
[Mga hulagway sa panid 25]
Gipasiugda sa nakapukaw sa hunahunang mga drama ang panginahanglan sa pagsalig kang Jehova
Si F. W. Franz, membro sa Nagamandong Lawas sa mga Saksi ni Jehova, mipakigpulong sa naminawng mga tumatambong sa kombensiyon
[Hulagway sa panid 26]
Daghan ang nagpasundayag sa pagsalig kang Jehova pinaagi sa pagpabawtismo sa pagsimbolo sa ilang pagpahinungod kaniya