‘Milagro’ nga May Nadaot
WALAY duhaduha, ang Hapones nga milagro sa linain katingalahan. Katingalahan ang pagtan-aw sa usa ka tibuok nasod nga nag-ugmad sa kaugalingon gikan sa kapildihan ug kagun-oban nga nahimong usa sa labing lig-on sa ekonomiya nga mga nasod sa kalibotan, ug kini sa usa ra ka kaliwatan. Kining tanan, sumala sa atong nakita, nakab-ot tungod sa estriktong edukasyon, pagkugi, ug personal nga sakripisyo, nga lagmit dili masundog sa ubang nasod.
Apan unsay gipatungha niining milagroha alang sa mga Hapones? Luyo sa pangidlap sa ibabaw, kini mihatag ba kanilag tinuod nga kalipay ug katagbawan? Ilalom sa kauswagan ug kabahandianon, adunay makapatugawng mga ilhanan nga ang Hapones nga katilingban nagakawad-an sa iyang tradisyonal nga mga prinsipyo ug inanay nalambiggit sa mga suliran ug mga sakit nga nagasakit sa ubang industriyalisadong nasod.
Sa dakong gilapdon, daghan sa maong mga suliran maoy ikaduhang mga bunga sa sistema mismo. Pananglitan, namatikdan sa mga eksperto ang dakong pag-uswag sa mga kaso sa depresyon ug paghikog taliwala sa mga lalaki diha sa ilang mga panuigong 40 ug 50 nga maoy mga manedyer. Ang The Daily Yomiuri mikutlo sa awtor nga si Von Woronoff nga miingon: “Ang mga surbi nagapadayag nga daghang Hapones ang dili malipayon sa ilang mga trabaho ug moundang kon sila may higayon.” Apan ilang gibating sila nalit-agan sa sistemang gipasukad sa pagkataas ug serbisyo ug sa promosyon. Kini usa ka hinungdang ang tibuok-kinabuhing trabaho dili na mao ang kinalabwang pangandoy taliwala sa batan-ong kaliwatan. “Alang sa katawhang tag-20 ug 30 sa edad, ang pagkamaunongon ngadto sa kompaniya maoy sero,” matud sa usa ka konsultant bahin sa pagdumala sa Tokyo.
Sa susama, ang pagkawala-diha sa amahan sa panimalay, pagkadili-tagbaw sa inahan sa iyang hago nga papel, ug ang makapuol nga pagpit-os sa eskuylahan nakapasamot sa pag-uswag sa delingkuwensiya sa batan-on sa Hapon, nga karong bag-o nahimong nasodnong suliran. Kining mga butanga mao usab ang hinungdan sa nagkataas nga proporsiyon sa diborsiyo, nga midoble sa miaging napulo ka tuig.
Ang ekonomikanhong kalamposan nagtagana usab sa mga Hapones sa daghang salapi ug mas daghang di-okupadong panahon nga gugolon. Kini nakapausbaw sa bag-ong pagkaylap sa sobrang paghunahuna sa kaugalingon, nga nahisupak sa nagasakripisyo-sa-kaugalingong kalagdaan sa trabaho ug sa espiritu sa pundok, nga wala maghatag ug ilhanan sa pag-us-os, nga sa kataposan magpasabot sa pagkahanaw sa milagro.
Walay sapayan kon kini mahitabo o dili, usa ka butang ang tino. Kita nagapuyo sa panahon sa walay-ingon tibuok-yutang mga suliran—politikanhon, militaryo, ekonomikanhon, silinganan, sosyal, relihiyoso, ug uban pa. Ang ekonomikanhong milagro sa usa ka nasod, bisan pag molahutay man ugaling, makasulbad ba niining tanang suliran? Dili. Ang gikinahanglan mao ang usa ka milagro nga tibuok kalibotan.
Ang 96,000 ka saksi ni Jehova sa Hapon nagasangyaw sa katawhan mahitungod nianang milagroha—ang Mesiyanikong Gingharian sa Diyos. (Mateo 24:14) Ilalom nianang Ginghariana, matuman ang giingon sa salmista mahitungod kang Jehova nga Diyos: “Imong ginabuklad ang imong kamot ug ginatagbaw ang tinguha sa tanang buhing butang.” (Salmo 145:16) Ang mga Saksi ni Jehova diha sa inyong dapit malipay sa pagpakig-ambit sa “maayong balita” kanimo aron ikaw mabuhi ug makapahimulos sa mga panalangin sa Gingharian nga duol nang moabot.