Gikan sa Among mga Magbabasa

Pagsagubang sa Pagkawalay Trabaho

Ang inyong artikulong “Kon Unsaon Pagsagubang sa Pagkawalay Trabaho” (Disyembre 22, 1984) epektibo kaayo sa pagtabang kanako sa pagmugnag trabaho alang sa akong kaugalingon. Nawad-an akog trabaho. Apan gikan sa mga sugyot nga gilista didto, mipalit akog bisikleta nga akong gigamit sa paghatod sa mga butang ngadto sa mga tindahan.

G. N. C., Nigeria

Tabang diha sa Tunghaan

Ako 13 anyos ang panuigon. Sa mga bulang milabay, may asaynment ako sa tunghaan sa pagpresentar ug mubong sinulat bahin sa mga insekto. Nabalaka ako tungod kay duha na lamang ka adlaw ang nabilin. Dayon akong nakita ang inyong artikulong “Mga Insekto​—Higala o Kaaway?” (Nobyembre 22, 1984) Midesider ako sa paggamit niining impormasyona. Miapresyar ang magtutudlo sa impormasyon sa inyong magasin ug gihatagan niya akog dakong grado. Salamat kaninyo sa pagprinta niadtong artikuloha.

D. P., Italya

Nagtrabahong mga Asawa

Human nakabasa sa inyong isyu bahin sa “Ang Kinitaan sa Asawa​—Takos ba sa Kabayaran?” (Hulyo 22, 1985), akong nasabot nga supak kamo sa mga asawang magtrabaho. Daotan ang pagpanagtag ug artikulong sama niini. Daw wala kamo masayod sa adlaw-adlawng mga kamatuoran. Ang suweldong madawat sa lalaki halos dili makasapar sa gastos sa pagpalakaw sa panimalay. Kon dili pa sa gamayng kantidad nga madala sa asawa sa panimalay, mabungkag ang kaminyoon.

F. R., Inglaterra

Among gidawat nga may mga panahong kinahanglang motrabaho ang asawa aron adunay dugang kita. Apan makahatag kinig dugang kalisdanan sa kaminyoon ug makaulang sa tukmang pagmatuto sa mga bata. Kining mga problemaha kinahanglang dawaton ug atubangon, sama sa gipakita sa among artikulong “Mga Magtiayong May mga Trabaho​—Ang Sekreto sa Kalamposan.” (Hulyo 8, 1985) Kinahanglang tinoon sa magtiayon ang ilang mga panginahanglan, banabanaon ang kabayaran, ug dayon maghimog ilang kaugalingong desisyon.​—ED.

Ang inyong mga artikulong ‘Mga Magtiayong May Trabaho’ (Hulyo 8, 1985 ug “Ang Kinitaan sa Asawa​—Takos ba sa Kabayaran?” (Hulyo 22, 1985) timbang kaayo sa ilang paagi ug sa mga sugyot bahin sa pagbati sa bana ug asawa sa panginahanglan sa trabaho aron makasarang sa pagkinabuhi. Nagkinaugalingon sa pagtrabaho ang akong bana ingong mangangayog makina sa panahi, ug karong bag-o iya akong gitudloan kon unsaon sa paghinlo ug sa paglana sa mga makina aron matagad niya ang mga pag-ayo. Nianang paagiha makadawat siyag daghang trabaho nga walay panginahanglan sa pagugol ug daghang panahon sa pagtrabaho, ug makatrabaho kaming duha diha sa balay. Tingali ang ubang mga bana nga nagkinaugalingon sa pagtrabaho makatudlo sa ilang mga asawa o ubang edad-edarang mga anak ug pipila ka makatabang nga bahin sa negosyo aron makakita sila ug dugang kuwarta samtang nagtinabangay sa pagtrabaho.

E. P., Texas

Bag-o ko pa lang nabasa ang artikulong “Ang Kinitaan sa Asawa​—Takos ba sa Kabayaran?” ug ang duha ka interbiyo. Sama sa inahan nga miundang sa iyang trabaho tungod kay nagkinahanglan siyag panahon uban sa iyang bata, ako usab nagtrabaho sa tulo ka bulan ug miundang ako tungod kay nakamatikod akog kausaban (dili alang sa kaayohan) sa akong duha ka gamayng mga anak nga lalaki. Karon ako adunay partaym nga trabaho ug makabilin sa among mga anak uban sa ilang amahan samtang ako magtrabaho.

D. C., Ohio