Usa ka Kalibotan nga Adunay Tanang Kasulbaran

“Ang paglaom nga malangan makapaguol sa kasingkasing, ang tinguha nga matuman mao ang kahoy sa kinabuhi.”—Proverbio 13:​12, The Jerusalem Bible.

ANG paglaom sa kasulbaran sa mga problema sa tawo nalangan sa unom ka libo ka tuig, ug minilyon ang nasubo tungod niini. Apan sa dili madugay ang tinguha nga matuman maoy usa ka kahoy sa kinabuhi. Ang mga hitabo karon nagpalig-on sa mga pulong ni Jesus: “Ihangad ninyo ang inyong mga ulo, tungod kay ang inyong kaluwasan haduol na.” (Lucas 21:​28) Ang usa ka kalibotan nga adunay tanang kasulbaran haduol na.

Apan, kami wala magpasabot sa kalibotan sa katawhan sa karon nga paagi sa pagmando ug sa pagkahikay. (Mateo 12:​32, King James Version) Hinunoa, ang kalibotan nga adunay tanang kasulbaran mao ang bag-ong sistema sa mga butang, nga gitawag sa Bibliya nga “bag-ong mga langit ug usa ka bag-ong yuta.” Gitudlo ni apostol Pedro ang atong adlaw sa pag-abot niini. Naghisgot siya sa tubigong kalaglagan sa daotang kalibotan sa mga adlaw ni Noe ug sa kalayonhong kalaglagan nga mopapha niining presenteng kalibotan sa dili diyosnong katawhan, ug dayon misugilon siya kon unsay mosunod: “Apan adunay bag-ong mga langit ug usa ka bag-ong yuta nga atong ginapaabot sumala sa iyang saad.” Ang iyang gipasabot mao ang Mesiyanikong Gingharian sa mga langit ug sa masinundanong mga sakop sa yuta. “Ug diha niini,” kita gipasaligan, “magapuyo ang pagkamatarong.”​—Isaias 65:​17; 2 Pedro 3:​5-13.

Karon, kinahanglang dawaton nga ang kadaghanan sa mga kasub-anan sa mga tawo karon maoy ginama sa kaugalingon. Makaarang sila sa pagwala sa kadaghanan niining mga kasamok, apan dayag nga dili sila makabuhat niini. Unsang presenteng problema, pananglitan, ang dili mapukan sa pagbuhat nga gisugo ni Jesus sa paghigugma sa imong silingan sama sa imong kaugalingon o sa pagtagad sa uban sama sa buot nimo nga maoy itagad sa uban kanimo? (Mateo 7:​12; 22:​39) Palandonga lang kon unsay mahimo unta sa mga tawo karon! Walay gubat, walay kanihit sa pagkaon, walay krimen, walay polusyon, walay mga droga, ug maingon man mawala ang ubang mga kalisdanan.

Bisan pa, nagpabilin ang ubang mga kalisdanan. Komusta ang kanaiyanhon tawhanong tendensiya sa tawo sa pagkasala? (Salmo 51:5) Ug ang pagkatigulang? Ug ang kamatayon mismo? Ang dangatan niini mao kini: Walay gahom ang tawo sa paghimo niini. Kini nagkinahanglan ug “gahom nga labaw sa kinaiyahan” alang sa tawo. Nagkinahanglan kini sa gahom sa Diyos.​—2 Corinto 4:7.

Nagkinahanglan kini sa pagtapos niining presenteng daang “mga langit” ug “yuta” ug puli niini mao ang gisaad “bag-ong mga langit ug usa ka bag-ong yuta.” Tagda ang mga pulong nga gidasig si apostol Juan sa pagsulat bahin niini nga kausaban: “Ug nakita ko ang bag-ong mga langit ug usa ka bag-ong yuta; kay ang unang yuta nawala na . . . Ug iyang pagapahiran ang mga luha gikan sa ilang mga mata, ug ang kamatayon wala, wala na usab unyay pagbalata, ni paghilak, ni kasakit.”​—Pinadayag 21:​1, 4.

Apan daghang sinserong mga tawo karon nalisdan sa pagdawat niining paglaoma. Daw sobra ra kaayo kining pamation. Dugang pa, gipahisalaag sa dili siyentipikanhong mga teoriya ug sa walay pagtuong mga klerigo nga nagsalikway sa paglalang ug mituo sa ebolusyon, ang ilang pagtuo sa Bibliya napaluya. Apan, kinahanglang hinumdoman nila ang duha ka butang: (1) Ang mga tawo dili makatagna sa umaabot, apan (2) ang Bibliya makatagna. Ang katakos sa Bibliya sa paghimo niini maoy pamatuod nga gikan kini sa Diyos, sama sa gipahayag sa Isaias 46:​9, 10: “Walay lain nga Diyos, ni may sama pa kanako; ang Usa nga nagpasundayag sa sinugdanan ngadto sa kataposan, ug gikan sa karaang mga panahon mga butang nga wala pa mahimo.”

Mihatag si Jesus ug daghang bahin nga ilhanan sa pag-ila sa panahon sa iyang presensiya ug sa kataposan niining sistema sa mga butang: mga gubat sa kalibotan, kanihit sa pagkaon, kamatay, mga tawo nangabalisa, kahadlok sa mga butang nga anaa sa unahan, tibuok-yutang paglutos sa iyang mga saksi, ug ang ilang pagsangyaw sa maayong balita sa Gingharian sa Diyos sa tibuok kalibotan ug ang ilang pagpalanog sa pasidaan sa umaabot nga kataposan niining dili diyosnong kalibotan. (Mateo, kapitulo 24; Marcos, kapitulo 13; Lucas, kapitulo 21) Kanang maong ilhanan, gitagna kapin sa 19 ka siglo kanhi, karon nakita na.

Si apostol Pablo nagtagna nga “sa kataposang mga adlaw moabot ang kritikal nga panahon nga malisod sagubangon. Kay ang mga tawo mga mahigugmaon sa kaugalingon, mga mahigugmaon sa salapi, tigpagawal, hambogiro, mapanamastamason, masukihon sa mga ginikanan, dili mapasalamaton, dili maunongon, walay kinaiyanhong pagbati, dili ikasabot, tigbutangbutang, walay pagpugong sa kaugalingon, mabangis, walay gugma sa pagkamaayo, mabudhion, gahig-ulo, mapahitas-on, mga mahigugmaon sa kalipayan inay sa Diyos unta hinoon, nagbaton ug diyosnong debosyon apan nagapanghimakak sa gahom niini; ug pahilayo gikan kanila.” (2 Timoteo 3:​1-5) Pagkatukma nga kabatbatan sa atong mga adlaw!

Si Pedro nagtagna nga “sa kataposang mga adlaw managpanungha ang mga mayubiton nga managyubit, nga magapahiuyon sa ilang mga pangibog ug magaingon: ‘Hain na man ang iyang saad sa iyang pag-anhi? Kay sukad sa pagkamatay sa among amahan, ang tanang mga butang nagapabilin man nga mao ra gihapon sukad sa pagkatukod sa kalibotan.’” (2 Pedro 3:​3, 4) Ang mga mayubiton karon masabang nagapamiaybiay, sa katumanan ning tagnaa.

Apan sukwahi sa ilang pangangkon, dili na sama sa kaniadto ang mga butang. Diha sa basahon sa Pinadayag, naghisgot si Juan bahin sa panahon sa kataposan sa pag-anhi ni Kristo ug magmando ingong kaubang Hari sa Soberanong Ginoo ug Hari si Jehova nga Diyos; sa dihang mangasuko ang kanasoran; sa dihang ang mga patay hukman ug ang mga propeta ug ang mga balaan gantihan; ug sa dihang “laglagon [sa Diyos] kadtong nagalaglag sa yuta.” (Pinadayag 11:​15-18) Wala pa sukad mahitabo nga malaglagong nahugawan ang yuta, o hingaping nanagyubit ang mga mabiaybiayon, o hingaping nagakaylap ang dunot nga pamatasan, ug bug-os natuman ang daghang bahin nga tagna nga gihatag ni Jesus.

Ang mga kahimtang diin ang kalibotan walay mga kasulbaran gitagna nga moabot niini nga kaliwatan. Gitagna usab ang kapakyasan sa kanasoran sa pagbaton ug kasulbaran alang kanila, “nga walay kasayoran sa lutsanan.” Apan ang ‘bag-ong mga langit ug usa ka bag-ong yuta’ nahibalo sa lutsanan ug tumanon kini, nga magalaglag usab sa satanasnong impluwensiya ug sa kamatayon mismo.​—Lucas 21:​25; 2 Corinto 4:​4; Hebreohanon 2:14.

Gitagna sa Bibliya ang mga kahimtang nga misakit karon niining kaliwatana, mga kahimtang diin walay mga kasulbaran ang kalibotan. Gitagna usab nga kining mga kahimtang magtimaan sa kataposan mga adlaw niining presenteng kalibotan. Bisan karon, daghang iladong mga eskolar ug mga siyentista nagpasidaan nga nagkaduol kining kalibotana sa iyang kataposan. Gitagna usab sa Bibliya ang ilhanan sa usa ka umaabot nga matarong bag-ong sistema sa mga butang. Kining mga tagnaa gisulat sa libolibo na ka katuigan kanhi ug karon ang katumanan niini nagpamatuod sa balaang pagdasig sa Bibliya​—ug aduna pay daghang pamatuod sa pagkakasaligan niining libroha alang sa mga mata nga andam sa pagsusi niini ug mga dalunggan nga andam sa pagpamati niini.a

Kasaligan ang Bibliya, kini dinasig, kini mao ang libro nga nagsugilon bahin sa usa ka kalibotan nga adunay tanang kasulbaran.

[Blurb sa panid 8]

Ang mga mayubiton karon masabang nagapamiaybiay

[Blurb sa panid 8]

Adunay daghang pamatuod alang sa mga mata nga andam sa pagsusi niini ug mga dalunggan nga andam sa pagpamati niini

[Kahon sa panid 7]

Dinasig nga mga Kasulbaran sa mga Problema sa Tawo

Walay gubat. “Iyang pahunongon ang mga gubat.” “Dili na gayod sila makakat-on pa mahitungod sa gubat.”​—Salmo 46:​9; Isaias 2:4.

Walay kanihit sa pagkaon. “Ang yuta magapatungha sa iyang bunga.” “Adunay abundang lugas sa yuta.”​—Salmo 67:​6; 72:16.

Walay sakit. “Walay molupyo nga moingon: ‘May sakit ako.’”​—Isaias 33:24.

Walay polusyon. “Laglagon kadtong nagalaglag sa yuta.”​—Pinadayag 11:18.

Walay krimen. “Dili nila pagadaotan ni pagagub-on ang akong bukid nga balaan.”​—Isaias 11:9.

Walay daotan. “Kon bahin sa daotan, sila pagaputlon gikan sa yuta.”​—Proverbio 2:22.

Walay pagkatigulang. “Ang iyang mga unod mabag-o labi kay sa unod sa bata; siya mahabalik sa adlaw sa kabaskog sa iyang pagkabatan-on.”​—Job 33:25.

Walay kamatayon. “Ang gasa nga ihatag sa Diyos mao ang kinabuhing walay kataposan.” “Mawala na ang kamatayon.”​—Roma 6:​23; Pinadayag 21:4.

Walay Satanas. “Ug iyang gidakop . . . si Satanas, ug gigapos siya sulod sa usa ka libo ka tuig.”​—Pinadayag 20:2.

Ang tawo mausab. “Hukasa ang daang pakatawo . . . isul-ob ninyo ang bag-ong pagkatawo.”​—Colosas 3:​9, 10.

Usa ka relihiyon. “Usa ka Ginoo, usa ka pagtuo, usa ka bawtismo.”​—Efeso 4:5.

Usa ka kagamhanan. “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. Ug ang gahom niana mahibilin sa lain nga katawhan. Apan kini magadugmok ug magaut-ot niining tanan nga gingharian, ug kini molungtad sa walay kataposan.”​—Daniel 2:44.

[Mga footnote]