Ang Maayong Balita nga Buot Nilang Madungog Nimo

SA DINHI pa si Jesus sa yuta, ang iyang mga tinun-an miduol kaniya ug nangutana: “Unsa man unya ang ilhanan sa imong presensiya ug sa kataposan sa sistema sa mga butang?” Siya mitubag nga aduna unyay mga gubat nga maglangkit sa daghang nasod, mga kanihit sa pagkaon, mga kamatay, mga linog, pag-uswag sa kalapasan, bakak nga relihiyosong mga magtutudlo nga magpahisalaag sa daghan, pagdumot ug paglutos sa iyang matuod nga mga sumusunod, ug pagkabugnaw sa gugma sa pagkamatarong diha sa daghang tawo. Inigsugod pagkahitabo niining mga butanga, magpaila kini sa dili-makitang presensiya ni Kristo ug nga ang langitnong Gingharian haduol na. Kini maoy talagsaon unyang balita—maayong balita! Busa gidugang ni Jesus kining mga pulonga ingong bahin sa ilhanan: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”—Mateo 24:3-14.

Ang di pa dugayng mga hitabo sa kalibotan maoy daotan mismo, apan ang kahulogan niini, sa ato pa, ang presensiya ni Kristo, maoy maayo. Ang mga kahimtang nga gihisgotan sa ibabaw nagsugod pagkahitabo nianang kaylap nga gimantalang tuig 1914! Nagtimaan kini sa kataposan sa Hentil nga Kapanahonan ug sa sinugdanan sa yugto sa kausaban gikan sa tawhanong pagmando ngadto sa Usa ka Libo ka Tuig (Milenyal) nga Pagmando ni Kristo.

Gipaila sa ika-110 nga SalmoSal, mga Sal 110 bersikulo 1 ug 2, ug sa Pinadayag 12:7-12 nga aduna unyay yugto sa kausaban. Gipakita didto nga si Kristo molingkod sa tuong kamot sa Diyos sa langit hangtod sa panahon nga mahimo siyang Hari. Dayon ang gubat sa langit moresulta sa pagkatambog ni Satanas sa yuta, nga magpahinabog kaalaotan sa yuta, ug si Kristo magmando taliwala sa iyang mga kaaway. Ang bug-os nga kataposan sa pagkadaotan moabot pinaagi sa usa ka “dakong kasakitan,” nga mosangko sa gubat sa Armagedon ug sundan sa Usa ka Libo ka Tuig nga Pagmando ni Kristo sa pakigdait.—Mateo 24:21, 33, 34; Pinadayag 16:14-16.

“Apan hibaloi kini,” ang Bibliya nag-ingon, “nga sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, magmahigugmaon sa salapi, mapagawalon, mapahitas-on, mapasipalahon, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo, mga mahigugmaon sa kalipayan inay nga mga mahigugmaon sa Diyos, nga nagbaton sa dagway sa diyosnong pagkamahinalaron apan nagpanghimakak sa gahom niini; ug magpahilayo ka kanila.”—2 Timoteo 3:1-5.

Ang uban mangatarongan tingali nga kining mga butanga nahitabo kaniadto sa tawhanong kasaysayan, apan ang tinuod mao nga, wala pa gayod kini mahitabo sa samang gilapdon. Sumala sa giingon sa mga historyano ug mga komentarista, wala pa gayoy panahon sukad sa yuta sama sa panahon nga nasinati sukad sa 1914 padayon. (Tan-awa ang panid 7.) Ang mga kaalaotan mas kaylap pa kay sukad masukad. Dugang pa, mahitungod sa ubang mga bahin sa ilhanan ni Kristo sa kataposang mga adlaw, kining mga kamatuorana kinahanglang konsiderahon: Ang tibuok-yutang pagmantala sa presensiya ug Gingharian ni Kristo gihimo sa gilapdon nga wala pa mahimo sukad sa kasaysayan. Ang paglutos tungod sa pagsangyaw wala pa gayod hitupngi nianang gipahamtang nganha sa mga Saksi ni Jehova. Gatosan kanila ang gipamatay diha sa mga kampo konsentrasyon sa Nazi. Hangtod karon ang mga Saksi ni Jehova ginadili pa diha sa pipila ka dapit, ug sa ubang mga dapit sila gipangdakop, gipamilanggo, gipaantos, ug gipamatay. Kining tanan maoy bahin sa ilhanan nga gihatag ni Jesus.

Sumala sa gitagna sa Pinadayag 11:18, “ang kanasoran nangapungot” batok sa matinumanong mga Saksi ni Jehova, ug nagpakita kini nga ang “kapungot” ni Jehova ipahayag batok nianang mga nasora. Kining mao gihapong kasulatan nag-ingon nga ang Diyos ‘magalaglag niadtong nagalaglag sa yuta.’ Sukad masukad wala pa gayod mahitabo sa tawhanong kasaysayan nga nameligro ang kapasidad sa yuta sa pagsustenir sa kinabuhi. Apan, karon lahi na ang kahimtang! Daghang siyentipiko ang nagpasidaan nga kon ang tawo magpadayon sa paghugaw sa yuta, kini dili na unya kapuy-an. Apan si Jehova “nag-umol niini aron pagapuy-an,” ug iyang wagtangon ang mga tawong naghugaw niini una pa nila bug-oson ang paglaglag sa yuta.—Isaias 45:18.

YUTAN-ONG MGA PANALANGIN ILALOM SA GINGHARIAN

Ang ideya nga ang mga tawo magpuyo sa yuta ingong mga sakop sa Gingharian sa Diyos morag katingad-an tingali para sa daghang magtutuo sa Bibliya kinsa naghunahuna nga ang tanang maluwas moadto sa langit. Gipakita sa Bibliya nga limitado lamang nga gidaghanon ang moadto sa langit ug kadtong mabuhi sa walay kataposan dinhi sa yuta maoy usa ka dakong panon nga walay limite ang gidaghanon. (Salmo 37:11, 29; Pinadayag 7:9; 14:1-5) Gipakita sa usa ka tagna sa basahon sa Bibliya sa Daniel nga ang Gingharian sa Diyos ilalom kang Kristo magpuno sa yuta ug magmando niana.

Ang Gingharian ni Kristo gihawasan didto ingong bato nga gisapsap gikan sa samag-bukid nga pagkasoberano ni Jehova. Kini mohapak ug molaglag sa usa ka larawan nga naghawas sa gamhanang mga nasod sa yuta, ug “ang bato nga mihapak sa larawan . . . nahimong usa ka dakong bukid ug gipuno niini ang tibuok yuta.” Ang tagna nagpadayon: “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.”—Daniel 2:34, 35, 44.

Kining maong Gingharian ug ang gipaluyohan sa Kasulatan nga paglaom sa kinabuhing walay kataposan diha sa hininloan ug gipanindot nga yuta mao ang buot ipahibalo kanimo sa mga Saksi ni Jehova. Milyonmilyon karon nga buhi ug milyonmilyon pa nga karon anaa sa ilang mga lubnganan ang makabaton ug kahigayonan nga magpuyo diha niana sa walay kataposan. Unya, ilalom sa Usa ka Libo ka Tuig nga Pagmando ni Kristo Jesus, ang orihinal nga katuyoan ni Jehova sa paglalang sa yuta ug pagbutang sa unang magtiayon diha niana mamatuman. Kining yutan-ong Paraiso dili gayod mahimong laay. Sama ra nga si Adan gihatagan ug buluhaton diha sa tanaman sa Eden, ang katawhan usab aduna unyay makaiikag nga mga proyekto sa pag-atiman sa yuta ug sa mga tanom ug mananap diha niana. Sila “magpahimulos gayod sa buhat sa ilang mga kamot.”—Isaias 65:22, Revised Standard Version; Genesis 2:15.

Daghang kasulatan ang mahimong kutloon sa pagpakita sa mga kahimtang nga maglungtad sa dihang ang pag-ampo nga gitudlo ni Jesus kanato matubag: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Apan, igo na una kining tekstoha sa pagkakaron: “Nadungog ko ang usa ka makusog nga tingog gikan sa trono nga nag-ingon: ‘Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.’ Ug ang Usa nga naglingkod sa trono miingon: ‘Tan-awa! Ginabag-o ko ang tanang butang.’ Dugang pa, siya nag-ingon: ‘Isulat kini, tungod kay kining mga pulonga kasaligan ug matuod.’”—Pinadayag 21:3-5.

[Blurb sa panid 15]

“Makuyaw nga mga panahong lisod sagubangon,”

APAN “unya moabot ang kataposan”

[Hulagway sa panid 18]

Netherlands

[Hulagway sa panid 18]

Nigeria