Ang Hunahuna sa Bibliya . . .

Mga Horoskopyo—Makatabang kun Makadaot?

ANG usa ka ginang sa panimalay mosugod sa iyang inadlawng mga buluhaton pinaagi sa pagbasa sa lindog nga “Imong mga Bituon” sa mantalaan. Ang usa ka tigbaligyag aksiyones motelepono sa iyang astrologo una makignegosyo. Ang usa ka sugarol sa karerahan magkupot sa linukot nga kuwarta sa usa ka kamot, ug sa lain, sa librong How to Play the Horses Horoscopically. Ang mga bituon sa dula, mga politiko, ug daghan pang uban matinumanong mokonsulta sa ilang mga kapalaran sa dili pa mohimog desisyon.

Ang mga posisyon ba sa mga bituon, mga planeta, bulan, ug adlaw sa pagkatawo sa usa ka tawo sumala sa pagkalaraw niana sa mga astrologo mag-apektar sa imong kinabuhi? Minilyon karong adlawa nagtuo nga kana mag-apektar. Busa tingali mahibulong ka:

Ang mga Horoskopyo Tinuod Bang Makatabang?

Oo, motubag ang masibotong mga sumusunod. Nganong kana ang ilang pagbati? Mipatin-aw ang usa ka tawo: “Ako nagabasa sa akong horoskopyo kada adlaw . . . ug ako moingong mga 80 porsiento sa panahon ang mga butang gisulti kanako misangpot nga tinuod.” Oo, ilang gibati nga ang mga tubag, o labing menos mga giya sa pagsulbad sa ilang mga suliran, hikaplagan diha sa mga horoskopyo.

Ugaling, ang mga lindog sa horoskopyo ba diha sa mga mantalaan ug magasin tinuod makatabang? Matikdi ang gisulat sa iladong astrologo si Alexandra Mark diha sa iyang librong Astrology for the Aquarian Age: “Ang maong mga mabasa . . . halos walay purohang mapadapat sa usa ka tawo gawas ipasukad sa pagkaatol. Apan ang gahom sa sugyot dili mahimong hikalimtan.” Hunong ug pamalandong, buot ba nimong ang imong kinabuhi giyahan sa yanong pagkaatol o sa gahom lamang sa sugyot?

‘Apan,’ tingali mangutana ka, ‘ang paglaraw ba sa personal nga horoskopyo nga ipasukad sa eksaktong panahon ug dapit natawhan sa usa labi pang tukma?’ Ang maong pagtuo dayag gipasukad sa ideya nga sa usa ka paagi ang langitnong mga butang mag-impluwensiya ug dako sa mga kinabuhi sa katawhan. Apan sa unsang paagi matuod kini tungod sa lagyo kaayong mga distansiya tali sa mga planeta ug sa yuta? Gipadayag sa mga siyentipiko nga ang epekto, kon duna man, sa mga langitnong butang diha sa mga tawo maoy diyutay ra kaayo. Ngani, ang pasikaranan mismo nga niana gihulma ang astrolohiya, nga ang yuta mao ang sentro sa uniberso ug ang adlaw ug mga planeta nagabiyo niana, maoy bakak.

Bisan pag kaduhaduhaan ang pagkamakatabang sa mga horoskopyo, maayong atong isukna ang labi pang hinungdanong pangutana:

Makadaot ba ang mga Horoskopyo?

Oo, kana sila makadaot. Inigbasa nimo sa mga lindog sa horoskopyo, anaa ang kapeligrohang mawad-an ka sa katakos sa paghimog makahuloganong mga desisyon, o sumala sa pagpahayag niana sa astronomong si Roger Culver: “Ang kapeligrohan mao nga makapasangil ka—gibuhat ko kadto tungod sa mga bituon.” Matuod, ang usa ka tawo tingali mobasa lamang sa mga lindog tungod kay kana makalingaw, apan pananglitan ang usa ka hitabo sa iyang kinabuhi naatol sa butang iyang nabasa sa horoskopyo. Dili ba kaha nga siya sa malalangon maagak sa pagtuo nga adunay kamatuoran ang mga panagna sa horoskopyo? Siya matental kaha nga dulot pang malangkit sa astrolohiya?

Kon mao, mahimong mahitabo ang butang labi pang seryoso. Ang butang misugod ingong dili-makadaot nga pagkamausisaon mamahimong usa ka batasan nga magalapas sa gipamulong sa Diyos nga Labing Gamhanan. Ang karaang mga Israelinhon gisultihan ni Jehova nga Diyos nga iyang gidumtan ang bisan unsang matang sa panagna, apil ang pagsalig sa langitnong mga butang.

Sa pagpakita sa tukma kon unsa ka seryoso kana, ang Bibliya nagaingon: “Kon may hikaplagan sa taliwala mo sa usa sa imong mga siyudad nga ginahatag kanimo ni Jehova nga imong Diyos nga usa ka lalaki o usa ka babaye nga nagabuhat sa daotan sa mga mata ni Jehova nga imong Diyos nga magalapas sa iyang tugon, ug siya magaadto ug magaalagad sa ubang mga diyos ug magayukbo kanila o ngadto sa adlaw o sa bulan o sa tibuok panon sa kalangitan, usa ka butang nga wala ko isugo, ug gipahibalo kini kanimo ug nakadungog ka niini ug nakasusi ka niini sa bug-os, ug, tan-awa! ang butang napamatud-an, kining dulumtanang butang gibuhat sa Israel! pagadad-on mo usab sa gawas kanang lalakiha o babayhana nga nagbuhat niining butang daotan ngadto sa imong mga ganghaan, oo, ang lalaki o ang babaye, ug pagabatohon mo siya sa mga bato, ug siya mamatay gayod.”—Deuteronomio 17:2-5.

Nganong ginadumtan man sa Diyos ang paggamit sa adlaw, bulan, ug mga bituon ingong mga tilimad-on? Nahauna, kana supak sa iyang katuyoan sa paglalang kanila. (Genesis 1:14-18) Kita kinahanglang mosalig sa Maglalalang, dili sa linalang, alang sa giya. (Roma 1:25) Ikaduha, ang Diyos kinahanglang mag-okupar sa linaing dapit sa atong kinabuhi. Ang pagsimba kaniya dili ipakig-ambit sa laing tawo o butang. (Deuteronomio 4:24) Ang usa ka tawo mahimong mosalig kaayo sa iyang horoskopyo nga ang nipis nga linya tali sa pagsalig ug pagsimba tingali malabang. Ikatulo, kana mahimong magbukas sa ganghaan paingon sa okultismo. Ug ang pagduladula sa okultismo basin maghimo sa tawong wala matahap nga sayon nga target sa labaw-tawhanong gahom luyo sa okultismo—ang mga demonyo. (Itandi ang Deuteronomio 18:9-12; Isaias 47:12-14; Buhat 16:16-18.) Aron masanta ang atong pagkalangkit nga peligroso sa mga horoskopyo, ang Diyos nagatagana kanato sa butang mas maayo:

Superyor nga Giya

Gitagana ni Jehova nga Diyos ang iyang Pulong, ang Bibliya, nga sa kanunay kasaligan. Siya nagapasalig kanato: “Sa ingon niini mao man ang akong pulong nga magagula gikan sa akong baba. . . . Kini molampos nianang tungod niana kini akong gipadala.”—Isaias 55:11.

Ugaling, kinahanglan ang paningkamot sa atong bahin sa pagsusi sa Pulong sa Diyos ug pagkuha sa tino nga tambag. Kana ang gibuhat sa makinaadmanong Haring Solomon: “Kay kining tanan akong gibutang sa akong kasingkasing, ang pagsusi niining tanan, nga ang mga matarong ug ang mga makinaadmanon ug ang ilang mga buhat anaa sa kamot sa matuod nga Diyos.” (Ecclesiastes 9:1) Busa, inay magpagiya sa kurog nga kamot sa horoskopyo sa astrologo, ibutang ang imong pagsalig sa kusgan nga kamot ni Jehova nga Diyos.

[Kahon sa panid 18]

“Ang katawhan nalibog. Buot nila ang tabang sa paghimog mga desisyon maylabot sa panalapi, personal nga mga relasyon ug panarbaho. Ang relihiyon wala magtagana sa panginahanglan sama sa gibuhat niini sa nangagi ug ang sikyatriya may mga limitasyon. Busa . . . sa paningkamot nga sila mahilangkit sa butang mopatim-awng may siyentipikanhong posibilidad [sila] miliso sa mausbawon ngadto sa astrolohiya.”—Dr. Alan Rosenburg, sikyatrista, Nature/Science Annual.

[Kahon sa panid 19]

Ang Komite sa Siyentipikanhong Imbestigasyon sa mga Pangangkon sa Paranormal, sa Nobyembre 16, 1984, misugyot sa pagpatik niining pagpanghimakak uban sa tanang lindog sa horoskopyo: “Ang mosunod nga mga panagna sa astrolohiya pagabasahon alang lamang sa kalingawan. Ang ingong mga panagna walay kasaligang pasikaranan sa siyentipikanhong kamatuoran.”