Gikan sa Among mga Magbabasa
Malipayong mga Pamilyang May Hinablos
Buot kaming mopasalamat kaninyo sa mga artikulo ilalom sa “Mga Batan-on Nangutana . . . ” bahin sa pagtukod sa pamilyang may hinablos. (Oktubre 8, Oktubre 22, Septiyembre 8, 1985) Sa miaging duha ka tuig naminyo pag-usab ang akong mama, ug nabalaka ako sa sinugdanan. Nakatabang ang inyong mga artikulo sa pagtimbangtimbang sa akong mga pagbati ug sa pagtan-aw kon unsay akong mahimo aron makaamot sa pagbaton ug nahiusang pamilyang may hinablos. Akong nasayran nga mahimong malig-on ang pamilyang may hinablos sama sa usa ka tinuod nga pamilya.
B. A. (edad 11), Colorado
Bokasyonal nga Giya
Di pa dugay, ingong superintendente sa tunghaan, gidapit ako sa direktor sa usa ka kolehiyo sa probinsiya sa sekondaryong edukasyon aron makabahin sa mga serye sa una-bokasyonal nga mga pakigpulong nga ginahatag sa mga propesyonal niining dapita sa 40 ka batan-on nga magsugod sa pangunang kurso sa Nobyembre ug karon anaa sa malisod nga yugto sa pagpilig karera. Alang sa akong pakigpulong, nga kapin sa usa ka oras, akong gikuha ang tanang impormasyon gikan sa upat ka gula sa Pagmata!, ilabina sa mga artikulong “Moeskuyla o Magtuon ug Kapangabuhian?” (Abril 22, 1985) ug sa “Mga Batan-on Nangutana . . . Unsaon Nako sa Pagpilig Karera?” (Agosto 22, 1985) Gipahalipayan ako sa mga magtutudlo ug sa direktor sa kolehiyo tungod sa tin-awng pagpahayag ug sa pagkapraktikal sa mensahe. Apan, gibati ko nga alang sa inyong magasin ang pasidunggog, nga makalig-on ug matudloon.
J. E. C., Honduras
Mga Magtiayong May Trabaho
Ingong asawang nagtrabaho, buot kong isulti nga ang artikulong “Mga Magtiayong May Trabaho—Ang Yawi sa Kalamposan” (Hulyo 8, 1985) maayo gayod kaayo. Dili gayod ako makasabot kon nganong malisod alang sa ubang mga lalaki sa pagtabang sa mga buluhaton sa balay. Natabangan ako sa artikulo sa dugang nga pagsabot kon sa unsang paagi ang pipila ka butang nga dili kinaiyahan alang sa usa molabay lamang nga dili mamatikdan. Pananglitan, sama sa makitang lababo nga puno sa wala kahugasing mga plato samtang nanglaba ako. Akong gibati nga tungod kay gibasa man namog dungan sa akong bana ug ako ang artikulo kini nakahimo kanamo sa pagsultihanay (dili panaglalis) sa paghimog kahikayan nga mopauswag sa kahimtang. Daghang salamat gikan kanamong duha.
V. S. P., Brazil
Pangunang mga Kolor
Sa inyong maayong artikulong “Pagpapuliki sa Gagmayng mga Kamot” (Hulyo 8, 1985) may gipahayag nga ang pangunang mga kolor mao ang pula, dalag, ug asul. Sa laktod, ang pangunang mga kolor mao ang pula, berde, ug asul. Nasayod ako nga giisip sa kadaghanang mga pintor nga ang pula, dalag, ug asul mao ang pangunang mga kolor, apan sa tinuod kini sila maoy subtractive primaries, nga lahi sa additive primaries nga pula, berde, ug asul.
B.C.S., California
Sumala sa “The Concise Columbia Encyclopedia,” kon magpatunghag mga epekto sa kolor sa kahayag, “ang mga sidlak sa kahayag isagol, ug ang pula, asul, ug berde ang pilion ingong mga pangunang mga igbubulok. Apan, ang mga kolor, nga isagol sa ‘subtractive’ nga paagi, pananglitan, pinaagi sa pagsuhop sa wavelengths o sukod sa balod, pilion sa mga pintor sa katibuk-an ang pula, asul, ug dalag ingong ilang pangunang mga kolor.” Sa pagpatunghag nagkalainlaing mga kolor sa pagkolor sa minasa, isagol ang pangunang mga igbubulok nga pula, asul, ug dalag.—ED.