Gikan sa Among mga Magbabasa
Pag-abuso sa Bata
Salamat kaninyo sa isyu bahin sa pag-abuso sa bata. (Hulyo 22, 1985) Seguro ako nga makatabang kini sa daghang ginikanan sa pagpanalipod sa ilang mga anak niining daotang sistema sa mga butang. Wala gayod ako tambagi sa akong mga ginikanan bahin sa sekso. Dihay usa ka higayon nga giabusohan ako sa sekso sa akong kauban sa klase nga magulang kanako. Karon bisag 28 anyos na may problema gihapon ako sa hunahuna bahin niadto. Maayo pa unta ug may impormasyon ako niining mga artikuloha kaniadto.
R. S., Brazil
Walay Pagbating mga Artikulo?
Buot kong masayod kamo kon unsay akong gibati bahin sa inyong artikulo mahitungod sa sirkunsisyon sa babaye lakip sa ubang susamang mga artikulo nga migula sa miagi. Buot kong malikayan ang kasakit nga akong gibati sa pagbasa sa hilabihan ka pintok nga mga artikulo. Kinahanglan bang basahon nato kining mga butanga, sama sa artikulo nga gihisgotan o sa asoy sa pagsakit sa mga kampong konsentrasyon? (“Gikan sa Kamatayon Ngadto sa Kinabuhi sa Dachau,” Hulyo 8, 1985) Dili ba supak kini sa tambag sa Filipos 4:8, nga kita kinahanglang magpadayon sa pagpalandong sa mga butang nga matarong, maligdong, hiligugmaon, dalayegon?
B. D., Canada
Kami walay tinguha sa pagsilo sa pagbati sa tanan namong mga magbabasa. Dawaton namo nga ang pila ka artikulo dili makalipayng basahon, apan adunay mga kamatuoran sa kalibotan nga kinahanglang atubangon sa mga tawo, o giatubang karon, o pagaatubangon pa. Among gibati nga among katungdanan ang pagpahayag sa impormasyon niining mga ulohana alang sa ilang kaayohan. Walay usa sa mga artikulo nga nagapahayag kamig wala kinahanglana, klarong mga detalye aron madani sa paukyab, sa mabangis, makalilisang, o malaw-ay. Naningkamot kami sa pagpadayag ug maligdong, makatabang nga solusyon sa ingon nga mga ulohan, ug uban kanunay sa malig-ong baroganan sa kon unsa ang matarong. Naningkamot usab kami sa paghatag makadasig ug makalig-ong tambag. Diha sa among artikulo mahitungod sa sirkunsisyon sa babaye, naghatag kami ug igong impormasyon aron kadtong buot masayod makasabot kon unsay ginahisgotan ug aron ayran sa tanan ang pakigbahin niining buhata.
Kita adunay panig-ingnan sa dinasig nga Pulong sa Diyos, ang Bibliya, nga prangka kaayo ug espisipiko kon gikinahanglan. Tan-awa ang mga kapitulo 19, 34, 39 sa Genesis; Levitico 15:16-33; 18:19-24; Maghuhukom kapitulo 19; 2 Samuel kapitulo 13; Jeremias 5:7-9; Ezekiel kapitulo 23. Walay bisan usa niining nga mga kabatbatan may katuyoan sa paggilok sa galamhan o sa pagsilo sa mga pagbati, kondili sila nagaalagad ug kinahanglanon, mapuslanon, ug sa makalig-ong katuyoan.—ED.
Nagsulat ako kaninyo sa pagpahayag sa akong apresasyon sa inyong artikulong “Gikan sa Kamatayon Ngadto sa Kinabuhi sa Dachau.” Nakahibalag akog tawo nga nasakit kaayo sa iyang naagian sa Dachau ug sa kamatuoran nga adunay mga tawo sa Canada nga miingon nga dili tinuod ang kaugdawan sa kinabuhi. Mikuha siya niadtong isyuha ug gibasa kadto. Siya miuyon nga ang gisulat tinuod, gawas lamang nga iyang gisayloan ang daghang kaayong makalilisang nga mga butang. Iyang gipahayag ang dakong pagdumot batok sa iyang mga tigsakit, busa akong gitudlo ang tambag ni Else: “Ayaw sila pagdumti. Dili ka makasakit kanila. Sakiton mo lamang ang imong kaugalingon!” Karong bag-o nahupay ug diyutay ang pagdumot niining tawhana. Ang iyang asoy nakatabang sa daghan sa pagkaplag paglaom ug kadasig.
D. R., Canada
Ilabinang natandog ako sa akong gibasa ang artikulong “Gikan sa Kamatayon Ngadto sa Kinabuhi sa Dachau.” Naluoy ako kaniya. Nalipay ako nga milampos ra siya, salamat kang Else! Kita mahinamon kaayo sa adlaw sa dihang taposon sa Diyos ang tanang pagkadaotan sa yuta diin sayop nga ginabasol siya sa mga tawo. Salamat kaninyo sa usa ka makawiwili nga magasin.
S. V. A., Zimbabwe