Gikan sa Among mga Magbabasa

Pag-abuso sa Bata

Sa akong hunahuna ang inyong mga artikulo bahin sa “Pag-abuso sa Bata” (Hunyo 22, 1985 sa Cebuano) nakahimog labawng kadaot kay sa kaayohan. Miingon mo nga ang mga ginikanan angay magsulti sa ilang mga anak bahin sa “sayop nga mga bahin” sa ilang lawas nga angay dili hikapon sa mga estranghero. Sa akong hunahuna kini mohatag sa mga bata ug bug-os dili-kinaiyanhong ideya sa ilang lawas mismo. Dili ba sila magmasulob-on ug mahadlok bahin sa seksuwalidad inigkadagko nila? Ang mga bata nasayod nga kinaiyanhon kon unsay daotan ug dili kinahanglang sultihan.

S. Aa. N., Denmark

Kon ang mga bata sultihan sa hustong paagi nga ang pila ka bahin sa ilang lawas maoy pribado ug dili angay hikapon sa ubang tawo, dili kini mohatag kanilag dili-kinaiyanhong ideya sa ilang lawas mismo. Kini dili mopugong sa maayong panghunahuna sa ilang seksuwalidad samtang kana maugmad, kondili kana makapanalipod sa bata sa pag-abuso. Ang pag-abuso, dili ang tukmang instruksiyon, ang mohatag ug seksuwal nga mga kahadlok. Ang paghatag ug tukmang instruksiyon sa mga bata ning paagiha gisugyot sa halos tanang awtoridad sa ulohang pag-abuso sa bata.—ED.

Salamat kaayo sa artikulo bahin sa pag-abuso sa bata. Kadto kahibulongan gayod nga paghisgot, nga prangka ug matinud-anon. Ingong biktima sa maong mahakogong krimen, ako gisakit sa daghang pagbati. Ang maong mga artikulo nakabulig kanako sa pagsagubang. Ako nalipay kaayo nga inyong gipasiugda nga kinahanglang hisabtan sa mga bata nga walay mausa ang may katungod sa paghikap kanila sa dili-tukmang paagi. Kana nakaluwas unta kanako gikan sa makalilisang nga kasinatiang akong naagoman. Ang inyong artikulo nakatabang sa akong bana ug kanako sa paghisgot niini sa bug-os uban sa among mga anak.

T. C., Ohio

Ako 13 anyos ug usa ka batang babaye. Ako giabusohan sa daghang katuigan. Buot kong pasalamatan kamo tungod sa inyong isyu bahin sa pag-abuso sa bata. Kana nakatabang kanako sa pagsugid sa akong mga ginikanan. Karon mihunong na ang pag-abuso. Ang inyong artikulo nakaluwas sa akong kinabuhi tungod kay hapit na akong magpatay sa akong kaugalingon. Ako wala masayod kon unsay buhaton. Ako nahadlok kaayo.

H. H., Tennessee

Pagkaplag ug Kalipay

Sa inyong isyu sa Agosto 22, 1985 (sa Cebuano), inyong gipadayag ang usa ka hulagway sa matuod nga mga kalingawan. (panid 8). Naapil mao ang hulagway sa usa ka lalaking nagtudlo sa usa ka bata sa pagpangisda. May kalainan ba ang pagpangisda ingong dula ug pagpangisda alang sa kalingawan?

W. H., Alabama

Wala gayod namo tuyoang idasig ang pagpangisda alang sa yanong dula. Among nahanduraw nga ang apohan sa bata sa daghang katuigan nangisda alang sa pagkaon sa pamilya. Sa maong panahon siya nagtudlo sa iyang apo sa kahanas sa pagbutang sa paon sa taga, pagpangisda, ug lagmit kon unsaon paglimpiyo sa isda. Ang apohan ug apo nagkalipay sa maong yanong kasinatiang ilang giambitan, sa daplin sa tubig sa silong sa landong sa usa ka kahoy sa init nga adlaw sa ting-init. Wala namo makita nga giilustrar nga ang tawo nagtudlo sa bata sa kalalim sa pagpangayam ug sa pakig-away, ug garbo sa nasikop ug sa tropeyo sa kataposan, nga maoy malangkit sa pagpangisda ingong dula.—ED.

Salamat kaayo sa isyung “Kalipay—Kon Unsay Gikinahanglan sa Pagkaplag Niini.” (Agosto 22, 1985 sa Cebuano) Kini dunay espesyal halalom nga pagsabot nga nagapaila sa usa ka artikulo ingong talagsaon. Ang kalipay tinong masukod pinaagi sa determinasyong makigkomunikar ug makig-ambit. Kining artikuloha tinong mobulig kanatong tanan sa pagpangitag kahigayonan sa paghatag ug pagpakig-ambit sa atong panahon sa usag usa.

S. N., Inglaterra