Pagpaniid sa Kalibotan

Pornograpiya ug Panglugos

Ang dili pa dugayng mga pahayag diha sa mga bista sa Pederal nga Komisyon sa Pornograpiya sa U.S. nagpakita nga komung kasinatian ang paglugos sa kababayen-an sa Amerika kay sa gidahom. Nagpamatuod usab ang mga tigdukiduki nga ang mapintas nga pornograpiya adunay bahin sa pagdasig sa paglugos. Si Evelina Kane, sakop sa hunta sa National Coalition on Television Violence, nga naghawas sa “Kababayen-an Batok sa Pornograpiya,” miingon: “Ang dakong bahin sa ginabun-og nga kababayen-an ug giatake sa sekso mingdangop kanamo diin may bahin ang pornograpiya sa pag-abuso.” Ang mga pagtuon ni Propesor Edward Donnerstein sa University of Wisconsin nagpakitag pagsaka sa pagkamainandamon sa mga estudyante sa paglugos ug mga babaye human makakitag mapintas nga pornograpiya, popular mapintas makahahadlok nga mga salida, ug mga salida nga walay seksuwal nga kapintasan batok sa kababayen-an.

Makalilisang nga Surbi

Ang mga resulta sa surbi nga gihimo sa Family Planning Perspectives nagpakita nga dakong porsentahi sa dili minyo nga kababayen-an sa ilang panuigong 20 aktibo sa seksuwal nga mga kinabuhi. Sumala sa surbi nga gihimo sa 48 ka kasikbit nga mga estado sa Tinipong Bansa, 82 porsiento sa 1,314 ka babaye nakigbahin niining surbiha nakigsekso sa pila ka higayon, samtang 53 porsiento miadmiter nga nakigsekso sa yugto sa bulan nga gihimo ang aktuwal ang surbi.

Tibuok Yuta nga Kakulangan sa Tubig

Ang makalilisang nga larawan sa kagutom ug kamatayon nga gipahinabo sa grabeng hulaw sa Aprika “maoy pasiuna lamang sa mga butang nga umaabot,” mipasidaan ang bag-ong pagtuon sa Worldwatch Institute, usa ka organisasyon sa pagdukiduki nga sa Washington ang sukaranan. Gawas kon gamiton ang kinaraan ug episyenteng paagi sa naglungtad nga mga tuboran sa tubig, sulod sa mosunod nga 20 ka tuig ang dato ug nagakaugmad nga kanasoran dili makatagana sa ilang panginahanglag tubig. Ang pagtuon, “Pagdaginot sa Tubig: Ang Wala-magamit nga Kapilian,” miingon: “Pinaagi lamang sa pagdumala sa panginahanglag tubig inay sa walay puas nga pagtagana niana, nga malaoman ang tinuod segurado ug makabuhing tubig sa umaabot.”

Hinungdanong mga Tambal

Gikan sa kapin sa 25,000 ka tambal nga ginabaligya sa tibuok yuta, “mga 200 ka tambal ug mga bakona ang bililhon—nga gikinahanglan sa pagsumpo ug sa pagtambal sa kadaghanang mga sakit sa kalibotan,” mitaho ang magasing World Health. “Tinuod, kubos sa 50 ka tambal ang gikinahanglan batok sa mananakod ug parasito nga mga sakit, bisan tuod ang mga sakit nga maoy hinungdan sa kamatayon, sumala sa banabana sa World Bank, maoy 40 porsiento lamang sa Ikatulong Kalibotan.”

Daotang Panag-uban

“Ang mga batang lalaki ug babaye daling mahimong delinkuwente kon may delinkuwente silang mga higala,” mitaho ang Research and Planning Unit sa British Home Office. Ang surbi sa mga delinkuwenteng tin-edyer nag-ingon nga ginabale-wala sa mga ginikanan ang kapeligrohan sa pagpakighigala uban sa mga delinkuwente. Dos tersiya sa mga tin-edyer nga giinterbiyo may mga higalang nalangkit sa ilegal nga kalihokan sa miaging tuig. Ang usa ka butang may kalabotan sa problema sa delinkwensiya, sumala sa The Times sa London, mao ang “pagkawalay suod nga relasyon sa amahan.” Ang kataposan sa 10 ug 15 ka tuig nagpakakitag dakong kausaban sa sumbanan sa panimalaynong kinabuhi—misaka ang mga diborsiyo, usay-ginikanan nga pamilya, ug nagtrabahong mga inahan—nga nakapahimo sa ‘batan-on nga daw mas maiyaiyahon kon itandi niadtong unang mga kaliwatan,’ miingon ang taho.