Kalinaw Diha sa Pamilyang May Hinablos

• ‘Amaama gikatahong nawad-ag pailob ug nagbunal sa iyang batan-ong hinablos nga lalaki hangtod namatay.’

• ‘Tin-edyer nga babaye nagpatay sa iyang amaama tungod sa iyang pagwarawara sa rebolber,’ sumala sa taho sa kapolisan.

• ‘Katorse-anyos nga batang lalaki gipusil sa inaina, kinsa gikatahong wala na makaagwanta sa iyang kagawian.’

“ANG mga panimalay nga may hinablos mahimong labing lisod nga mga dapit,” mipatin-aw si Dr. John Visher, kaubang-magtutukod sa Stepfamily Association of America. “Kon ang katawhan mosulod sa relasyon uban ang dili-matinud-anong mga pagdahom, lagmit sila moreklamong sila nailalom sa dakong kapit-osan.” Tungod sa nagsulbong nga mga proporsiyon sa diborsiyo, midaghang dramatikanhon ang mga pamilyang may hinablos. Apan ikasubo, 44 porsiento niini mapakyas sulod sa unang lima ka tuig! Bisan pa niana, daghan nakasagubang sa linaing mga suliran sa paghiusa sa duha ka pamilya. Bililhon ang pagpadapat sa mosunod nga mga prinsipyo sa Bibliya.

“Labi pang maayo ang kataposan sa usa ka butang kay sa sinugdan niini. Labi pang maayo ang usa nga mapailobon kay ang usa nga mapahitas-on sa espiritu. Dili ka magdalidali . . . sa pagkasuko.” (Ecclesiastes 7:8, 9) Ang pagpailob hinungdanon kaayo! Ang mga relasyong gipakasayon diha sa kinaiyanhong mga pamilya kinahanglang matukod. Kamo dili usa ka “dihadiha nga pamilya.” Nagaingon ang mga eksperto nga mokabat tingalig gikan sa upat ngadto pito ka tuig ang pag-ugmad sa usa ka pagbati nga “kita.” Sa sinugdang yugto, kinahanglang magrelaks ang mga amaama o inaina. Sulayi nga dili dayon masuko kon isalikway ang unang paningkamot sa pagpakighigala sa mga hinablos.

“Pinaagi sa pagkamapangahason ikapahinabo sa usa ang pakigbisog, apan kadtong nagatambagay anaa ang kaalam.” (Proverbio 13:10) Ang gahian, mapangahasong tinamdan—sa bahin sa mga anak o mga ginikanan—motultol sa panagbingkil. Magbaton ug regular nga mga sesyon dihang kamo magkonsultahay ingong pamilya ug husayon ang mga suliran. Tun-i ang pagpahayag sa imong mga pagbati sa paaging mopadayag sa pagkamabination alang sa uban. Kon labaw nimong mailhan ang “bag-ong” mga sakop sa pamilya pinaagig libreng komunikasyon, kamo mahimong mas suod.

“Kadtong nagapadayag ug kaalam sa usa ka butang makakaplag ug maayo, ug malipayon siya nga nagasalig kang Jehova.” (Proverbio 16:20) Ang kaalam nagalangkit sa paglantaw saylo sa kon unsay dayag ug pagkaila sa mga hinungdan sa pila ka tinamdan ug kagawian. (Tan-awa ang interbiyo sa atbang nga panid.) Kining hiyasa mobulig kanimo sa pagkakita sa maayo diha sa uban.

Pananglitan, panahon sa usa ka masilaobong diskusyon, ang inaina misakgaw ug misugyot: “Atong ipadayag ang usa ka butang dili nato hiangayan bahin sa usag usa, ug dayon sundan kana sa usa ka butang atong maangayan.” Sa ulahi, siya misulat: “Natingala kami sa tanang maayong kinaiya nga among giapresyar sa matag usa.” Misunod ang mga luha ug gaksanay. Sa laing panimalay, ang usa ka tin-edyer mirebelde dihang naminyo pag-usab ang iyang inahan, apan ang pagkamaalamon nakapahinabog kalinaw. “Tapos sa pila ka bulan, akong naamgohang kini ang lalaki nga magalipay sa akong inahan,” matud ni Jeff. “Ug kana lamang ang bililhon.”

Apan kon ipadapat ba kaha nimo kun dili kini nga mga prinsipyo nagadepende sa imong espirituwalidad. “Ang pagsalig kang Jehova,” pagtinguha sa pagpahimuot kaniya, mao ang yawi sa kalinaw diha sa usa ka pamilyang may hinablos.