Ang Linaing mga Suliran sa mga Pamilyang may Humabdos
POSIBLENG MAGMALIPAYON ANG MGA PAMILYANG MAY HUMABDOS! SA UNSANG PAAGI?
Ang pamilyang may humabdos nahimong naandang matang sa panimalay sa daghang bahin sa kalibotan. Bisan pa niana, ang mga pamilyang may humabdos adunay kinaiyanhong mga problema. Ang kinalisoran sa walay duhaduha mao ang pagmatuto sa mga bata. Hinunoa, sumala sa gitinguha nga ipakita sa mosunod nga duha ka artikulo, posibleng magmalamposon ang pagmatuto ug mga bata diha sa kahimtang sa pamilyang may humabdos.
SUMALA SA NAANDAN, DILI MAAYO ANG REPUTASYON SA MGA AMAAMA UG MGA INAINA. NIADTONG KITA mga bata pa, daghan kanato ang nakadungog sa pipila ka bersiyon sa sugilanong engkantohanon ni Cinderella, nga nag-antos pag-ayo sa mga kamot sa iyang mabangis nga inaina. Ang mga bata sa Uropa nahibalo usab sa sugilanong engkantohanon nga Snow White and the Seven Dwarfs. Ang inaina ni Snow White usa diay ka daotan kaayong abat!
Ang maong mga sugilanong engkantohanon naghatag ba ug tukma nga panglantaw sa mga pamilyang may humabdos? Ang tanang amaama ug inaina tinuod ba gayod nga mabangis? Dili. Kadaghanan kanila buot lamang ug labing maayo alang sa mga bata nga ilang napanunod pinaagi sa kaminyoon. Apan kinahanglan silang moatubang ug pipila ka malisod nga mga suliran nga kinaiyanhon sa kinabuhi sa pamilyang may humabdos.
Ang mga Suliran sa Pagmatuto sa mga Bata
Sa dihang mabungkag ang unang kaminyoon, ang sagad nga hinungdan mao ang pagkadili-hamtong sa magtiayon. Sa ikaduhang kaminyoon, ang pagpakiglabot sa mga bata makapabug-at sa relasyon. Ang pipila ka rekord nagpakita nga kapin sa 4 sa 10 ka pamilyang may amaama o inaina ang mosangpot sa diborsiyo sulod sa unang lima ka tuig.
Ang bag-ong-minyo dili tingali makaamgo sa emosyonal nga kasamok, sa nagsumpaki nga pagbati kon kang kinsa mounong, ug sa pangabugho ug kasuko nga bation sa mga humabdos tungod sa pag-abot sa amaama o inaina. Sila maghunahuna tingali nga mas labaw ang pagmahal sa ilang tinuod nga ginikanan sa ilang amaama o inaina kay kanila. Dugang pa, ang tinuod nga ginikanan nga gibiyaan sa kapikas tingali malisdan sa pagsabot sa nagpadayong kasuod sa mga bata ngadto sa kanhing kapikas. Usa ka batang lalaki misulay sa pagpatin-aw sa iyang maayong relasyon uban sa iyang tinuod nga amahan, nga nag-ingon, “Ma, nahibalo ko nga dili maayo ang pagtratar ni Papa kanimo, apan maayo baya siya nako!” Ang ingon nianang mga pulonga, bisan tuod matinud-anon, makapabati sa inahan ug tumang kapungot sa amahan sa bata.
Ang usa ka amaama mipahayag: “Dili gayod ako andam sa pag-atubang sa tanang problema nga nalangkit sa pagmatuto sa akong mga humabdos. Misulod ako sa kahimtang nga naghunahuna nga karong ako nang giminyoan ang ilang inahan, ako na ang ilang amahan. Ingon niana lamang ka simple! Wala nako masabti ang pagkasuod sa mga bata sa ilang tinuod nga amahan, ug nakahimo akog daghang sayop.”
Ang mga tensiyon motungha ilabina sa butang maylabot sa disiplina. Ang mga bata nagkinahanglan ug mahigugmaong disiplina, apan sagad silang morebelde batok niini bisan pag maggikan kini sa tinuod nga ginikanan. Labaw nang malisod kining dawaton gikan sa usa ka amaama o inaina! Sa kasagaran, sa dihang maatubang ang ingon nianang disiplina, ang humabdos mosultig mga pulong sama sa, “Dili ka tinuod nakong amahan!” Pagkamakapaguol kanang mga pulonga sa amaama nga maayog tuyo!
Mahimo kaha nga magmalamposon sa pagmatuto sa mga bata diha sa pamilyang may humabdos? Mahimo kaha nga ang mga amaama o inaina makadulag positibong papel sa pagtukod ug malamposong pamilyang may humabdos? Ang tubag sa duha ka pangutana maoy oo kon ang tanang nalangkit magsunod sa tambag sa dinasig nga Pulong sa Diyos, ang Bibliya.
[Hulagway sa panid 3]
“Dili ka tinuod nakong amahan!”