Mga Batan-on Nangutana . . .

Sa Unsang Paagi Masuod Ako sa Diyos?

‘AKO tawo, ang Diyos balaan. Ako may kinutoban, ang Diyos walay kinutoban. Ako unod, ang Diyos espiritu. Nan sa unsang paagi makiglabot ako sa Diyos?’ Kana ang pangutana sa daghang batan-on mahitungod sa Diyos karong adlawa. ‘Usahay ako mahibulong,’ nagaingon ang pila ka batan-on, ‘kon buot ba sa Diyos nga ako makigkomunikar Kaniya o kon gusto ba lang Niyang pasagdan.’ Ang uban pa moreklamo, ‘Kon magaampo ako, ako dili makadungog ug mga tingog nga magasulti kanako kon unsaon ko pagsulbad ang akong mga suliran.’

Hinuon, dili kana ang pagbati sa tanang batan-on. Nag-ingon si George Gallup, Jr., diha sa iyang basahong Religion in America 1984: “Mopatim-awng ang mga tin-edyer lagmit pang mobati sa suod nga relasyon uban sa Diyos kay sa ilang mga tigulang.” Apan bisan tuod 95 porsiento sa mga tin-edyer nga giinterbiyo miingong sila nagtuo sa Diyos o sa unibersohanong espiritu, kini sa kaugalingon wala magkahulogang sila may relasyon o pakiglabot kaniya.

Ang pagpakigsuod sa Diyos naglangkit ug labaw pa kay sa pagtuo lamang kaniya. Kini nagkahulogan sa pagbutang sa pagtuo sa lihok, nga nagaapil sa pag-ugmad sa pagpakighigala sa Diyos. Busa, ang Bibliya nagahisgot bahin sa matinumanong Abraham ingong gitawag “higala ni Jehova.” Tinuod, ang pag-ugmad sa bisan unsang relasyon maoy buluhaton. Apan takos ba sa kahago ang pakighigala sa Diyos? —Santiago 2:23.

Kon Nganong Hinungdanon

“Tungod kaniya kita may kinabuhi ug nagalihok ug nagalungtad,” matud ni apostol Pablo. (Buhat 17:28) Sa gusto mog sa dili, ang imong kinabuhi nagadepende sa Diyos. Ang hangin nga imong ginahanggab, ang pagkaong imong ginakaon, ang tubig nga imong ginainom—kini sila pipila ra sa iyang mga tagana. Sa ingon dili ba kita utangan niya? Kini lamang usa ka hinungdang buot natong masuod sa Diyos. (Genesis 1:27, 28; Salmo 104:14) Apan, duna pay laing hinungdang buot nimong masuod sa Diyos.

“Dili iya sa tawo nga nagalakaw ang pagtultol sa iyang lakang,” matud sa Bibliya. Dili ingon nga ang tawo dili makasulay, apan kon wala ang pagtultol sa Diyos siya yanong wala masangkapi sa pagbuhat niana. (Jeremias 10:23; Proverbio 12:15) Ang mga gubat, krimen, kapintasan, polusyon, ug daghan pang laing kahimtang karong adlawa nagpamatuod niini. Oo, ang pagkadili suod sa Diyos seryosong nakadaot sa katawhan. Apan komosta ka ingong indibiduwal?

Ang pagkahigala sa Diyos motabang nimo sa pagsagubang sa personal nga mga suliran. Ang tawo dunay “daginoton nga kinabuhi ug kargadog mga suliran,” matud sa Bibliya. (Job 14:1, The Bible in Living English) Bisan pa niana, pinaagi sa pagtultol nga iyang ginahatag pinaagi sa iyang Pulong, ang Diyos makagiya kanimo sa mga dalan nga alang sa imong malungtarong kaayohan. “Salig kang Jehova uban sa tibuok mong kasingkasing ug ayaw pagsalig sa imong kaugalingong salabotan,” nagaawhag ang Bibliya. “Sa tanan nimong mga dalan matikdi siya, ug siya mismo magatul-id sa imong mga alagianan.”—Proverbio 3:5, 6; Salmo 16:11.

Ang Diyos interesado usab sa imong umaabot nga kaayohan. Ang saad niyang kinabuhing walay kataposan sa yuta—diha sa malinawon ug matarong nga mga kahimtang—ngadto niadtong maikagong nagapangita kaniya nagahimo sa pagpakigsuod sa Diyos nga labi pang hinungdanon. (Juan 17:3; Salmo 37:9-11, 29; Pinadayag 21:3, 4) Nan, sa unsang paagi makasugod ka sa pagpakigsuod kaniya?

Ilha ang Diyos

Una ka mopili sa usa ingong suod nga higala, kinahanglan unang mailhan mo siya. Basta ba lang nimong pilion ang maong higala—nga dili ilhon ang iyang ngalan, iyang pagkatawo, iyang intereses, ug bisan ang iyang mas lalom nga mga hunahuna ug mga emosyon? Lagmit dili. Sa samang paagi, sa pagpakigsuod sa Diyos kinahanglan unang mahibalo ka mahitungod kaniya. (Juan 17:3) Sugdi pinaagi sa pagtuon sa Bibliya. Kini motabang kanimo sa pag-ila sa Diyos ingong usa ka persona. Imong mahibaloan kon unsay iyang panghunahuna ug kon unsay iyang gikinahanglan gikan kanimo.

Bisan tuod ang Bibliya gisulat sa pinulongang may pagkayano ug tin-aw, gikinahanglan ang disiplinadong pagtuon. Ikasubo, alang sa kinabag-ang katawhan, ang Bibliya nagapabiling wala-mabasa, langyawng kasulatan. Sumala sa usa ka Gallup Youth Survey, “mga usa ra ka tin-edyer sa walo (12%) ang nagabasa sa Bibliya sa matag adlaw, ug 30% dili gayod moabli sa basahon o dili makahinumdom kon kanus-a sila kataposang nag-abli niana.” Makaiikag, 52 porsiento nagaingong sila nagabasa sa mantalaan sa kada adlaw. Apan aron “magpadayon sa pagsabot kon unsa ang kabubut-on ni Jehova,” kinahanglanon ang pagbasang regular sa iyang Pulong.—Efeso 5:17; Josue 1:8.

Ugaling, ang pagpakigsuod sa Diyos dili lamang mao ang pagbaton ug mga kasayoran mahitungod kaniya. Sama sa diha sa bisan unsang relasyon karong adlawa, gikinahanglan ang usa ka matang sa komunikasyon. Uban kang Jehova nga Diyos, kini mao ang pag-ampo.

Pakigkomunikar

Alang sa pila ka batan-on, ang pagpakigsulti sa Diyos diha sa pag-ampo daw halayo kaayo, dili katuohan o dili tinuod. Bisan pa niana, sumala sa giingon sa 17-anyos nga si Laverne, “lisod ang pag-ingong ikaw dunay tinuod personal nga relasyon uban sa lain kon dili ka makigsulti kaniya.” Tinuod, ang kahibalo hinungdanon. Apan bisan pag unsa ka dako ang imong kahibaIo mahitungod sa Diyos, kon wala ang regular nga pag-ampo kaniya, ang imong mga paningkamot makawang.

Si Lynda nagdako sa usa ka Kristohanong pamilya. Bisan pa niana, sa paghinumdom sa katuigan sa iyang pagkatin-edyer, siya nahinumdom, “Niadtong tanang katuigan, ako talagsa rang mopalta sa Kristohanong tigom, ug ako wala gayod masipyat sa sa pagsangyaw sa usa ka bulan, apan wala gayod nako maugmad ang suod personal nga relasyon uban kang Jehova.” Apan sa usa ka bahin sa iyang kinabuhi, sa midako ang mga suliran ug mga tensiyon, unsay nakatabang kaniya? “Ako miampong walay hunong sa daghang adlaw alang sa mga sulbad sa among mga suliran.” Sa wala madugay iyang naamgohang si Jehova makatabang kaniya sa iyang mga suliran, ug siya nakasagubang kanila.

Ikaw ba sukad mibating sama kang Lynda, nga nagabuhat ka sa maayo Kristohanong mga butang, apan dili ka gihapon masuod sa Diyos? Nakasulay ka ba sa pag-ampo mahitungod niana? Ang Bibliya tin-awng nagaingon nga “si Jehova haduol sa tanang nagasangpit kaniya.” (Salmo 145:18) Kana ang hinungdang ang Bibliya nagadasig kanato sa “pag-ampo nga mapinadayonon,” “molahutay sa pag-ampo,” ug “pag-ampo sa tanang higayon.” (Mateo 26:41; Roma 12:12; Efeso 6:18) Bisan tuod kini wala magkahulogang gugolon nimo ang tanan nimong panahon—24 ka oras sa usa ka adlaw—sa pag-ampo, kini nagkahulogang kinahanglang ikaw regular nga moampo. Apan kon ikaw magaampo, ang Diyos magapatalinghog ba?

Siya magapatalinghog kon imong makab-ot ang iyang mga kondisyon alang sa pag-ampo ug kon moampo ka alang sa hustong mga butang. Gigamit ni Jesu-Kristo ang iyang sulundang pag-ampo ingong sumbanan. (Lucas 11:1-4) Hinuon, ang disipulong si Santiago miingon ngadto sa pila ka Kristohanon sa iyang adlaw: “Kamo nagapangayo, ug bisan pa niana wala kamo makadawat, tungod kay kamo nagapangayo sa sayop nga katuyoan.” (Santiago 4:3) Busa, kon ang imong mga pag-ampo maoy hinakog o wala magpakabana sa kabubut-on sa Diyos, dili ka makadahom nga ang Diyos magapatalinghog niana kanila.

Bisan pa niana, ang pagpakigsulti lamang sa Diyos dili pag-ampo sa tanang panahon. Ang imong pag-ampo kinahanglang maglangkit sa debosyon, pagsalig, pagtahod, ug pagbati sa pagdepende sa Diyos. Ipahayag kon unsay naa sa imong kasingkasing ngadto kaniya sama sa imong pagabuhaton ngadto sa usa ka masinabtanong amahan. Oo, “sa tanang butang pinaagi sa pag-ampo . . . ipahibalo ninyo ang inyong mga hangyo sa Diyos.” (Filipos 4:6) Sa gihapon, gikinahanglan ang labaw pa kay sa kahibalo ug pag-ampo aron ikaw masuod sa Diyos. Kinahanglan usab nga manlimbasog ka sa pagpahiuyon sa imong kinabuhi ngadto sa mga prinsipyo sa Bibliya.

Magmakugihon

Ang mga lalaki, mga babaye, ug mga batan-on mogugol ug daghang panahon, magbudlay ug dako, ug bisan moantos sa kalisod aron makab-ot ang personal nilang mga tumong. Pananglitan, tali sa mga edad 9 ug 19, ang bituon sa iskiting sa Olympics si Peggy Fleming migugol ug kapin sa 20,000 ka oras—usa ka aberids nga labing menos lima ka oras kada adlaw—sa pag-ehersisyo ug pagbansay alang sa Olympics. Ang iyang tumong? Usa ka bulawang medalya sa Olympics. Dili ba ang pagsingkamot nga masuod sa Diyos nagakinahanglan usab ug dakong kahago?

Ang iyang Pulong nagasugo kanato nga “hukasa ninyo ang daang pagkatawo” ug “hunong na kamo sa pagpahiuyon niining sistema sa mga butang.” (Colosas 3:9; Roma 12:2) Gikinahanglan niini ang mapinadayonong paghago sa imong bahin. Apan dili ka gayod masuod sa Diyos gawas ikaw may buhaton mahitungod niana.

Busa, aron masuod ka sa Diyos, kinahanglang makaila ka kaniya, makigkomunikar kaniya pinaagi sa pag-ampo, ug magkugi pinaagi sa pagbuhat sa iyang kabubut-on. Oo, sugdi ang “pagpangita sa Diyos, . . . sa pagkarapkarap alang kaniya ug kaplaga gayod siya, bisan pa, sa pagkamatuod, siya dili halayo gikan sa matag usa kanato.”—Buhat 17:27.

[Blurb sa panid 15]

Ang pagpakigsuod sa Diyos nagalangkit ug labaw pa kay sa pagtuo lamang kaniya

[Blurb sa panid 16]

Dili ka gayod masuod sa Diyos gawas may buhaton ka mahitungod niana

[Letrato sa panid 15]

Daghan ang nagabudlay ug dako sa pagkab-ot sa ilang mga tumong. Menos bang pagbudlay ang gikinahanglan aron masuod sa Diyos?