Pagpaniid sa Kalibotan

Panglimbong sa Medisina

Gipasangil sa mga sikyatrista nga ang dakong porsentahi sa mga doktor nga gipalagpot sa programa sa Medicare ug Medicaid maoy tungod sa panglimbong ug ubang mga pag-abuso, mitaho ang pagtuon nga gisuportahan sa U.S. Department of Justice. Bisag gilangkoban lamang ug 8 porsiento sa mga doktor nga nagpraktis sa Tinipong Bansa, ang 18 porsiento sa 147 ka doktor nga gisuspende sa mga programa sulod sa 15 ka tuig mao ang mga sikyatrista. Lakip sa mga pag-abuso nga gikutlo mao ang linimbong nga mga praktis sa pagpaningil, gilakip pagpaningil ang sesyon sa terapiya nga sa tinuod naghatag lamag resita, nagtunol ug resibong mga panilngonon sa mga pasyenteng wala maglungtad, ug sa pakigsekso sa mga pasyente apan naningil sa panahon diha sa mga programa sa Medicare ug Medicaid. Sumala sa gipahayag ni Paul Jesilow, kriminologo ug kaubang awtor sa pagtuon: “Dayag, dili kini makahatag maayong dungog sa praktis sa sikyatriya.”

Delingkuwenteng mga Ginikanan

Kon makalapas sa balaod ang mga bata, ang mga ginikanan ba ang mabasol? Oo, sumala kang Maghuhukom Julius B. Ness sa South Carolina, U.S.A., State Supreme Court. Siya miingon nga ang terminong “delingkuwensiya” mas aplikado sa mga ginikanan kay sa mga bata. Aron mapalig-on kining pangangkona, si Maghuhukom Ness mibatbat: “Ang atong mga anak nakakat-on gikan kanato sa pagsimba sa makagagahom nga dolyar, sa gahom ug sa bahandi. Ang atong balikong pagtamod sa mga prinsipyo sa walay duhaduha maoy responsabli sa nagatubong gidaghanon sa nalisdang mga batan-on.”

Gusto Kag Uso?

Ang estado sa Montana (U.S.A.) may suliran. Ang populasyon sa uso niini sa Rocky Mountain midaghan ug mikaylap ngadto sa mga dapit nga may mga tawo ug binuhing mga hayop. Ang uban nahimong “problemang mga uso,” tungod sa pagbiya sa ilang naandang pagkaon baylo sa mga basurahan, diha sa tawhanong palibot. Busa, sumala sa gitaho diha sa The Wall Street Journal, nakaideya ang Montana sa pagsulat sa ubang mga estado ug nagtanyag sa mga uso—nga moabot sa gibug-atong 600 ka libra—kanila. Ang ubang mga estado miingon “salamat na lang.” Naghisgot ang California nga ang mga dapit nga ilang nahunahunaang butangan sa mga uso “daghan usab ug tawo.” Nahadlok ang Wyoming sa mga suliran nga motungha bahin sa mga uso. Ug ang Oregon nagtanyag usab sa pagpadala sa Montana ug itom nga mga uso nga ilang suliran usab. Ang Alaska lamang ang mihatag ug paglaom. Bisag dili sila gusto sa mga uso, sila miingon nga, sa usa ka paningkamot sa pagpanalipod sa ilang moose, andam sila sa pagbaylo sa ilang mga lobo sa mga uso “sa libra por libra nga sukod.” Apan ang Montana, nga naningkamot sa pagpanalipod sa ilang mga binuhing mga mananap, dili gustog mga lobo.

Daotang Dula

Ang gibantog nga mga buhat sa vigilante sa subwey sa New York City nga nakaposil ug upat ka batan-on nakabihag sa interes sa usa ka tig-imbentog dula. Siya nakahimog “The Subway Vigilante Game.” Gisentro kini sa usa ka mapa sa sistema sa subwey sa New York City diin ang “kada luna naglarawan sa nagkalainlaing estasyon,” mitaho ang Daily News. Ang mga kard nga may mga instruksiyon sama sa “Put Cun to Punk’s Head . . . Move 2 Spaces (Ition ang Posil sa Ulo sa Buangbuang . . . Abanteg 2 ka Luna) makuha pinaagi sa pag-itsag dayis. Ang gagmayng mga armas nga lainlaig porma maoy mga gamit sa dula. Ang mga magdudula nga dili makatigom ning mga gamita “mabugbog” ug busa mapildi. Samtang ang ubang mga negosyante midumili sa pagbaligya ning dulaa, ang uban nga namaligya niini mahutdan dayon ug nag-ingon nga halinon kaayo kini.

Hipnotikong Testimoniya Dili Madawat

Ang mahinumdoman ingong resulta sa hipnosis dili madawat ingong ebidensiya diha sa korte, miingon ang Korte Suprema sa Missouri, U.S.A. Mikomento bahin sa kaso, Alsbach v. Bader, ang The National Law Journal mitaho: “Cihipnosis si Carl Alsbach sa pagpalab-as sa iyang panumdoman bahin sa usa ka hitabo diin siya nalangkit. Misulay siya sa pagtunol sa iyang tapes sa hipnosis nga testimoniya ingong ebidensiya. Ang korte mihukom nga ang maong testimoniya kulang sa siyentipanhong kalig-onan sa pagkakasaligan niini ug dili angay dawaton sa mga korte sa Missouri.”

Problema sa Pamatay sa Dangan

Makasuhop ang pamatay sa dangan sa panagang nga senina sa mga mamumuo, miingon ang mga tigdukiduki. Walay abisong gihatag sanglit ang mga pamatay sa dangan dili man makasunog ug makadaot sa panit, nga dinhi masuhop sila sa kaugatan. Pinaagi sa paggamit ug flourescent nga kemikal nga timaan sa pamatay sa dangan, nadiskobrehan nga bisan ang labing bagang panagang nga gamiton—patongpatong nga senina, overall, ug guwantes nga goma—nasuphan gihapon. Busa ang mga mamumuo sa uma makadawat ug dakong dosis kay sa gihunahuna sa una. Mosamot ang problema kon ang mga mamumuo nga nagtuong napanalipdan na sila sa ilang senina, manghuas lamang sa naladlad nga mga dapit sa panit.

Ang Mapuslanong Sabaw

Ang labing daghang ikaduhang produkto sa paghimog keso mao ang whey kun sabaw. Sa kada librang mahimo, unom ngadto sa siyam ka pilo ang makuhang sabaw—hapit 46,000 ka milyong libra (21,000 ka milyong kg) niini sa usa ka tuig sa Tinipong Bansa lamang. Ang pangunang sambog sa sabaw mao ang lactose, kun kalamay sa gatas. Usa ka paagi ang naimbento karon nga nagagamit ug lactose ingong papilit sa paghimog particleboard nga gamiton sa konstruksiyon. Ang naandang paggamit sa formaldehyde, nga mopatunghag makahilong alisngaaw nga mapundo sa hangin sa modernong airtight nga mga tinukod, napahimuslan. Ang mga tigdukiduki miingon nga ang lactose sa particleboard dili makadaot. Ang lactose magamit usab sa paghimog polyurethane nga mga foam sa insulasyon. Ang bentaha mao nga dili mahal ang paghimo kanilang dili masunog kay sa naandang mga foam nga ginama gikan sa sucrose.

Mga Tanom nga Makahinlo sa Hangin

Ang sukod sa polusyon sa moderno, maayong pagkainsular nga mga balay mamenosan pinaagi sa paggamit ug ordinaryong tanom sa balay, miingon ang mga tigdukiduki. Ang mga halingan sa balay, mga kasangkapang de-gas, sigarilyo, insulasyon, ug bisan ang sintitikong mga senina, alpombra, ug kurtina mobuga ug makadaot nga mga tighugaw sa hangin. Nakita sa mga eksperimento nga sa 24 oras ang sukod sa makadaot nga mga substansiya—nitrogen dioxide, carbon monoxide, ug formaldehyde—namenosan ug dako sa mga spider plant. Gikan sa 8 ngadto sa 15 ka maayong pagkahimutang nga mga tanom ang gikinahanglan sa pagkombati sa polusyon sa kasarangang balay. Samtang ang spider plant ang nakitang labing maayo, ang ubang mga tanom, sama sa Chinese evergreen, golden pothos, ug ang peace lily, epektibo usab. Nadiskobrehan sa mga siyentista sa NASA ang abilidad sa tanom samtang nanusig sistema sa biolohikal nga paagi sa paghinlo sa hangin nga magamit sa mga estasyon sa wanang.

Kalamposan Gikan sa Kapakyasan

Ang “runaway success“ sa Japan miingon ang New Scientist, maoy “bag-ong elektronikong alarma para sa ulan.” Ang sensor, nga ikaw-it sa gawas, itaod sa piyesa nga mohoni diha sa taas nga higot. Inigpatak sa ulan diha sa sensor, molihok ang koneksiyon, ug ang alarma mohoni. Ang kompaniya, Nippon Alumi Tsurumaru, ang unang nakahimog sistema nga awtomatikong mobira sa hayhayan kon mag-ulan. Sa nakitang mahal kaayo kini, gimaniobra sa kompaniya ang piyesa sa sensor ug nakaimbentog alarma para sa ulan. Duolan sa 250,000 ang nahalin sa unang walo ka bulan sa gibaligya kini.

Mas Maayong Pang Atrasado Kay sa Wala

Ang libro nga nawala gikan sa Pennsylvania State Library sukad pa sa miaging siglo nauli. Nahibulong ang mga opisyales sa librarya dihang ang libro, gipatik sa 1657, nakitang giuli diha sa kahon sa huloganag libro. Ang libro, Tounsend’s Collection, gipapalit ni Benjamin Franklin sa gitukod niya ang librarya sa estado. Gibanabana nga nawala kadto sa katuigang 1823 ug 1900.

Walay Kapuslanan ang mga Horoskopyo

“Nakita sa seryosong siyentipikanhong pagsusi sa pagkatukma sa mga horoskopyo nga ang timaan sa bitoon nga ubos niini nahimugso ang tawo walay impluwensiya sa iyang personalidad,” misulat ang editor sa siyensiya si Pearce Wright diha sa The Times sa London. Ang eksperimento, nga gihimo sa University of California, giapilan sa 28 ka iladong mga astrologo. Ang pagtuki mao ang pagtugbang sa astrolohikal nga tsart sa usa ka tawo nga may tukmang paglarawan sa personalidad. Ang mga paglarawan gibase sa mga pangutana nga pamilyar sa mga astrologo ug sa tawong gitun-an sumala sa ilang mga sugyot. Sa kada indibiduwal, tulo ka paglarawan ang gihatag, ang usa tinuod ug ang duha sulagmang pagkapili. “Ang makauulaw nga resulta sa mga pagtuki sa mga astrologo” miingon ang artikulo, “mao nga ang mga panagna nakitang walay bili nga maoy kinaiyahan sa tsansa.” Wala makakita ang mga astrologo sa mga buluntaryo. Kon ilang makita, miingon ang siyentistang si Shawn Carlson, nga maoy nagdumala sa pagtuki, mogamit silag mga timaan nga ilang magamit aron madani ang ilang mga kliyente.

Mga Nota sa HK

Ang paghatag ug pakigpulong mao ang pangunang kalihokan sa HK, apan pipila lamang ka diplomata ang batid niana. “Talagsa rang makakitag usa dinhi nga dunay tinuod nga gasa sa paghatag ug pakigpulong,” miingon si Francois Giuliani, tigpamaba sa sekretaryo-heneral. “Dunay tag-as nga mga mamumulong ug dunay mugbong mga mamumulong.” Ang dakong kakulian, miingon ang mga delegado, mao ang pagkontrolar sa lokal nga mga kagamhanan nga maoy magbuot kon unsay isulti, ug nga kinahanglang sundon ang pila ka lagda sa diplomasya. Gawas pa, ang dramatikong mga pakigpulong sa kasagaran dili nindot nga pamiton tungod sa pagkahubad.

◻ Sa pagpasidungog sa makasaysayanhong ika-40ng sesyon sa Heneral nga Asembliya, nagbutang ang usa ka tern sa tigpangatkat ug bukid sa Amerika ug bandera sa HK sa ibabaw sa Bukid Everest. Bisag nakasanta kanila ang malisod nga mga kondisyon sa 800 ka piye (240 m) nga wala makaabot sa ibabaw, ilang giugsok ang bandera ug nagdalag hulagway ingong ebidensiya. “Ang hulagway nawala na karon, ug ang tanang mga reperensiya niini nawagtang,” miingon ang The New York Times. “Ang katarongan? Ang bandera nabali sa pagbutang.”

Arteriya Batok Ugat

Ang paggamit ug arteriya nakitang superyor nianang sa ugat diha sa coronary-bypass nga operasyon. Himoon ang operasyon dihang ang mga arteriya nga naghatod ug dugo sa kasingkasing masap-ungan ug dunay kapeligrohan sa atake sa kasingkasing. Karon lang bag-o, magkuha ang daghang mga siruhano ug ugat gikan sa batiis ug gamiton kini alang sa bypass. Nakita sa bag-ong mga pagdukiduki nga ang paggamit ug internal mammary artery gikan sa dughan may superyor nga mga resulta. Gitandi sa mga doktor sa Cleveland Clinic Foundation ang taas-ug-tagal nga mga resulta sa 2,306 ka pasyente nga gihimoag artery bypass nga gikan sa dughan nianang sa 3,625 nga gihimoag vein bypass. Sa tanang mga kaso, ang anterior-descending coronary nga arteriya sa kasingkasing ang gihimoag bypass. Nakita sa pundok sa mga tigdukiduki nga sa kapin sa napulo ka tuig nga yugto, ang mga pasyente nga may vein bypass may 60 porsientong mas taas ug kapeligrohang mamatay kay sa niadtong mga artery bypass ug 40 porsiento usab nga may kalagmitang atakehon sa kasingkasing.