Mga Batan-on Nangutana . . .

Ang Bibliya ba Aplikado Kanako?

“DILI ko gustong maminaw kanimo,” misinghag ang batan-ong lalaki. Sa mitalikod si Grace, iyang giyab-an siyag usa ka plangganang mahugawng tubig. Nahaugnok siya makadiyot, dayon mirelaks ug kalmadong milakaw.

Apan ang reaksiyon ba ning batan-ong babaye sa hagit binuang ug kaha kahuyang? Dili ba may rason siya sa pagbalos? Gituohan ni Grace nga ang tambag sa Bibliya nga “magmakigdaiton sa tanang tawo” mao ang labing maayo. (Roma 12:17, 18) Apan unsay resulta sa iyang pagsunod sa Bibliya imbes masuk-anong mobalos? Atong tan-awon.

Si Lydia, usa ka 16 anyos nga estudyante sa Nigeria, naghinugilon bahin sa usa ka kauban sa klase nga “manggukod ug lalaki ug nakigdulog sa maestro sa biolohiya.” Sa matin-aw giisip ning babayehana nga dili bililhon ang tambag sa Bibliya sa pagpahilayo sa seksuwal nga imoralidad. (1 Corinto 6:18) Tingali nangatarongan siya nga ang mga batan-on kinahanglan pasagdan sa pagbuhat sa ilang gusto. Apan unsay miresulta sa iyang mga aksiyon?

Ang mga eksperyensiya ni Grace ug sa kauban sa klase ni Lydia nagbangon ug duha ka importanteng pangutana: Aplikado pa ba gihapon ang Bibliya? O ang presente katilingbanong mga doktrina ug estilo sa kinabuhi mas maayo alang sa maayong pagkinabuhi?

Modernong Adlawng mga Sukdanan

Tagda ang mga kalihokan sa “kagawasan” ug sa “bag-ong moralidad.” Kini sila nagsalikway sa mga sugo sa Bibliya sa paglimiti sa seksuwal nga mga relasyon diha lamang sa mga tawong minyo—sa bana ug sa iyang usa ka legal nga asawa. (1 Corinto 7:1, 2) Dakong kausaban sa tinamdan sa katilingban ang miresulta. Ang kahilayan sa sekso miuswag. Ang mga homoseksuwal ug mga pampam nanglimbasog nga madawat sa katilingban ug karon nagabuhat sa ilang estilo sa kinabuhi nga dayag sa tanan. Ang mga batan-ong paris mag-ipon lamang sa pagpuyo nga dili kasado. Apan kini bang tanan nakapatunghag mas maayong panimalaynong kinabuhi? Kini ba nakapauswag sa kalidad sa kinabuhi diha sa imong komunidad?

Palandonga kining pananglitan sa nahitabo sa mahilayong mga tin-edyer: Namabdos ang kauban sa klase ni Lydia sa maestro sa biolohiya, nga minyo. Gidaot niya ang iyang pagtungha ug ang panimalaynong kinabuhi. Ang uban nangamatay sa pagsulay sa supak sa balaod nga mga paghulog ug bata. Ang mga kamatayon sa mga tin-edyer ug sa wala matawong mga bata, ang sakit nga natakod sa pipila tungod sa napasa sa sekso nga mga sakit, ang pagkabungkag sa panimalaynong kinabuhi—maayo ba kining mga bungaha sa bag-ong pilosopiya sa katilingban?

Tingali makahunahuna kag laing hitabo nga makabangon ug samang pangutana. Pananglitan, nakita sa ika-20ng siglo nga napopular ang mga doktrina sama sa ebolusyon ug ateyismo, nga nagsalikway sa awtoridad sa Bibliya. Apan tungod sa mga gubat, kapintasan, ug kagubot ning sigloha, ikaingon ba nga kadtong mga doktrinaha nagtanyag ug mas maayong butang? Sa tinuod, ang mga tawo sa tanang panahon nagabag-o sa ilang mga pilosopiya ug mga teoriya. Ang sosyal nga mga doktrina sagad ginasalikway. Busa pagkadili maalamon nga ilang gisalikway ang Bibliya!

Ang Panginahanglan ug Giya

Unsay katin-awan ang imong ihatag sa makasubong mga resulta sa tawhanong mga ideya? Ang usa niini mao ang pagkadili hingpit sa tawo. Maingon man sa iyang hunahuna ug mga plano. Sumala sa gipamulong sa Bibliya, “Dili iya sa tawo . . . nga nagalakaw ang pagtultol sa iyang lakang.” (Jeremias 10:23) Kita nagkinahanglan ug pagtultol sa labing hataas nga tuboran, nga mao, gikan sa Diyos. Tinuod, ang tawo moingon nga wala siya maglungtad. Apan sa nakita kon unsa ka dili masaligon sa ilang mga ideya, dili gayod kita makasalig niana nga pangangkon, dili ba? Sa laing bahin, sanglit Maglalalang sa tawo ug nakapaniid kaniya sa nangaging mga siglo, bug-os nga nasayod ang Diyos sa pagkagama sa tawo. May nahunahunaan ka bang lain nga mas may katakos sa pagtultol kanato? Siya nagsugo kanato: “Ako, si Jehova, nga imong Diyos, ang Usa nga nagatudlo kanimo sa pagpahimulos.” (Isaias 48:17, 18) Apan sa unsang paagi tudloan kita niya?

Ang Tagana sa Diyos sa Paggiya

Ang Bibliya maoy komunikasyon ni Jehova kanato. (2 Timoteo 3:16) Nakiglabot kini sa tinuod nga mga tawo ug may mga kabalaka sama kanato. Nagsugilon kini kanato kon sa unsang paagi ug nganong gilalang kita sa Diyos ug kon unsaon nato sa pagpahimulos sa labing maayo sa atong mga kinabuhi. Usa kini ka butang nga gipabilhan sa 16-anyos nga Efik ug sinultihang si Eyo.* Siya miingon: “Ang Bibliya naghatag tambag sa nangaging panahon, bahin sa mga butang nga aplikado sa mga batan-on. Bisan ug ang mga tambag niini daw mapig-oton usahay, kini nakatabang kanako sa paglikay sa pagbuhat ug mga butang nga makadaot kanako o makadaot sa akong relasyon kang Jehova.” Miuyon kaniya, si Lydia midugang: “Ang Bibliya nagtudlo sa mga batan-on kon unsaon sa paggawi. Akong nakita ang kalainan sa mga batan-ong nagbantay sa tambag sa Bibliya ug niadtong wala.”

Nagtuo kining mga batan-ona nga sila nagkinahanglan ug nakadawat ug tabang sa pagpalambo sa maayong mga personalidad. Sila gipaluyohan sa duha ka edad-edarang mga batan-ong taga Nigeria—si Nicholas ug Richard—kinsa miingon: “Kami walay mga eksperyensiya ug nagkinabuhi sa daotang katilingban.” “Mas nasayod si Jehova kay sa gitawag nga mga maalamon karon. Kon atong sundon ang iyang tambag, dili nato kana basolan sa ulahi.” Kini nagpalanog sa pasalig ni Jehova: “Ang akong mga dalan mas hataas kay sa inyong mga dalan, ug ang akong hunahuna kay sa inyong mga hunahuna.” (Isaias 55:9) Dili ba maalamon nga matultolan sa mga hunahuna sa usa ka Supremong Hunahuna?

Makapahimulos Usab Ikaw

Aron dugang mailustrar ang bili sa Bibliya, atong susihon ang pila ka tawo ug mga kahimtang nga nalangkit niini, ug ang makaayong tambag nga gihatag niini.

Nag-asoy ang Genesis bahin kang Dina, ang anak nga babaye ni Jacob, nga sa dili maalamon nakighigala sa Canaanhong mga dalaga. Kini sila dili magsisimba ni Jehova sama kaniya, ni nagkinabuhi sila sa moral nga mga sukdanan sa iyang pamilya. Sa ulahi naibog ang usa ka batan-ong lalaking Canaanhon kaniya. Ang resulta? Iyang gilugos siya! (Genesis 34:1-7) Nakita ba nimo ang pagtulon-an niini? Sa tukma, ang Bibliya nagtambag: “Ipahilayo ang imong dalan gikan” sa imoral nga mga tawo, ug “pahilayo gikan sa pakighilawas.” “Ang daotang panag-uban makadaot sa maayong pamatasan.” (Proverbio 5:8; 1 Corinto 6:18; 15:33) Hinumdomi kon unsay nahitabo sa kauban sa klase ni Lydia. Apan, pinaagi sa pagsunod sa tambag sa Bibliya, natipigan ni Lydia ang iyang tawhanong dignidad ug moral nga kaputli diha sa tunghaan ug nakaanig pagtahod sa uban.

Hunahunaa, usab, si Cain, ang panganayng anak ni Adan. Nasina siya sa pabor nga gipakita diha sa iyang igsoong si Abel ug gipatay siya diha sa usa ka dili mapugngang lihok sa kasuko. Apan, gipasidan-an siya ni Jehova nga ang iyang sayop nga inklinasyon motultol ug dakong sala kon dili niya “kini kontrolahon.” Agresibong gisunod ang iyang mga tinguha, wala sunda ni Cain ang tambag sa Diyos. (Genesis 4:1-16) Dako bag kalainan ang mga batan-on karon? Tingali ang uban nga imong nailhan sama kang Alozie. Gilikayan ning batan-ong taga Nigeria ang mga higayon sa pagtuon sa Bibliya. Kulang sa impluwensiya niini diha sa iyang kinabuhi, mibalos siya sa pag-atake sa laing batan-on. Sa nagkaaway, grabe ang iyang pagkasamad sa buak nga tumoy sa botelya. Ang pagsunod ba sa tambag sa Bibliya mohatag untag maayong resulta kaniya? Segurado. Maayo ang nahimong resulta niini may labot sa hitabo nga gihisgotan sa sinugdan, bahin kang Grace.

Namalaybalay siya, naghisgot sa Bibliya uban sa mga tawo sa iyang lungsod sa Nigeria, dihang gibuboan siyag tubig sa batan-ong lalaki. Apan, nakadayeg kaayo ang lalaki sa iyang pagpugong sa kaugalingon, ug iyang giagpas siya, ug nangayog pasaylo. Mihikay si Grace ug pakigtuon sa Bibliya kaniya uban sa mga Saksi ni Jehova, ug karon usa na usab siya ka Kristohanon. Oo, ang tawo nga “makakontrolar” sa iyang emosyon malig-on, ug ang maong kalig-on maoy usa ka panalipod.

Apan, kini, maoy mga pananglitan lamang sa mga butang nga mahatag sa Bibliya. Tinuod nga aplikado kini karon, ang daghang tambag niini gipunting kanimo. Ug nagpunting kini nga, bisag makapili ka sa pagsunod sa imong kaugalingong independenteng dalan, mas maalamon ang pagsunod sa pagtultol sa Diyos. Sa pagbuhat niini, imong “mapalayo ang mga katalagman gikan sa imong unod.” Ang ingon nga katalagman nagalakip sa sakit nga napasa sa sekso, pagkasamad nga resulta sa pagpakig-away, o ubang dili maayong mga butang.—Ecclesiastes 11:9-12:1.

Busa pasagdi nga ang Bibliya magatultol sa imong kinabuhi. “Lakayi ang pangibog nga iya sa kabatan-on, ug tinguhaa ang pagkamatarong, pagtuo, gugma, pagdinaitay, uban kanila nga nagasimba sa Ginoo uban sa putli nga kasingkasing.” Makaani ka niini ug maayong kinabuhi karon ug sa walay kataposang kinabuhi sa umaabot.—2 Timoteo 2:22; 3:16, 17; 1 Timoteo 4:8.

[Footnote]

Efik maoy pinulongan sa Nigeria.

[Letrato sa panid 13]

Ang dili maalamong dalan ni Dina may daotang resulta. Ang mga bunga sa pagsunod sa pagtultol sa Bibliya nakitang mao ang labing maalamong paagi