Unsa ang Sulbad?
“Mao lamang kadto ang sulbad,” miingon ang piloto sa EgyptAir si Hani Galal bahin sa komando nga miasdang sa iyang na-hijack nga ayroplano. Apan, tinuod ba kini nga sulbad bisag mapatay ug masamdan ang inosenteng mga pasahero?
Sa pagkatinuod, walay usa sa nalangkit ang nahibalo sa sulbad sa suliran sa terorismo. Daghan kinig porma ug nahitabo sa daghang mga dapit. “Ang terorismo kaamgid sa sugilambong nga mangtas si Hydra,” miingon si Brian Jenkins, usa ka eksperto sa terorismo. “Matag putol nimo sa iyang ulo, duha ka ulo ang mopuli sa pagtubo.”
Pipila lang ka tawo, o bisag usa, makahatag nag kalisang sa minilyon. Ang dili pa dugayng pagbutang ug hilo sa kapsulang Tylenol nga tambal sa labad sa ulo sa Tinipong Bansa, nga gitawag “usa ka klarong buhat sa terorismo,” maoy pananglitan niini. Ang mga awtoridad walay nakitang solusyon nianang nahimong usa ka pag-alsa batok sa organisadong katilingban.
Apan nganong may pag-alsa? Unsay hinungdan sa terorismo? Ang mga tawo mibating gidaogdaog ug walay paglaom sa mga inhustisya, ug nakita nga ang mga buhat sa terorista mao lamang ang ilang kapilian. Ang mga hijacker sa TWA Flight 847 sa miaging ting-init mipirma sa ilang mga pulong: “Ang dinaogdaog sa kalibotan.” Ug, gani, gisultihan sa piloto sa TWA ang usa ka tig-interbiyo sa telebisyon: “Kining mga tawhana may matarong nga kawsa.”
Diha sa tugpahanan sa Roma sa miaging tingtugnaw, ang usa sa napatayng terorista may nota sa iyang lawas nga gipahinungod sa “mga Sionista” nga mabasa: “Sanglit inyong gipasipalahan ang among yuta, ang among dungog, ang among katawhan, kami sa baylo mopasipala sa tanang butang, bisan ang inyong mga anak, sa pagpabati kaninyo sa kasubo alang sa among mga anak. Ang mga luha nga among napatulo bayloan ug dugo.” Ang nota gipirmahan: “Ang mga martir sa Palestina.”
Apan kini bang mga Palestihanon mga martir o mga terorista? Komusta ang mga gerilya sa Nicaragua nga gisuportahan sa Tinipong Bansa—mga manggugubat ba sila sa kagawasan o mga terorista? Sa pagkatinuod, ang terorista sa usa ka tawo maoy laing manggugubat a kagawasan sa laing tawo.
Apan, bisan unsa pay ngalan, halos wala nay mobati karon nga luwas gikan sa mga buhat sa terorista. Ug ang mga paagi sa kasegurohan—bisan ang gastos nga $5 bilyones sa Tinipong Bansa alang sa mga paagi sa pagpanalipod sa opisyal nga mga tinukod niini sa gawas sa nasod—dili mao ang tinuod nga sulbad. Kining mga paagiha walay mahimo sa pagluka sa mga hinungdan sa terorismo. Apan adunay sulbad. Bisag dili arang maabot sa gahom sa tawo sa pagtagana niini, kini dili kay dili maabot sa gahom sa Diyos.
Ang sulbad alang sa mga dinaogdaog sa yuta dili pinaagi sa pagdangop sa mga buhat sa terorismo kondili pinaagi sa katumanan sa seguradong saad sa Diyos: “Kay ang mga matul-id magapuyo sa yuta, ug ang mga matarong ang mabilin diha niana. Apan ang mga daotan pagaputlon gikan sa yuta; ug ang mabudhion pagalukaon gikan niini.”—Proverbio 2:21, 22.
Kining saad sa Diyos hapit nang matuman. Tinoon kana sa iyang magmamando, ang nabanhawng Jesu-Kristo. Ang tagna sa Bibliya mahitungod niining Usa nag-ingon: “Uban sa hustisya magahukom siya sa mga kabus, ug pakanaogan niya ug hukom uban ang katul-id kadtong mga mapainubsanon sa yuta. Ug pagahampakon niya ang yuta uban sa baras sa iyang baba; ug pinaagi sa espiritu sa iyang mga ngabil pagapatyon niya ang tawong daotan.”—Isaias 11:4.
Oo, ang Anak sa Diyos si Jesu-Kristo sa dili madugay magapapha sa tanang inhustisya, ug kadtong may tulobagon niana. Diha sa matarong bag-ong sistema sa Diyos, ang terorismo ug kabangisan sa tanang matang maoy butang na unya sa nangagi. Dayon ang tanan sa yuta mabuhi sa kasegurohan, nga libre sa kahadlok sa bisan unsa.—Pinadayag 21:3, 4.