Matapos pa ba ang Terorismo?

Human moatake ang mga terorista, natural lang nga makapangutana ka sa kaugalingon: ‘May pagtagad ba ang Diyos? Nganong nahitabo man ning mga butanga? Matapos pa ba ang terorismo?a Sa unsang paagi nako madaog ang akong kahadlok?’ Ang Bibliya naghatag ug makapatagbawng tubag sa maong mga pangutana.

Unsay pagbati sa Diyos bahin sa terorismo?

Gidumtan sa Diyos ang kapintasan ug terorismo. (Salmo 11:5; Proverbio 6:16, 17) Ug si Jesus, ang representante sa Diyos, nagbadlong sa iyang mga tinun-an dihang milihok sila sa bayolenteng paagi. (Mateo 26:50-52) Bisag ang pipila nangangkon nga gihimo nila ang kapintasan sa ngalan sa Diyos, wala siya maghatag nilag katungod sa paghimo niana. Gani, dili niya paminawon ang ilang mga pag-ampo.—Isaias 1:15.

Ang Diyos may pagtagad sa tanan nga nag-antos, apil na niadtong naapektohan sa pag-atake sa mga terorista. (Salmo 31:7; 1 Pedro 5:7) Gipakita sab sa Bibliya nga hapit nang taposon sa Diyos ang kapintasan.—Isaias 60:18.

Ang hinungdan sa terorismo

Gihisgotan sa Bibliya ang tinuod nga hinungdan sa terorismo: “Ang tawo nagmando sa tawo alang sa iyang ikadaot.” (Ecclesiastes 8:9) Latas sa kasaysayan, ang mga tawo nga naghupot ug gahom naggamit ug terorismo sa pagdaogdaog sa uban. Tungod sa maong pagdaogdaog, ang uban mosukol pinaagi sab ug terorismo.—Ecclesiastes 7:7.

Kataposan sa terorismo

Ang Diyos nagsaad nga iyang wad-on ang kahadlok ug kapintasan ug iyang ipahinabo ang kalinaw sa tibuok yuta. (Isaias 32:18; Miqueas 4:3, 4) Iyang:

Wad-on ang tinuod nga hinungdan sa terorismo. Taposon sa Diyos ang mga gobyerno sa tawo ug pulihan kini sa iyang tibuok kalibotang gobyerno. Ang Magmamando niini nga gobyerno, si Jesu Kristo, patas nga magtratar sa tanan, ug iyang wad-on ang pagdaogdaog ug kapintasan. (Salmo 72:2, 14) Nianang panahona, wala nay mogamit ug terorismo. Ang mga tawo unya ‘makabaton ug tumang kalipay tungod sa dagayang pakigdait.’—Salmo 37:10, 11.
Wad-on ang tanang epekto sa terorismo. Ayohon sa Diyos ang pisikal o emosyonal nga kadaot nga giantos sa mga tawo tungod sa terorismo. (Isaias 65:17; Pinadayag 21:3, 4) Nagsaad pa gani siya nga banhawon niya ang mga patay ug mabuhi sila diha sa malinawon nga yuta.—Juan 5:28, 29.

Ang Bibliya naghatag ug maayong mga rason kon nganong makatuo ta nga hapit nang taposon sa Diyos ang terorismo. Pero makapangutana tingali ka, ‘Nganong wala pa man taposa sa Diyos ang terorismo?’ Aron mahibaloan ang tubag, tan-awa ang video nga Nganong Gitugotan sa Diyos ang Pag-antos?

a Ang pulong nga “terorismo” sagad nagtumong sa pagpanghulga o paghimog kapintasan—ilabina ngadto sa mga sibilyan—aron hadlokon ang mga tawo ug aron magpahinabog kausaban sa politika, relihiyon, o sa katilingban. Pero, lainlain ang panglantaw sa mga tawo kon unsay puwedeng isipon ingong terorismo.

Ang Bibliya makatabang sa mga tawo sa pagsagubang

Ang Bibliya naay duha ka sugyot nga makatabang nimo.

Pag-ampo sa Diyos.—Filipos 4:6, 7.
Pagpokus sa paglaom nga gihatag sa Bibliya.—Hebreohanon 6:19.

Alang sa dugang mga sugyot nga binase sa Bibliya, tan-awa ang artikulong “Kon Unsaon nga Dili Sobrang Mabalaka.”

Ang mga Saksi ni Jehova nga nabiktima sa terorismo gitabangan sab sa ilang mga igsoon sa pagtuo. Matikdi kining duha ka pananglitan:

Si Natalya ug ang iyang nuybe anyos nga anak nga lalaki, si Aslan, didto sa usa ka eskuwelahan sa Beslan, Russia, dihang ang armadong mga terorista kalit nga nanulod ug nang-hostage ug kapin sa 1,000 ka tawo. Ikasubo, gatosan ang nangamatay, nga ang kadaghanan mga bata. Bisag wala mamatay si Natalya ug Aslan, na-trauma sila. Tan-awa kon unsay nakatabang nila nga maka-recover.
Si Pablo ug Sophie namatyag anak nga lalaki dihang giatake ang Twin Towers sa New York. Tan-awa ni nga video aron mahibaloan nimo kon unsay nakatabang nila ug sa uban nga naapektohan sa pag-atake sa mga terorista.