Gikan sa Among mga Magbabasa

Pag-inom ug Pagmaneho

Uban ang dakong kalipay nga ako makasulat ug makaingong ang diputado serip nga tagdumala sa trapiko dinhi mihangyog 100 ka kopya sa inyong isyu bahin sa “Pag-inom ug Pagmaneho.” (Agosto 8, 1986 sa Cebuano) Siya karon nalangkit sa usa ka proyektong maylabot sa ulohan ug mohatag ug pakigpulong ngadto sa mga tag-iyag bar ug restawran, nga magpasiugda sa ilang tulubagon sa dili pagtugot nga kadtong momaneho moinom ug daghan. Salamat sa inyong kanunay nga pagkaanaa uban sa butang among gikinahanglan, sa panahong among gikinahanglan kana.

J. P., T.B.A.

Pagkamanaghigala Lamang

Dili ninyo mahanduraw ang akong katingala dihang akong nadawat ang inyong isyu nga may artikulong “Mga Batan-on Nangutana . . . ‘Dili ba Mahimong Kita Managhigala Lamang?’” (Agosto 22, 1986) Abi ninyo, niining gutloa, ako nagbaton ning sulirana mismo. Ako 20 anyos, ug ang usa ka ulitawong akong kauban sa trabaho mibating siya nahigugma kanako, apan ako wala mahigugma kaniya. Karon may tubag na ako diha sa artikulong gihisgotan sa ibabaw.

M. W., Pederal nga Republika sa Alemanya

Baldadong mga Anak

Ang inyong artikulong “Katloan ka Tuig sa Gugma ug Pagmahal” (Hulyo 8, 1986 sa Cebuano) nindot kaayo ug makapadasig alang sa mga ginikanan sa mga batang may Down’s Syndrome, apan wala ako makaangay sa tudling-pulong: “Ang mga tagagawas kadaghanan nagahunahunang ang pag-atiman sa usa ka anak nga baldado usa ka responsabilidad nga may diyutay nga balos. Pagkasayop nila!” Ingong ginikanan sa usa ka baldado kaayong anak babaye, ako matinud-anong makaingong tingali kamo nasayop sa paglumpong sa tanang anak nga baldado. Ang akong anak dili makalakaw, makasulti, makakita, makakaon sa kaugalingon, o mahimong walay hapin. Ang iyang ngipon kinahanglang sepilyohan, ug siya kinahanglang digoon kada adlaw. Ang pagpakaon maoy tibuok-adlaw nga buhat. Ang pagkonsulta sa mga terapista, nutrisyonista, pediatrisyan, ug uban pa, mokuhag daghang oras, ug usa ka walay-hunong nga pakigbisog ang pagbaton sa tukmang tabang ug serbisyo nga gikinahanglan. Ang mga ginikanan sa baldadong mga anak nahigugma kaayo sa ilang mga anak, apan ang buot kong ingnon mao nga kon dili ka makasabot sa kahimtang, ayaw sulayi ang paglipay o ipangulipas ang kahimtang sa pag-ingon: “Aw, ilang maangkon ang dakong pagmaya ug kalipay.”

J. B., Canada

Latas sa katuigan, nakapatik kamig daghang direktang mga asoy mahitungod sa mga ginikanang nag-atiman ug baldadong anak. Among gibating may daghang bililhong impormasyon nga makahatag ug kaayohan sa uban diha sa susamang kahimtang ug ang pagpatik sa maong mga artikulo makapadasig sa uban. Tinong dili namo buot dugangan ang kasakitan sa mga pamilya nga may lisod kaayong suliran. Sa iyang asoy, si Anna Field miila nga ang matag kaso lahi ug nagkadaiya ang mga kahimtang sa panimalay. Bisan tuod sa ilang kahimtang may masulayon usab nga mga panahon ug kasubo, gibati niyang tim-os nga ang ilang baldadong anak babaye nakahatag kanilag labaw nga kalipay kay sa kasubo. Kami nalipay nga kana ang kahimtang. Sa samang panahon, kami nakaamgo nga mahimong may labi pang lisod nga mga kaso diin ang usa ka bata dili makasanong sa bisan unsang paagi nga makahatag ug kalipay sa iyang mga ginikanan. Ang mga ginikanan sa maong bata tinong takos sa mabinationg pagkamasinabtanon sa tanan ingon man sa nahiangayng tabang gikan sa ilang suod nga mga higala. Ang among kasingkasing tinong mahiadto sa tanang ginikanan sa maong lisod nga kahimtang.—ED.