Ang Pagkaikag sa Okulto

MAKAHAHADLOK, katingad-anan, makapanglimbawot—kining mga pulonga maoy gigamit sa daghang mga tawo sa pagbatbat sa okulto. Ang termino sa literal nagkahulogang “tinago,” “tinakpan,” “linilong.” Ang Webster’s Third New International Dictionary nagbatbat sa okulto: “Katingad-anang butang kun supernatural.”

Busa ang mga okultismo maoy mga eksperyensiya ug mga hitabo nga dili mabatbat sa normal nga paagi. Ang paranormal, gibatbat nga “dili ordinaryong hitabo nga dili arang mabatbat sa siyensiya,” maoy laing termino nga kanunayng gamiton dihang maghisgot ug okulto.

Sukad sa katuigang 1930, si Dr. Joseph Banks Rhine maoy nanguna sa mga pagtuon sa mga misteryo sa okultismo ug maoy nagpailaila sa terminong “extrasensory perception” (ESP). Siya nanagna nga, “samtang ang katin-awan sa siyentipikanhong pagdukiduki mokaylap sa mangitngit nga mga dapit diin nagpahipi gihapon ang misteryo,” ang okultismo mawala. “Sama nga mihatag dalan ang mga praktis sa okultismo sa siyensiya sa astronomiya, ang okultismo sa alchemy nahimong siyentipikanhong kemika, ang salamangkang pagpanambal gipulihan sa maayong medisina,” siya miingon, “busa sa ulahi ang mas kasaligang pundasyon pulihan sa nanghibiling mga sistema sa okulto.”

Apan, bisan pa sa masangkarong mga pagtuon sa okultismo, ang mga misteryo wala gihapon masulbad. Ug ang kaikag, inay magkawala, midako.

Mga Katarongan sa Kaikag

Tagda ang kaso ni Gng. Rosemary Brown. Sa bata pa, nakaagi siyag diyutayng pagbansay sa musika. Dili gani siya maikagon sa musika. Dayon, sa nagkaedad misugod siya sa paghimog mga komposisyon sa musika nga iyang giingong gidiktar kaniya ni Beethoven, Brahms, ug Schubert. Nagbatbat sa natukian sa iyang kaso, ang The New Encyclopædia Britannica, 1977, Macropædia, mitaho:

“Dihang kining [musikal nga komposisyon] gipakita sa iladong mga eksperto sila nagkauyon nga kon kining maong mga komposisyon nakit-an pa diha sa pipila ka napasagdang pulangki malantaw kini nga tinuod; ang matag usa dili lang kay usa ka maayong mga sanduloy kondili tinuod nga ekspresyon sa nailhang emosyon ug personalidad sa kompositor. Dayag nga bisan ang nabansayg maayong mga eksperto sa musika dili makahimo (kon makahimo man ugaling) ug komposisyon niining kalibreha; kon sa unsang paagi nahimo kini sa yanong nagtrabahong babaye nga wala kaayoy alamag sa musika makalibog kaayo, ilabina kay siya wala gayod sukad katudloi sa pagkomposo.”

Alang sa kadaghanan, ang maong mga eksperyensiya makaikag. Sa unsang paagi posible kini? Ang The New Encyclopædia Britannica miadmiter: “Ang ideya nga ang mga kalag niining mga musikerong Aleman mao ang nagdiktar sa ilang bag-ong mga komposisyon ning babayehana sa Ingles dili madanihon.” Ug bisan pa ang ensiklopedia miingon: “Ang kamatuoran dili kaduhaduhaan; walay nakuhang katin-awan. Busa, ang mga estorya sama ra sa daghan pang uban.”

Palandonga usab ang taho gikan sa Flixborough, South Humberside, England. Ang dakong pagbuto sa planta sa kemika nahitabo sa alas 4:53 s.h. sa miaging Hunyo 1, 1974. Hapit lima ka oras nga mas sayo pa usa ka batan-ong babaye nga nagpuyo sa mga 25 ka milya (40 km) ang gilay-on nag-ingon nga nakita niya sa balita sa telebisyon, nga nagbalita sa pagbuto ug sa kamatayon ug sa pagkasamdan sa mga trabahante sa planta. Sa wala pay alas 2:00 s.h. niadtong adlawa, iyang gisulti kini sa duha ka tawo nga miduaw kaniya. Dayon, diha sa balita sa TV sa gabii, gihatag ang oras sa pagbuto nga ulahi sa hapon. Ang tanang mga kompaniya sa TV nianang dapita milimod nga misibya sa maong balita sayo pa niana.

Ikaw ba, sama sa daghan pang uban, naikag sa maong mga eksperyensiya?

Nan adunay usa ka “dula” nga daw dili makadaot nga kalingawan. Dulaon kana sa usa ka gamit nga gitawag Ouija board. Samtang adunay mga kalainan ang tabla, sa kasagaran rektanggulo kini nga 24 por 18 pulgada (61 por 46 cm) ug un-kuwarto pulgada (0.6 cm) nga kabag-on. Diha niana mao ang mga titik sa alpabeto, usa ka laray sa mga numero gikan sa 1 ngadto sa 9 ug 0, ang pulong “Oo,” ug ang pulong “Dili.” Ang labing importanteng bahin mao ang gamay, pormag kasingkasing nga igtutudlo nga magatudlo sa kada letra aron mabasa ang mensahe.

Ibutang sa mga magdudula ang tabla sa ilang sabakan ug ipatong ang ilang mga tudlo diha sa pormag kasingkasing nga igtutudlo. Dayon mangutana sila ug maghulat sa tubag. Tinuod bang moobra kini? Daghan ang miingon nga miobra kini. “Usahay ang mga tubag sa katingalahan husto,” misulat ang kolumnistang si George R. Plagen. “Ang Ouija board nahibaloang nakatagnag mga hitabo nga sa ulahi nahitabo.”

Ang dula nakaikag sa milyonmilyon. Sa pagkatinuod, sa milabayng pipila ka tuig gitawag kadto nga mao “ang labing popular nga dula sa U.S.—mas popular kay sa Monopoly.”

Nagatubong Popularidad

“Dakong negosyo ang okulto, ang supernatural ug ang paranormal,” miingon ang U.S.News & World Report, “uban ang mga tawo gikan sa tanang matang sa kinabuhi nga nagabayad ug dagkong kantidad sa pagkonsulta sa mga magbabasa, sa mga mananagna ug ubang nag-angkong mga tigkitag panan-awon.”

Ang usa niining mga tigkitag panan-awon mao ang mga astrologo, mga sikiko, mga espiritista, ug ang ubang mga 600,000 ka tigpraktis ug okulto sa Tinipong Bansa, nga nagasukot ug bayad nga $300 alang sa ilang tambag. Minilyong mga dolyares ang nagasto usab sa mga magasin, mga libro, mga teyp, ug mga pelikula maylabot sa okultismo.

Ang kahimtang kaamgid sa Britanya. Ang mga tindahan nga nagasuplay pinaagi sa pagpedido-sa-koreryo ug mga libro ug mga butang nga gamiton sa mga praktis sa okulto nakaeksperyensiyag kusog nga negosyo. Ang usa sa dagkong mga suplayer sa Britanya gitaho nga nagaatiman sa “gatosgatos ka pedido matag semana ug may mga 20,000 ka regular nga mga kustomer sa iyang mga libro.”

“Sa miaging lima ka tuig,” mitaho ang Guardian sa London sa Marso 6, 1985, “gituohan nga adunay mga 60,000 ka ungo sa Britanya: karon ang numero gibanabana sa ubang mga ungo nga mitubo ngadto sa 80,000.”

Sa pagkatinuod, ang Kasadpang kalibotan nakaeksperyensiya nianang gitawag sa The World Book Encyclopedia nga “kaylap nga pagbalik sa okultismo.”

Bisan ug nakahatag kaikag ang okulto sa kadaghanan, unsay gipadayag sa pagdukiduki niini? May kapeligrohan bang nalangkit? Kon aduna, unsa sila?

[Letrato sa panid 4]

Ang pagpamaligyag mga butang maylabot sa okultismo maoy usa ka nagatubong negosyo