Unsay Nakadani sa mga Tawo sa Espiritismo?
ANG tubag sa maong pangutana magdependeg dako sa dapit, tinuohan, ug kultura sa usa ka tawo. Sa inyong lugar, unsay nakadani sa mga tawo sa espiritismo? Lagmit ang nakadani kanila mao ang usa sa mosunod.
● Pagkamaukiton Ang espiritismo misteryoso, ug ang mga tawo interesado kaayo bahin sa misteryosong mga butang. Busa gusto nilang mahibalo kon duna bay gahom nga nagpaluyo sa espiritismo. Ang pipila mosulay paggamit ug Ouija board o mobasag horoscope aron sa pagsuta kon matinuod ba ang giingon niini. Ang uban moduol ug espiritista aron makigsulti sa patay o kaha mokonsultag psychic.
● Kalingawan Niining di pa dugayng katuigan midagsang ang kalingawan—mga basahon, salida, ug mga dula sa kompiyuter—nga gipasukad sa espiritistikong mga ideya ug sa karaang paganong mga patuotuo. Ang pipila niini nagpasundayag usab ug grabeng kapintasan ug kahilayan.
● Kabalaka bahin sa umaabot Ang Bibliya nagtagna: “Sa kataposang mga adlaw moabot ang makuyaw nga mga panahong lisod sagubangon.” (2 Timoteo 3:1) Sa pagkatinuod, kita nagkinabuhi sa malisod nga panahon, ug daghang tawo ang mokonsultag mga espiritista, astrologo, mananag-an, manghihimalad, ug mga psychic, alang sa giya. “Usa kini sa pipila ka negosyo nga wala maapektohi sa pagkahugno sa ekonomiya,” matod sa usa ka psychic. “Kasagaran, ang mga tawo dili mokonsulta kanamo kon sila malipayon.” Ang usa ka mananag-an sa Canada miingon: “Sa kalit lang, ang mga propesyonal sa natad sa negosyo sekretong manawag gamit ang pribadong mga telepono sa ilang opisina o ang ilang cellphone.” Siya midugang: “Kaniadto, kining mga tawhana dili motuo ug dili ganahang mokonsulta sa mga psychic.”
● Pisikal nga sakit Sa pipila ka lugar, ang mga tawong dunay grabeng sakit sagad dili na moadto sa doktor kondili ngadto na sa mga tambalan. Gibarang kono sila maong nasakit. Aron maayo, dad-on sila sa ilang mga higala ug paryente ngadto sa mga tambalan, nga lagmit mangayog dakong kantidad.
● Tinguhang proteksiyonan ug suwertehon Sa pipila ka dapit sa Africa, ang mga tagabaryo magkuhag “propeta” gikan sa usa ka karismatik nga simbahan aron papahawaon ang daotang espiritu sa ilang lugar. Ang rituwal naglakip sa pag-inom ug lana ug bendita. Sa ubang dapit, ang mga tawo moduol sa mga espiritista kinsa maghimog mga rituwal diha sa ilang bag-ong balay o diha sa lubnganan, kay nagtuo sila nga ang espiritu sa mga patay makahatag kanilag suwerte.
● Pagdaot sa mga bata Sa Papua New Guinea, dili igawas sa inahan ang iyang bag-ong natawong anak panahon sa kagabhion. Ngano man? Mahadlok siya nga daoton ang bata sa daotang espiritu. Sa Uganda, ang mga inahan maghigot ug lambo sa kamot ug tiil sa masuso, nga sagad may mga lobitos ug kabhang sa kinhason aron dili kono daoton sa espiritu ang bata.
● Kamatayon sa usa ka minahal Ang Britanikong magsusulat nga si Sir Arthur Conan Doyle namatyag anak nga lalaki, igsoong lalaki, bayaw, ug pag-umangkong lalaki panahon sa Gubat sa Kalibotan I. Kay naguol ug nawad-ag paglaom, si Doyle ug ang iyang asawa miduol ug mga espiritista aron maestorya ang ilang namatayng anak. Bisan sa atong panahon, daghan ang mokonsultag mga espiritista aron maestorya ang ilang namatay nga mga minahal. Sa pipila ka nasod, ang tradisyonal nga mga relihiyon ug ang gikaingong Kristohanong mga relihiyon nagtudlo nga ang kamatayon gipahinabo sa nasuko nga mga espiritu. Aron mapugngan ang sunodsunod nga kamatayon diha sa komunidad, ang mga tawo kinahanglang mohimog gastosong mga rituwal.
● Kahadlok sa mga patay Ang mga patuotuo bahin sa kamatayon ug mga patay dakog impluwensiya sa mga tawo. Busa, sa daghang kayutaan ang mga tawo maghimog lainlaing rituwal, lakip na sa pagsamad sa kaugalingon, aron lukmayon ang patay o “pamatud-an” ang ilang gugma kanila. Diha sa pipila ka isla sa Pasipiko, ang mga balo kinahanglang maglúto ug magbangotan sulod sa pipila ka bulan, nga dili mogawas sa balay ug dili mokaon sa paboritong mga pagkaon sa ilang namatayng kapikas. Kadtong nagsunod niini nga kostumbre sagad mag-antos sa depresyon, masakit tungod sa kagutom, o mamatay pa gani.
Dayag, daghan ang hinungdan kon nganong ang mga tawo nadani sa espiritismo. Nan, hinungdanon gayod nga atong masabtan ang tinuod nga tinubdan sa mga pagtulon-an sa espiritismo! Aron mahimo kana, atong susihon ang Bibliya, ang bugtong basahon nga nagsaysay kon unsa gayoy nalangkit sa espiritismo.