Usa ka Mapihigong Kawatan

Ang tanan mahimong biktima sa mga kawatan. Sagad wala silay pilion, busa ang tanan sa kalit lamang mawad-an sa iyang pitaka, radyo sa kotse, bisikleta, o bisan unsang mahal nga butang. Sa dayag, apektado usab niini ang mga Saksi ni Jehova. Apan usahay may motunghang kawatan nga may konsensiya, sama sa giilustrar sa sunod nga eksperyensiya gikan sa Santo Dominggo, Dominican Republic.

“Usa ka adlaw sa tinghunlak, sayo sa buntag, mibangon ang akong asawa ug, sama sa iyang naandan, miadto sa pag-abri sa pultahan sa likod, ug nakakaplag nga may miguba sa kandado sa lawak sa likod. Bisag may bililhon kaming mga butang didto, walay nawala. Apan sa among katingala may nagbilin niining sulata diha sa pultahan: ‘Mga tagbalay ning matahom nga balay, pasayloa ako sa akong pagguba sa kandado. Kawatan ako ug mianhi sa pagkuha sa tanan nga ania dinhi, apan nasayran ko nga dinhi mao ang Kristohanong mga Saksi ni Jehova, ug tungod niana wala nako kana buhata. Mangawat ako sa uban, apan kamo gitahod ko.’”

Sa unsang paagi nasayod ang kawatan nga kini sila mga Saksi? Tungod kay diha sa lawak sa likod dihay ilang mga literatura sa Bibliya ug mga magasin (Bantayanang Torre ug Pagmata!). Bisag gikawatan ang mga silingan niadtong gabhiona, ang mga Saksi wala.

Ang mga Saksi maapektohan sa ‘panahon ug dili-mahibaloang mga hitabo’ saman sa uban. Apan, usahay, may balos nga mailhang usa sa mga Saksi ni Jehova.—Ecclesiastes 9:11.