Ang Pagpakigsuod sa Diyos Nakatabang Kanako sa Pagsagubang

WALA akoy interes sa relihiyon. Ang tanang organisadong relihiyon morag salingkapaw alang kanako. Wala akoy nakitang nahimong kaayohan niini alang sa katawhan, gawas nga naghimo kanila nga mapihigon sa uban. Kadto maoy sa hinapos sa katuigang ’60. Usa ka presidente sa T.B. ang gipatay, ug linibo ang nangamatay sa gubat sa Vietnam. Gubot ang kalibotan. Nagakabungkag ang akong kaugalingong kinabuhi. Sa unsang paagi nga adunay Diyos nga nagatagad bahin kanako o sa katawhan?

Ako 27 anyos, minyo nga may duha ka gagmayng anak, ug nagtrabaho nga bug-os-panahon sa usa ka ospital sa mga buang dihang usa ka silingan misugod sa pagpakigsulti kanako mahitungod sa Bibliya. Makapahibulong, ako namati. Siya mihisgot mahitungod sa gitawag niyang kataposang mga adlaw. Siya lahi nga pamation, ug ako buot ug mga tubag. Gibinlan niya ako ug usa ka libro nga nag-ulohang Ang Kamatuoran nga Motultol sa Kinabuhing Dayon. Gibasa ko kini sa usa lang ka gabii, gisusi ang tanang kasulatan, ug nahibulong, ‘Nakaplagan ko na ba gayod ang kamatuoran?’

Kon nakaplagan ko kini, nakahatag kinig suliran. Natawo ako sa usa ka pamilyang Hudiyo, may bana nga Hudiyo ug duha ka gagmayng mga anak, ug mga paryente nga Hudiyo. Nasayod ako nga sila masuko kon ako mahimong usa sa mga Saksi ni Jehova. Dili ko buot nga sakiton ang akong pamilya nga wala kinahanglana; kinahanglang tinoon ko kini. Misugod ako sa pagbasa nga maikagon sa mga literatura sa Bibliya. Sulod sa usa ka semana ako nakombinser nga kini mao ang kamatuoran. Ang pagtuon sa kamatuoran maoy usa ka butang angay kong himoon. Busa misugod ako sa pagtuon uban sa mga Saksi ni Jehova. Sa pipila ka semana gisangyawan ko ang tanan. Nalipay ako nga nahibalo nga ang ngalan sa Diyos mao si Jehova, nga siya nagtagad kanako ug sa tanang katawhan, ug nga ang kinabuhing walay kataposan sa paraiso sa yuta posible. Ako gibawtismohan sa Hunyo 12, 1970.

Sama sa akong pagduda, wala malipay ang akong pamilya ingon man ang akong mga ugangan, ug ang uban misalikway kanako. Hunonghunong ang pagtuon sa akong bana sa daghang tuig apan wala gayod mahimong magtutuo. Ang akong mga anak, hinunoa, nahimong mga Saksi ni Jehova. Sukad sa sinugdan, buot ko nga mahimong bug-os-panahong ministro, nga nagasangyaw sa maayong balita sa Gingharian sa Diyos sa pultahan-ug-pultahan. Apan ako may nagdako nga pamilya ug usa ka dili magtutuong bana. Bisag ako nagtrabaho nga bug-os-panahon, naembargohan akog duha ka balay, ug daghang higayon nga walay kapuy-an. Lisod kaayo ang kinabuhi.

Usa ka higayon ang among balay narimate. Kinahanglang mohawa kami sa maong balay pagkaudto sa Dominggo, ug kami walay dapit nga kapuy-an. Gibuhat ko ang tanan nga akong mahimo, ug sa kataposan sa Sabado sa buntag, ang adlaw una pa ang Dominggo, ako mihukom sumala sa giingon ni Jesus sa Mateo 6:33​—unaha pagpangita ang Gingharian ug naghulat kang Jehova nga motagana sa mga butang akong gikinahanglan. Migula ako sa akong publikong ministeryo. Nahinumdoman ko ang paghilak tungod sa kabug-at nga gipahinabo sa situwasyon, apan sulod sa lima ka minutos maayo na ang akong gibati. Nakita ko kanunay nga ang pagsangyaw adunay positibo kaayong epekto kanako; kini nagdasig kanako bisan pa sa akong mga problema, ug ang espiritu ni Jehova naghimo kanakong malipayon ug mabungahon ug naghatag ug kahulogan sa akong kinabuhi. Bisan pa, sa dihang mipauli ako sa balay niadtong adlawa, kami wala gihapoy dapit nga kaadtoan, apan maayo ang akong gibati.

Niadtong gabhiona nakadawat kami ug tawag gikan sa ahensiya sa balay-ug-yuta nga nagdumala sa among mga panginahanglan. Alas 11:30 s.g. na kadto, ug ang ahensiya sa balay-ug-yuta nabalaka kaayo nga kami walay dapit nga kapuy-an nga siya nangitag dapit alang kanamo nga temporaryo nga kapuy-an hangtod ang balay nga gilaoman namo nga mabatonan andam na. Busa gibalhin kami sa isigka-Saksi sa maong balay sa Dominggo. Kami mipuyo didto, ang among mga gamit nakakahon pa, sa tulo ka semana ug kami mibalhin sa among balay sa dihang kini naandam na. Dili kadto sayon, apan si Jehova mitagana gayod sa among panginahanglan. Kini nakapalig-on kaayo kanako ug nagpalagsik sa akong pagtuo. Kadto sama sa giingon ni Haring David sa Salmo 37:25: “Kaniadto ako usa ka batan-on, ako usab natigulang na, ug bisan pa wala ako makakitag tawong matarong nga gibiyaan, ni ang iyang mga anak nga nagapangita ug tinapay.”

Dihay problema sa pagdumala sa kuwarta sa pamilya. Usahay ako ang mangabaga sa pagdumala sa salapi ug gihusay ang tanang butang. Naningkamot gayod ako nga dili-mabungkag ang kaminyoon niining mga tuiga, tungod ilabina sa akong gugma kang Jehova ug sa iyang pagtamod sa kahikayan sa kaminyoon, ug sa sulod naglaom ako nga ang akong bana mag-usab ug makadangat sa kamatuoran.

Kanunay akong nag-ampo bahin sa regular nga pagpayunir, ug nagpalista ingong oksilyare payunir sa matag higayon.a Nasayod ako nga ang pagsangyaw mao ang pinakamaayo ug labing hinungdanong paagi nga magamit ko ang akong kinabuhi. Gihigugma ko si Jehova ug buot ko nga mag-alagad kaniya nga bug-os-kalag. Gihigugma ko usab ang mga tawo ug buot nga tabangan sila. Napabilhan ko gikan sa akong kalisod sa kinabuhi kon unsa ka mapuslanon ang mga prinsipyo sa Bibliya ug nasayod nga gikinahanglan sa katawhan ang paglaom nga gitagana sa Gingharian. Apan nahadlok ako nga ang akong pamilya dili mabuhi kon dili ako motrabaho. Kami halos na nga dili mabuhi.

Misinggit Ako, Mikalagiw ang Manlulugos

Dayon may nahitabo sa akong kinabuhi nga naghatag kanakog pagtuo nga si Jehova motagana gayod kanunay ug nagatagad kanako. Dihay milungkab sa akong balay ug buot nga molugos kanako. Giatake niya ako samtang ako natulog, ug sa dihang ako nakamata, mibahad siya nga iya akong patyon kon mosinggit ako o molihok. Bisag ako nalisang, gitabangan ako ni Jehova nga magmakalmado ug may kaabtik sa hunahuna sa pag-ampo ug sa pagpalandong sa labing maayong lakang nga pagahimoon. Nasayod ako sa giingon sa Bibliya bahin sa pagsinggit, apan gibati ko usab nga basin iya akong patyon kon mosinggit ako, ug unya makamata ang akong mga anak, ug iya silang patyon. Ingon sa daw nakita ko nga mikidlap ang akong ngalan sa talaan sa mga patay ug nag-ampo nga panalipdan ni Jehova ang akong mga anak kon ako mamatay. Bisan pa, gibuhat ko ang gitudlo sa Bibliya​—misinggit ako. (Deuteronomio 22:26, 27) Mikalagiw ang manlulugos. Abi nako ug mamatay na ako niadtong gabhiona. Mas nasuod pa ako kang Jehova.

Miundang ako sa akong trabaho ug misugod sa pag-alagad ingong regular payunir sa 1975. Sa unom ka tuig ako nagpayunir, ug ang akong bana nagbayad sa mga balayronon. Makasubo, nagkasakit ako ug diabetes nga bata pa ug grabe kaayo ang akong sakit sa usa ka panahon. Aron makasagubang, labaw pa akong misalig kang Jehova. Bisan pa sa akong kahimtang, kadto ang labing malipayon ug labing mabungahong mga tuig nga akong naagian sukad niadtong higayona. Si Jehova nagpanalangin kanako ug daghang mga estudyante sa Bibliya kinsa miuswag ngadto sa pagpabawtismo. Ang uban nangahimo mismong mga payunir.

Dayon, sa 1980, nabungkag ang among mga kinabuhi. Nagbulag kami sa akong bana. Naguol kaayo ang akong mga anak, busa tungod ug alang kanila gisulayan ko ang pagsalbar sa among kaminyoon, apan ang akong bana wala mosanong sa akong mga paningkamot. Niining puntoha, nasayod ako nga panahon na nga mokuha ug Kasulatanhong diborsiyo. Magun-obon ang epekto sa iyang pagbiya sa among mga anak.

Naningkamot ako ug maayo nga magpadayon sa pagpayunir niining panahona ug nakahimo sa pagpadayon sa mga usa ka tuig. Apan, ang akong anak nga babaye, wala makasagubang sa kahimtang, misugod sa pagrebelde batok sa tanang butang, lakip kanako ug sa kamatuoran. Mihunong ako sa akong pagpayunir niining higayona tungod sa iyang paggawi. Naguol kaayo ako niini; naputol ang gabay ko sa kinabuhi. Gibati ko gayod nga nag-inusara, ingon sa daw ang tanan nawala gawas kang Jehova.

Niining panahona nga si Jehova mitaganag duha ka minahal nga mga igsoong lalaki kinsa mitabang kanako labaw kay sa ilang nahibaloan. Ang usa maoy magtatan-aw sa sirkito, ug ang lain maoy usa ka ansiano sa laing kongregasyon kinsa nasayod sa among kahimtang, sanglit siya nakatuon uban sa akong bana. Dili ko arang kapasalamatan si Jehova alang niining mga gasa diha sa mga lalaki. Mahal ko gayod sila kanunay.

Dili kaayo dugay human niadto, sa bata pa kaayo, nagminyo ang akong anak nga babaye gawas sa kamatuoran. Kini nakapusgay sa pamilya ug nagbug-os sa among kasubo. Ang akong anak lalaki nagkinaugalingon human dayon niadto. Nag-ampo ako kanunay kang Jehova nga tabangan ang akong pamilya nga makalahutay sa kamatuoran. Bililhon kaayo sila alang kanako, ug ang bugtong butang nga buot ko kaayo mao nga sila magpabilin uban ni Jehova. Mao kini kanunay ang akong pag-ampo sulod sa akong kinabuhi diha sa kamatuoran. Kadtong panahona maoy labing malisod alang nako kay sa tibuok 20 ka tuig nga kaminyoon​—ug kini nga kaminyoon dili-maayo. Bisan pa, nasayod ako nga sa usa ka paagi tabangan kami ni Jehova nga makalahutay niini, ug bisag unsa pay modangat, kinahanglang buhaton ko ang iyang kabubut-on.

Usa ka hitabo ang nahinumdoman ko pag-ayo. Ako payunir pa, ug kami walay kuwarta apan nanginahanglag mga $70 aron makalahutay sa semana ug may ikapamilite alang sa sunod semana nga trabaho. Nagtrabaho ako ug duha ka adlaw ingong temporaryong empliyado. Sagad, maghulat ako ug mga usa ka semana aron madawat ko ang akong suweldo​—mga $40. Wala akoy kuwarta alang sa pagkaon, labi na sa pamilite. Sa pagkasunod gabii may pagtuon ako sa Bibliya uban sa usa ka babaye nga mihatag kanako ug plete sa tren nga nagadagan sa ilalom sa yuta.

Adlawng Biyernes ang pagkasunod buntag. Gikuha ko ang mga sulat, ug dihay duha ka sulat. Ang usa tseke nga gipaabot ko sa sunod pa nga semana. Kadto miabot sa bangko sa siyudad ug gideposito diha sa akong kuwenta sa walay tulo ka adlaw. Nahingangha ako. Nagkinahanglan gihapon ako ug $29 o $30 aron makalahutay. Sa ikaduhang sobre may usa ka tseke nga $29, mao gayoy akong gikinahanglan. Sa pagkakatingalahan gayod niini nga sa Pebrero niadtong tuiga, gihatagan ako sa gobiyerno ug gasa nga kuwarta alang sa asiete sa pagpainit sa akong balay. Agosto na kadto, ug gihukom nila nga nakautang sila kanako ug $29​—sa Agosto, alang sa pagpainit? Nganong nakahunahuna man sila nga nakautang sila kanako, ug asiete sa Agosto pa? Pagkamakapalig-on sa pagtuo ang epekto niini kanako!

Materyal nga mga Butang Dili Mao ang Tubag

Misugod ako sa pagtrabaho nga bug-os-panahon ug nakakat-on sa paggamit ug kompiyuter sa akong mga trabaho. Ang mga tuig nga wala ako magpayunir malisod kaayo. Bisag ako may maayong trabaho ug maarang-arang na sa pinansiyal ug materyal nga mga butang, ako dili malipayon. Ang akong mga anak nagkinaugalingon ug dunay lisod kaayong mga problema. Ang akong anak nga babaye misugod na sa pagbalik sa kamatuoran apan may mga suliran gihapon. Ang akong anak lalaki may mga problema usab. Human sa dugay-dugay nga panahon, gibati ko nga nagkawala ang suod ko kaayo nga relasyon kang Jehova nga akong gipakahamili pag-ayo. Gibati ko nga nagakalayo ako kang Jehova bisan tuod walay usa ang nakamatikod niini. Tigtambongan kanunay ako sa mga tigom, nagtuon, mogula sa pagsangyaw, apan dili pa kadto igo. Misulay ako sa dugang nga pagpakig-uban sa mga higala, apan kana wala gihapon makatabang.

Misugod ako pagbati ug kaluoy sa akong kaugalingon. Misugod ako sa pagsusi sa sulod ug gipamalandong ang akong kaugalingon. Dili ba ako takos nga makabaton ug labaw pa? Dayag, mao kanay gusto ni Satanas. Sa unang higayon, naamgohan ko nga misugod ako sa pagkadani sa akong mga kauban sa trabaho. Ako naghunahuna, ‘Aw, sangyawan ko sila.’ Ug tinuod gihimo ko kana. Apan sa sulod akong nasabot nga ang akong kasingkasing nagsugod sa pagpalabay sa mga butang nga dili angay palabyon. Dili kadto mga problema sa gawas nako. Ako mao ang problema. Dili ako makapalayo gikan sa akong binansay-sa-Bibliya nga konsensiya. Miampo ako kang Jehova.

Nagtrabaho ako nga bug-os-panahon. Kinahanglang biyaan ko ang materyal nga kasegurohan nga akong natigom. Tulo ka oras ang akong pagbiyahe idabuwelta gikan sa Long Island ngadto sa Wall Street. Daghan ra kaayong panahon! Usab, ang pagpakiglabot sa daghang tawong kalibotanon diha sa mga tren wala makatabang. Nakig-estorya ako sa mga ansiano ug mitambong ug mga asembliya sa mga hinapos sa semana aron tabangan ako nga makapamalandong sa hinungdanong mga butang. Sa unang higayon sa akong kinabuhi, wala ako mabalaka bahin sa materyal nga mga butang, busa nganong buot ko na usab karong mangamas? Tapos sa usa ka tuig nga pag-ampo, mainampingong gipalandong ko ug maayo kon gikinahanglan ko ba nga mohimog kausaban sa akong kahimtang, gibuhat ko kana.

Mibalhin ako sa dapit sa Brooklyn Heights. Nakaduaw ako sa kongregasyon ug nahibalo nga ang espirituwalidad didto mao gayod ang akong gikinahanglan. Daghan kaayong matinumanong mga Saksi, nag-alagad nga bug-os panahon sa daghang katuigan​—mihatag kini kanako ug gaan nga pagbati. Sulod sa unom ka bulan andam na ako sa paghunong sa akong karera ug nagpayunir. Mikuha akog part-time nga trabaho, ug sa 1984, natudlo na usab ako ingong regular payunir.

Sa daghang katuigan, gihatagan ako ni Jehova ug kahibulongang mga panalangin, ingon man may daghan, daghang bililhong mga leksiyon. Gisulayan ko nga magpabiling positibo ug sa pagkat-on gikan sa leksiyon sa matag pagsulay. Dili ikaulaw nga makabatog mga problema; ang sala modangat tungod sa dili paggamit sa mga prinsipyo sa Bibliya sa pagsulbad niini. Dinhi sa Brooklyn, ako walay samang mga problema nga naagian ko sa unang katuigan sa kamatuoran. Ang panalapi dili suliran. Ang dili-magtutuo nga bana dili na suliran. Naayo na ang akong kasingkasing. Gipanalanginan ako ug daghang espirituwal nga mga anak.

Apan adunay bag-ong mga suliran ug mga hagit kanunay. Sa 1987 ang akong anak nga lalaki, si Marc, giatake sa nerbiyos ug nag-antos sa grabeng depresyon, apan gitabangan kami ni Jehova nga makalahutay niana. Si Marc karon nagapaningkamot ug maayog lakat diha sa kongregasyon. Ang akong anak nga babaye, si Andrea, mibalik sa kamatuoran ug nabawtismohan ug nagpadako sa iyang mga anak diha sa kamatuoran. Sanglit kita nagkahiduol na sa dakong kasakitan, ako nagtuo nga magpadayon ang mga suliran ug tingali mas dako pa, apan si Jehova anaa kanunay sa pagtabang kanato latas sa bisan unsang mga kababagan o mga hagit nga moabot.

Sa pagkatinuod, gitabangan ako ni Jehova nga makabaton ug malipayon ug mabungahon kaayong kinabuhi. Nagalantaw ako sa unahan sa paggugol sa nahibilin niini sa pagpakigsuod kaniya ug sa pagbuhat sa iyang kabubut-on.​—Sumala sa giasoy ni Marlene Pavlow.

[Footnote]

[Hulagway sa panid 23]

Si Marlene Pavlow, bug-os-panahong magsasangyaw sa maayong balita sa Gingharian