Mga Mata Diha sa Panganod

ANG pagbangga sa mga langgam sa mga komersiyal nga mga ayroplano dili lamang dakog gastos alang sa mga kompaniya sa ayroplano kondili peligroso pa gayod. Diha sa usa ka paningkamot sa pagpamenos sa gidaghanon sa panagbangga sa panganod, nakadiskobre ang All-Nippon Airways sa Japan ug bag-ong paagi sa pag-abog sa mga langgam nga nanaglupad duol sa ilang mga ayroplano. Sa unsang paagi?

Pinaagi sa pagdibuho ug makahahadlok-tan-awong mga mata diha sa engine intake sa ayroplanong jet niini, miingon ang magasing International Wildlife. Mibatbat ang artikulo nga gipintalan sa kompaniya sa ayroplano ug mga mata ang ilang 26 ka dagkog-lawas nga mga ayroplano ug ang nahibilin wala pintali. Sa kataposan sa usa ka tuig nga eksperimento, usa lamang ka langgam sa aberids ang nabangga sa mga makina nga gipintalan ug makahahadlok-tan-awong mga mata. Kon itandi, nuybe ka langgam sa aberids ang nabangga sa wala-pintaling mga makinang jet.

Ang gastos sa kadaot sulod sa usa ka tuig nga yugto sa pag-eksperimento gibanabana nga $720,000, miubos gikan sa $910,000. Tungod sa kalamposan sa eksperimento, ang All-Nipon Airways nagplano sa pagpintal ug mga mata diha sa iyang tanang dagkog-lawas nga mga ayroplano.