Mga Pag-ampo Alang sa Kalinaw—Kinsay Nagapamati Kanila?

UNSA bay gibuhat sa usa ka Amerikanong Indian, nga nagsul-ob sa bug-os balhibong putong sa ulo, diha sa samang entablado ingon man sa usa ka paring Gregong Ortodokso? Nganong ang Budhistang Dalai Lama naglingkod tapad sa Arsobispo sa Canterbury? Unsa bay gihiusahan sa usa ka Hudiyong rabbi uban sa usa ka metropolitano sa Rusong Ortodoksong Iglesya? Ug nganong si Papa Juan Paulo II sa Iglesya Katolika nagdumala sa maong katigoman?

Dili pa dugay imposible untang ang papa makig-ambit sa usa ka entablado sa pag-ampo uban sa mga pangulo sa ubang dagkong relihiyon. Bisan pa niana, sa hinapos sa 1986, sa Italyanhong siyudad sa Assisi, siya miduyog nianang tanang ubang relihiyon aron sa pagsaulog sa “Adlaw sa Pag-ampo Alang sa Kalinaw sa Kalibotan.” Ang katigoman gipasiugda sa papa nga nahiuyon sa pagtawag sa Hiniusang Kanasoran sa 1986 ingong Internasyonal nga Tuig sa Kalinaw.

Sa Assisi, may nagkadaiyang pag-ampo alang sa kalinaw. Apan kinsay namati kanila? Ang Trinidadnong Diyos sa Kakristiyanohan? O ang Diyos sa mga Hudiyo? Si Allah sa mga Muslim? Ang Dakong Kumagko ug Nagdahunog nga Dalugdog sa mga animista? May usa ba nianang maong mga diyos ang namati sa maong mga pag-ampo? Karong nakalabay na ang taastaas nga panahon sukad sa Assisi, ang mga tubag dayag.

Kon Unsay Nahitabo

Ang mga pag-ampo niadtong relihiyosong mga pangulo mao ang tayuktok sa internasyonal nga adlaw sa pag-ampo nga gihimo sa Assisi sa sentral nga Italya niadtong Oktubre 27. Ang usa ka dakong entablado gitukod, uban sa pulong “KALINAW” diha sa 14 ka pinulongan sa luyo. Nga gihikay nga dakong semisirkulo, nga ang papa diha sa sentro, kapin sa 60 ka pangulo sa dagkong mga relihiyon nagturnoturno sa pag-ampo gikan sa tindoganan sa mamumulong. Ang mga kamera sa telebisyon nagkobre sa seremonyas nga giingong gilantaw sa 500 milyong tawo sa tibuok kalibotan.

Ang unang nag-ampo mao ang mga Budhista, kinsa nangayo sa “lawod sa kalipay ug kangaya.” Unya ang mga Hindu nangaliyupo sa “pakigdait alang sa tanang tawo.” Ang mga Muslim miampo: “Dayegon ang Diyos, ang Ginoo sa Uniberso.”

“Hatagi kamig kalinaw,” mao ang pangaliya sa Aprikanong mga animista samtang ilang gihangyo ang ilang mga diyos. “Among ginatanyag ang Kuwako ngadto sa Dakong Espiritu, ngadto sa Inahang Yuta,” matud sa Amerikanong mga Indian samtang ilang giyupyop ang kuwako sa kalinaw. “Hatagig kalinaw ang yuta,” mihangyo ang mga Hudiyo.

“Sa kalinaw ug panaghiusa atong hangyoon ang atong Ginoong Diyos,” mao ang pag-ampo sa Katoliko, Anglikano, Luterano, ug Gregong Ortodoksong mga hawas. Ang mga Sikh, Zoroastriano, Shintoista, ug Jain miampo usab alang sa kalinaw sa tibuok kalibotan.

Okasyon Gihimong Inila

Kadto ang unang panahon, mikomento ang prensa, nga ang maong tag-as-ranggong klero sa mga relihiyon sa kalibotan nagkatigom sa samang dapit aron sa pag-ampo. Tungod niini ang miting gitawag usa ka “makasaysayanhong okasyon.”

Gituohan sa pipila nga ang tagna sa Bibliya natuman didto. Sanglit ang Assisi nahimutang ibabaw sa usa ka bungtod, ilang giisip kadto ang simbolikong bukid sa Miqueas kapitulo 4 bersikulo 2. Ang usa ka taho miingon nga ang panagkatigom sa Assisi maoy “usa ka panagkatigom nga gitagna sa propetang si Miqueas 2,700 ka tuig kanhi: ‘Sa [panahon sa] kataposan ang bukid diin ang templo sa Ginoo nagabarog mao unya ang kinatas-an . . . Ang tanang mga katawhan magtigom sa tiilan niini ug moingon: Manungas kita ngadto sa bukid sa Ginoo. Siya magatudlo kanato kon unsay atong pagabuhaton.’”—Voce delle Contrade.

Ang magasing Il Sabato madasigong miingon: “Kini ang unang panahon ang ingon nga matang sa tigom nahitabo sukad sa Torre sa Babel. Niadto, tungod sa ilang tinguhang makaabot sa mga langit, ang mga tawo nabahin. Karong adlawa, sa ngalan sa relihiyosong mga pagbati nga nagbukas kanila alang sa gasa sa Diyos, ang kalinaw, ang mga tawo nahiusa.”

Maugdang nga mga Pangutana Gipatungha

Ang okasyon pihong talagsaon. Bisan pa niana, kadto nagpatunghag nahiangayng mga pangutana. Ang peryodikong La Nazione nangutana: “Kadto bang mensahe mialagad sa iyang katuyoan? Kadto kaha nakaabot sa mga kasingkasing sa katunga sa bilyong tumatan-aw? Kadto kaha nakatipak sa batoong mga posisyon niadtong si kinsa, sa direkta o dili direkta, maoy magahukom ug magatultol sa mga hitabo ug sa dulnganan sa kalibotan?”

Ang nagahunahunang mga tawo nangutanag laing modulot nga mga pangutana: Ang Diyos nagadawat kaha sa tanang pag-ampo walay sapayan sa matang sa pagsimbang ginatuman? Igo na ba ang pag-ampo alang sa usa ka butang nga walay pagtino kon unsay hunahuna sa Diyos bahin niana? Ang katawhan sa maong panagkatigom nahaylo ba sa pagbuhat alang sa kalinaw? Unsay ginatudlo kanato sa kagahapon? Ug labaw sa tanan, unsay ginaingon sa Kasulatan mahitungod sa kon unsaon sa pagkakab-ot sa kalinaw sa kalibotan?

Mangutana usab gayod kita: Ang panagkatigom sa mga relihiyon niining kalibotana didto sa Assisi sa pagkamatuod mao bay usa ka modernong-adlawng Torre sa Babel?