Usa ka Modernong Torre sa Babel?

ANG karaang Torre sa Babel nahimong simbolo sa kalibog ug pagbahinbahin. Maoy didto, mga 4,000 ka tuig kanhi, nga gilibog sa Diyos ang pinulongan sa katawhan. Ngano? Tungod sa ilang pagrebelde kaniya. Ilang gisalikway ang pagkamasinugtanon ngadto sa Diyos ug nagsentro hinuon sa ilang mga kinabuhi diha sa mga plano sa mga tawong dili hingpit. Busa gipatibulaag sila sa Diyos.—Genesis 11:1-9.

Ang nahitabo sa Assisi lahi ba gayod? Ang mga tawo tukma bang nahiusa pag-usab didto? Ang relihiyosong mga pangulo sa kapin sa duha ka bilyong tawo nagpasiugda ba gayod sa kalinaw sa kalibotan?

May Panaghiusa Ba?

Sa usa ka pakigpulong nga gihatag pila ra ka adlaw nga miagi, ang papa nagpasiugda: “Ang mahitabo sa Assisi tinong dili mahimong relihiyosong syncretismo [paghiusa].” Siya midugang: “Kita dili makaampo nga magkahiusa, nga mao, mag-usa sa usa ra ka pag-ampo, apan kita mahimong presente samtang ang uban nagaampo.”

Busa gipaila sa papa nga ang sukdanan nga gisunod sa pag-ampo alang sa kalinaw mao ang magtingob aron sa pag-ampo, dili pag-ampo sa tingob. Ang pipila mipahayag nga buot niyang molikay sa pag-apil sa gikahiusang pag-ampo. Nianang paagiha siya dili masumbong sa mga Katoliko nga nagsagol sa nagkalainlaing relihiyosong pagtuo.

Kini gipamatud-an sa pakigpulong sa pag-abiabi sa papa ngadto sa relihiyosong mga pangulo niadtong buntaga. Mapasiugdahon niyang gipunting: “Ang kamatuorang kita nanganhi dinhi wala magpasabot sa bisan unsang tuyo sa pagpangitag usa ka relihiyosong pagtuo sa atong taliwala o sa pagsabutsabot sa atong pagtuo. Ni kini nagkahulogang ang mga relihiyon mahimong magkauyon sa lebel sa samang pagkakomitir diha sa usa ka yutan-ong proyekto nga molabaw kanilang tanan.”

Nan, tinong walay paningkamot nga magkauyon ang daghang kalainan sa relihiyosong mga pagtulon-an nga gihawasan niadtong nagkatigom sa Assisi. Busa ang relihiyosong panaghiusa maoy imposible. Ang paglibog sa ‘relihiyosong mga dila’ magpadayon. Busa, adunay talagsaong kasamahan ngadto sa karaang Torre sa Babel.

Kining relihiyosong kawalay-panaghiusa dayag diha sa usa ka sampol sa mga tinuohan. Pananglitan, ang Budhismo wala magdawat sa paglungtad sa usa ka personal nga Diyos, nga nagtudlong ang kinalabwang tumong sa tawo mao ang Nirvana, ang kahimtang sa absolutong pagkabulahan nga makab-ot pinaagi sa pagkalaglag sa kaugalingon. Ang mga Hindu nagtuo sa minilyong diyos ug sa mapinadayonong siklo sa mga reinkarnasyon nga mahimong mosangko sa Nirvana. Ang Katoliko, Ortodokso, ug Protestanteng mga relihiyon nagtuo sa Trinidad. Apan ang mga Muslim nagtuo nga adunay usa ka Diyos, si Allah, ug nga si Muhammad mao ang iyang propeta; bisan pa niana, sila dili motuo nga ang Diyos adunay usa ka anak. Ang mga Hudiyo nagasimba sa usa ka Diyos apan dili modawat kang Jesus ingong ang Mesiyas. Ang Aprikanhong mga relihiyon nagtuo nga ang mga tanom, mga hayop, ug walay-kinabuhing mga butang may espiritu. Ang Amerikanong mga Indian nagasimba sa mga puwersa sa kinaiyahan.

Bisan pa niana, ang matuod nga kalinaw nagapasabot sa labing menos paninugdang pagkatingob, o pagkausa, sa nagkalainlaing mga katawhan. Apan ang mga relihiyong nagtigom sa Assisi nabahin sa labihan nga sila dili gani magkauyon sa usa ka gikahiusang pag-ampo! Tino, ang Diyos dili makauyon niining tanang nagkabanging ideya tungod kay, misulat si apostol Pablo, “Ang Diyos maoy Diyos, dili sa kagubot, kondili sa pakigdait.”—1 Corinto 14:33.

Ang Diyos Nagapamati Ba?

Sa unsang paagi ang bugtong matuod nga Diyos, ang Maglalalang sa langit ug sa yuta, makapamati nga may pag-uyon sa mga pag-ampo sa relihiyosong mga pangulo nga walay tuyo sa pagbuhat alang sa matuod nga panaghiusa? Ang kaugalingong dinasig nga Pulong sa Diyos tin-awng nagapahayag nga kadtong nagatuman sa matuod nga pagsimba “angay magasulti nga may panagkauyon, ug angay nga walay mga pagbahinbahin sa [ilang] taliwala, kondili [sila] tukmang mahiusa sa samang kaisipan ug sa samang panghunahuna.”—1 Corinto 1:10.

Kon ang Diyos mamati niining nabahing mga relihiyon, siya nagasupak sa iyang kaugalingon. Kana magpaila sa iyang pag-uyon sa butang iyang ginatunglo—ang pagkabahinbahin. Apan ang Diyos sa kamatuoran dili mahimong sad-an sa dobleng sukdanan. Siya dili mosupak sa iyang kaugalingong Pulong, kay “ang Diyos . . . dili makabakak.” (Tito 1:2) Busa, siya dili mamati nga may pag-uyon sa mga pag-ampo sa maong nabahin nga pagsimba.

Ang Bibliya tin-awng nagapakita nga ang Diyos nagauyon lamang sa pag-ampo nga nahiuyon sa iyang kabubut-on. Si Jesus miingon: “Dili ang tanang magaingon kanako, ‘Ginoo, Ginoo,’ mosulod sa gingharian sa mga langit, kondili ang nagabuhat sa kabubut-on sa akong Amahan nga anaa sa mga langit.” Siya miingon usab nga ang Diyos “nagapangita,” nga mao, siya nagauyon ug nagapamati lamang niadtong nagasimba kaniya “uban sa espiritu ug sa kamatuoran.” Kana mahimo pinaagi sa pagbantay sa iyang Pulong ug pagsugot sa iyang mga sugo. Busa ang Diyos dili mouyon sa mga relihiyon nga wala magbuhat sa iyang kabubut-on, maingon nga siya wala mouyon sa mga magtutukod sa Torre sa Babel, kinsa wala usab magbuhat sa iyang kabubut-on. Iyang ginasalikway kana sila. Sumala sa giingon ni Jesus ngadto niadtong nagabuhat sa ilang kaugalingong kabubut-on inay ang kabubut-on sa Diyos: “Pahilayo kamo kanako, kamong mga mamumuhat sa pagkadaotan.”—Mateo 7:21-23; Juan 4:23, 24.

Busa, ang espirituwal nga kahimtang sa mga relihiyon nga nagtigom sa Assisi mao ang kaatbang sa gikinahanglan sa Diyos gikan sa matuod nga mga magsisimba. Inay sa pagkahiusa sa samang kaisipan ug hunahuna, sila gilukoban sa pagkabahinbahin, sama sa naglungtad sa Torre sa Babel.

Ang kamatuorang ang Diyos dili mamating may pag-uyon sa mga pag-ampo sa samag-Babel nga mga relihiyon niining kalibotana mas madayag kon atong susihon ang pamatuod sa kasaysayan. Unsang matang sa hulagway ang igahatag sa maong pamatuod?

[Letrato sa panid 6]

Usa ka Babilonyanhong templong torre