Gikan sa Among mga Magbabasa

Phobias

Buot ko kamong pasalamatan tungod sa artikulong “Phobias—Those Mysterious Fears.” (Pebrero 8, 1987 sa Ingles) Ako kanunayng maulaw nga mohisgot niini sa uban, apan sa bata pa ako, ako dili mahadlok sa ngitngit hangtod akong nadungog ang usa ka programa sa radyo bahin sa supernatural. Tapos niadto, ako nahadlok na kaayo sa ngitngit nga ako dili moadto sa usa ka kuwarto ngadto sa lain kon ako makaagig kuwarto nga wala ipasiga ang mga suga. Ang inyong artikulo nagtin-aw niana alang kanako, nga nagpadayag nga ang akong gibati dili gayod kay pagkatalawan.

H. M., Brazil

Pagpanganak kun Aborsiyon?

Nasayloan sa inyong bug-os nga paghisgot sa aborsiyon ang usa ka punto: ang epekto sa pagmabdos diha sa panglawas ug kinabuhi sa inahan. (Abril 8, 1987) Ang tinuyong gidasig nga aborsiyon aron lang sa pagpugong sa pag-anak sa usa ka batang wala magustohi maoy tinuyong pagpatay sa tawhanong kinabuhi. Apan unsay inyong hunahuna sa tinuyong gidasig nga aborsiyon sa pagpugong sa kamatayon o kadaot sa lawas sa inahan?

A. A., Nigeria

Dili mahimong matarong ang paghunos sa kinabuhi sa usa ka batang wala pa matawo tungod lamang kay ang pagpakompleto sa pagmabdos basin, o lagmit, magpameligro sa panglawas sa inahan. Ang potensiyal nga kapeligrohan dili magpakamatarong nianang grabeng buhat. Sa daghang kaso, ang mga doktor nagpasidaan sa usa ka inahan nga ang pagkompleto sa iyang pagmabdos basin magpameligro sa iyang panglawas, apan ang resulta mao ang usa ka himsog nga bata ug walay malungtarong kadaot sa inahan. Gawas pa, unsa man ang potensiyal nga kadaot sa lawas ug sa emosyon nga tingali mahitabo sa inahan tungod sa gidasig nga aborsiyon? Tingali may usa ka kahimtang diin, sa panahon sa pagkatawo sa bata, ang pagpili kinahanglang himoon tali sa kinabuhi sa inahan ug ang iya sa bata. Anaa lamang sa mga tawong hingtungdan ang pagpili sa ingon. Bisan pa niana, sa daghang nasod, ang mga kauswagan sa medikal nga mga paagi naghimo sa maong kahimtang nga talagsa kaayo.—ED.

Relihiyon sa Politika

Ako nagasulat tungod sa inyong isyu bahin sa “Relihiyon sa Politika—Kabubut-on ba sa Diyos?” (Abril 22, 1987) Wala ra sa akong buot ang inyong mga pag-atake sa nasyonalismo, apan kay may kagikang Aleman, ako supak sa inyong kanunay nga paggamit sa Alemanya ug sa Third Reich ingon ang diwa sa kadaotan. Inyong gipatuo nga sayop ang pagsagol sa politika ug relihiyon. Apan unsay inyong ginabuhat? Kamo wala maningkamot sa pagmugna sa gugma nga angay sa mga Kristohanon; inyong gibanhaw ang pagdumot.

E. M., Canada

Wala namo sawaya ang Alemang katawhan, ni ang among artikulo nagpukaw sa daang mga pagdumtanay. Bisan pa niana, ang Nazismo nakahimo sa pipila sa labing mapintas nga mga krimen nga nahitala sa kasaysayan sa tawo. Kanang makasaysayanhong kamatuoran dili angay dili tagdon o hikalimtan sa kaliwatan karon. Ug kana usa ka talagsaong pananglitan kon unsa ka sayop nga ang mga iglesya malangkit sa politika. Ang Nazismo dili unta makabaton sa gahom kon wala ang pagpaluyo, dayag o tinago, sa Luterano ug Katolikong mga iglesya. Kini usa lamang sa daghang pananglitan sa kadaotang mosangpot sa dihang ang mga iglesya moapil sa politika, sumala sa gihisgotan sa among artikulo nga gihisgotan sa ibabaw.—ED.