Gikan sa Among mga Magbabasa
Ang Akong Kinabuhi Uban sa Hemophilia
Gusto kong ipahayag nga natandog kaayo ako sa asoy ni John A. Wortendyke nga “My Life With Hemophilia.” (Hunyo 11, 1987 sa Awake!) Ang gidak-on sa pagtuo nga iyang gipakita kang Jehova nga Diyos katingalahan gayod. Ako karon nagtuon sa Bibliya uban sa mga Saksi, ug ang pagbasa bahin kang John nakahimo sa akong mga problema nga gamay ra kaayo kon itandi ug siya nakahatag kanakog determinasyon sa pagpadayon sa akong pag-alagad sa Diyos.
A. C., Inglaterra
Sa tanang katingalahang mga eksperyensiya sa inyong magasin, kini ang labing nakapatandog, nakalig-on sa pagtuo nga artikulo nga akong nabasa sukad. Buot ko lang isulti kang John Wortendyke nga lakip siya sa akong mga pag-ampo ug sa iyang maisogong pamilya! Sa nagbasa ako sa artikulo, akong mabating nanghugot ang akong tiyan dihang moagi siya ug yugto sa pagdugo. Usa kini ka eksperyensiya nga isilsil ko sa akong hunahuna dihang mag-antos ako sa mga labad sa ulo tungod sa sinus, migraine, o panghuboy sa mga lutahan!
D. S., Tinipong Bansa
Mga Aprikano Nanginom ug Gatas
Ang inyong artikulo “Will Africa Ever Be Free From Hunger?” malamdagon. (Marso 8, 1987 sa Awake!) Apan, maayong inyong mahibaloan nga ang inyong hulagway sa hapin sa usa ka batan-ong may mansanas ug usa ka basong gatas dili mao ang buot namong makita sa Aprika. Labing menos 70 porsiento sa itom nga populasyon sa kalibotan alergik sa lactose. Wala kitay mahimong maayo alang sa lumad nga mga Aprikano pinaagi sa pagdasig kanila sa pag-inom ug gatas.
G. H. M.D., Hawaii
Ang among koresponsal sa South Africa nag-ingon: “Among gisusi ang daghang mga Aprikano, ug sila miingon nga silang tanan nakainom ug gatas sa bata pa. Ang paggamit ug baka ug ang gatas niini nahimong importanteng bahin sa mga kinabuhi sa mga tawong itom sa habagatang Aprika una pa sa mga adlaw sa pagpuyo sa mga Uropanhon. Sa pagkatinuod, ang Zulu nga pinulongan adunay pulong, ‘ukukleza,’ nga nagbatbat sa batasan sa mga bakiro sa paggatas sa baka diretso sa ilang baba. Siyempre, tingali lahi ang situwasyon diha sa ubang mga bahin sa Aprika.”—ED.
Pagbulag Gikan sa mga Droga
Buot kong magpasalamat kaninyo alang sa artikulong “Mga Batan-on Nangutana . . . Sa Unsang Paagi Makabulag Ako Gikan sa mga Droga?” (Pebrero 22, 1986) Sa miagi, nagkasakit ako tungod sa kabalaka ug tensiyon, ug giresitahan ako sa doktor ug dili kaayo isog nga tranquilizer. Wala magdugay miarang-arang ang akong panimati ug mapasalamaton sa maong tambal. Sa ulahi, dihang nahibalo sa kapeligrohan niining mga drogaha ug nakaamgo nga wala na ako magkinahanglan niana, mihukom ako sa pag-undang sa pagtomar niana. Tapos sa upat ug tunga ka tuig sa pagdepende niana, nahibalo akong may pila ka mga simtoma sa epekto niana ang motungha. Apan pinaagi sa padayong pagpadapat sa tukmang pagtultol ug tambag sa artikulo, milampos ako sa kataposan.
G. O., Inglaterra
Unsay Nagakahitabo sa Atong mga Lasang?
Salamat kaninyo alang sa isyu bahin sa “Unsay Nagakahitabo sa Atong mga Lasang?” (Hunyo 22, 1987) Sanglit nangandam alang sa oral nga eksaminasyon sa geograpiya bahin sa problema sa ekolohiya, gigamit nako kining mga artikuloha, nga dako kaayog tabang. Ug nakakuha akog maayong resulta sa eksamin. Nakagamit na akog mga artikulo nga gipatik sa Pagmata! niadto alang sa mga pagdukiduki sa tunghaan. Kinasingkasing nga salamat!
G. C., Italya