Gikan sa Among mga Magbabasa

Diyos ba sa Gubat? Salamat sa maayong artikulo sa Nobyembre 8, 1993, sa Pagmata! nga “Ang Hunahuna sa Bibliya . . . Si Jehova ba Diyos sa Gubat?” Kana maoy usa ka pangutana nga gisukna sa daghan sulod sa nangaging katuigan. Hisgotan usahay namo kana ingong pamilya. Ang inyong artikulo, lakip sa ubang panukiduki nga akong nahimo, nakatabang sa pagtubag sa akong mga pangutana.

S. T., Tinipong Bansa

Pagpasuso Kami nalingaw sa pagbasa sa artikulong “Ang Kaso Pabor sa Gatas sa Inahan.” (Septiyembre 22, 1993) Karon gipasuso sa akong asawa ang among anak. Hinunoa, walay gihisgotan diha sa artikulo nga ang pagpasuso makapaluya sa lawas sa inahan. Tingali dili tanang babaye ang makapasuso sa gabii. Sa among kahimtang, pananglitan, kon ang akong asawa diyutay rag tinulogan, lisod kaayo kini kaniya.

T. K., Alemanya

Salamat sa inyong mga komento. Ang miaging mga artikulo naghisgot sa pila ka kalisdanan nga masinati sa bag-ong mga inahan niining bahina. Tagda, pananglit, ang “Pagmata!” sa Hunyo 8, 1983, ug Marso 22, 1986.​—ED.

Paghinobra Ba? Buot ko kamong pasalamatan alang sa artikulong “Mga Batan-on Nangutana . . . Asa Kutob ang ‘Paghinobra’?” (Oktubre 22, 1993) Bawtismadong Kristohanon na ako sa halos usa ka tuig na karon, ug sagad mahibulong ako kon unsay hunahuna ni Jehova bahin niini. Giapresyar gayod nako ang paghisgot ninyo niining maong ulohan. Bisan tuod kini dili sayon, determinado ako sa pagkinabuhi sumala sa mga sukdanan ni Jehova.

C. S., Tinipong Bansa

Daghang bulan nga naghulat ako ug ingon niana nga artikulo. Ako nakigdeyt sulod na sa siyam ka bulan, ug sa dihang miabot ang artikulo, giteleponohan dayon nako ang akong trato. Daghang salamat sa inyong pagtudlo kanamo bahin niining sensitibo ug tandogonon nga mga butang.

A. P. G. S., Brazil

Kinasingkasing nga nagpasalamat ako kaninyo alang sa artikulo. Kini miabot sa panahon nga gikinahanglan nako kini. Ako 16 anyos, ug adunay lalaki nga akong nagustohan. Naghunahuna ako sa pagbirigbirig kaniya. Siyempre, nahibalo ako nga sayop ang pakighilawas, apan abi nakog ang paghalokay ug paghapyoranay dili gayod paghinobra. Apan pinaagi niining artikuloha, nasabtan nako nga hangtod makaabot ako sa edad nga mahimo nang magminyo, ang maong mga butang paghinobra gayod!

M. H., Hapon

Dili na ako batan-on, apan dalaga gihapon, ug nakasukna ako nianang samang pangutana. Ako adunay ginadeyt, ug ingong usa ka bug-os panahong ebanghelisador, angay nga nahibalo ako sa tubag. Apan kon malangkit ang imong pagbati, ang imong panghukom mohanap. Ang artikulo tukma gayod sa panahon ug nakatabang kanako ug dako sa pagpakighisgot niining maong ulohan uban sa Kristohanong lalaki nga akong ginadeyt. Gibalikbalik namo kinig basa ug nakahukom sa paghupot sa mga butang nga dungganon atubangan sa tanan.

M. R., Tinipong Bansa

Ako nag-ampo nga makabaton ug katin-awan bahin niining ulohana. Sa dihang nakita ko ang ulohan sa artikulo, ang akong kasingkasing ‘napugwat.’ Maikagon nakong gibasa ang artikulo, ug karon nasayod na gayod ako kon unsa ang angay ko nga paggawi.

S. G., Italya

Medikal nga Pagtambal nga Walay-Dugo Buot kong pasalamatan kamo ug dako sa artikulong “Mga Saksi ni Jehova ug ang Medikal nga Propesyon Nagtinabangay.” (Nobyembre 22, 1993) Samtang nagbasa niini, mitubod ang mga luha sa apresasyon sa akong mga mata. Gibatbat sa artikulo ang pila ka malisod nga buluhaton nga daghan kanamo ang wala masayod tungod kay wala makasinati niining maong problema. Apan alang kanamo nga basin magaatubang sa umaabot ug pagsulay sa atong pagtuo bahin sa isyu sa dugo, dako kaayong kahupayan ang pagkasayod nga ang atong mga igsoon nagkugi alang kanamo.

B. B., Tinipong Bansa