Gikan sa Among mga Magbabasa
Mga Kredit Kard Ako ilabinang nalingaw sa artikulong “Mga Kredit Kard—Kini ba Alang Kanimo?” (Disyembre 8, 1993) Pipila ka tuig nang milabay ang akong asawa ug ako nakadangat sa usa ka makapaguol nga utang pinaagig kredit kard nga dugay kaayong nabayran, bisan human namo daota ang among mga kard. Bisan pa niana, alang sa kasayon, di pa dugay mikuha kami ug usa ka bag-ong kard. Ang inyong tukma-sa-panahong mga pahinumdom bahin sa kredit kard ug sa mga kapeligrohan niini nakatabang kanamo nga mahimong determinado nga dili kana gamiton sa sayop nga paagi niining panahona.
M. B. ug D. B., Tinipong Bansa
Mga Sugilanon Bahin sa Mananap Salamat sa artikulo bahin sa mga oso sa polo nga nag-ulohang “Talagsaong mga Higante sa Norte sa Canada.” (Disyembre 8, 1993) Maanindot kaayong pagkasulat kadtong artikuloha. Ang mga impormasyon nga gihisgotan nakapaapresyar gayod kanako kon unsa ka mahigugmaon si Jehova nga naglalang sa mga mananap alang sa atong kalipay.
D. C., Tinipong Bansa
Ang inyong artikulong “Napakaulawan sa Usa ka Kudu ang mga Leyon” (Nobyembre 22, 1993) kataw-anan. Mahanduraw ko lang ang nasuko ug naulawng toro nga kudu nga naningkamot paghasmag niining dili matarog nga tumbagang kudu. Ug ang paagi nga kini nakapakalagiw sa usa ka panon sa mga leyon—kataw-anan kaayo! Kini nagpakita nga si Jehova gusto ug katawa.
A. L., Tinipong Bansa
Nalingaw ako sa paagi sa inyong pagtuki sa ulohang “Pagtukib sa mga Tinagoan sa Ubod.” (Oktubre 22, 1993) Kining maong mga linalang nagpasundayag sa kamatuoran sa asoy sa Bibliya bahin sa paglalang ug sa pagpanghimakak sa tanang paningkamot sa pagpamatuod sa teoriya sa ebolusyon.
C. S. S., Brazil
Ako 11 anyos, ug nagustohan gayod nako ang gihisgotan diha sa “Pagpaniid sa Kalibotan” nga gitawag ug “Pagsimba sa Ilaga.” (Nobyembre 8, 1993) Ang artikulo nagsaysay nga ang mga pari sa usa ka templo sa India nagtuo nga sa dihang sila mamatay, sila makabaton ug kaluwasan pinaagi sa pagkatawo pag-usab ingong mga ilaga! Sila nag-ingon nga kini dili tinuod nga mga ilaga kondili kini mga mensahero gikan sa Diyos. Pagkakatingad-anan!
E. L., Tinipong Bansa
Mga Selebrasyon Buot ko kamong pasalamatan ug dako tungod sa seryal nga “Mga Selebrasyon—Kon Nganong ang Pipila ka Bata Dili Mosaulog Niini.” (Nobyembre 22, 1993) Ang seksiyon nga “Dili Kami Hinikawan!” nakapalugmaw sa akong mga luha. Makadaghan gibati ko nga ako nag-inusara sa pagpahayag sa akong mga gituohan ngadto sa akong mga kauban sa tunghaan, ug kining artikuloha nakatabang kanako sa pagkaamgo nga wala gayod ako mag-inusara ug dili gayod mag-inusara.
B. P., Tinipong Bansa
Sukad sa akong nahinumdoman, wala ako makasaulog ug Pasko. Dihay mga panahon nga nasina ako sa ubang mga bata. Ug sa wala pa mogula kining artikuloha, gidapit ako sa usa ka salosalo sa Pasko. Gibalibaran ko kini ug misulay, gikan sa ako nang nahibaloan, sa pagsaysay kon ngano. Apan kay nakasabot kon sa unsang paagi ang Pasko, nga nahimong tinuig nga selebrasyon bisan sa Hapon, maoy usa ka paganong selebrasyon nga adunay kalangkitan sa demonyo, masaligon ako nga akong nahimo ang hustong butang.
K. I., Hapon
Dobleng Kinabuhi Salamat sa pagpatik sa artikulong “Mga Batan-on Nangutana . . . Pagkinabuhig Dobleng Kinabuhi—Nganong Dili?” (Disyembre 22, 1993) Ako 15 anyos ug ako gimatuto ingong Kristohanon. Apan dili maayo ang akong lakat, ug gibati ko kanunay nga ako hinayhinay nga naanod palayo sa kamatuoran. Usa sa mga katarongan mao nga hilabihan ka estrikto ang akong mga ginikanan, ug kanunay nakong gibati ang panginahanglan nga buhaton nako ang usa ka butang nga ilang gidili, bisan tuod nasayod ako nga kana sayop. Samtang gibasa ko ang artikulo, akong naamgohan nga si Jehova nga Diyos nagpadala kanako ug tabang. Nasayod ako nga dili lang ako ra ang nagbuhat ug mga butang nga wala masayri sa akong mga ginikanan. Apan sa dihang mipadayon ako pagbasa, ako natingala kon sa unsang paagi ang uban mibati gayod ug sama sa akong gibati. Nasayod ako nga dili kini sayon, apan ako naglaom nga mag-usab sa akong estilo sa kinabuhi uban sa tabang ni Jehova.
K. J., Tinipong Bansa