Ang Kalipay sa Paghatag Mapalambo Pinaagi sa Mapasalamatong Pagdawat
PALANDONGA ug balik ang bag-ong kinasal nga gihisgotan sa sinugdanan sa artikulo. Makita ba nimo dihang sila na lang duha ang nagtan-aw sa tanang gasang nadawat, nga mikomento nga mao gayod kini ang ilang gikinahanglan? Imo bang mahanduraw ang kinasal nga babaye nga nanghapnig sa mga habol ug mga punda diha sa linain nga estante nga daling makuha, ang mga plato diha sa platera, ang kubyertos sa mga hunos, ang toaster sa talad sa kosena aron daling magamit sa adlaw-adlaw?
Mainampingon nilang gibitay ang tanang larawan diha sa hustong dapit, ang mga orasan sa labing kombenyenteng mga lokasyon. Ilang gihapinan ang hinatag nga segunda-manong lamesa sa komedor ug usa sa bag-ong mga mantel. Ang kaparis nga mga serbilyeta nga gibutang diha sa ilang ginasang mga singsing sa serbilyeta nakadugang sa katahom.
Ilabinang nalipay sila niining gasaha—de-koryenteng abre-lata. Nagtuo ang kinasal nga babaye nga magamit kanunay niya kining butanga. Gihatag kini diha kanila sa usa ka minahal nga higala nga nasayod nga dili sila makaabot sa pagpalit niini. Ug kining kobre-kama, nga gihimo sa rayumahong mga kamot sa tigulang nga iyaan. Hayan daghang mga bulan ang iyang nagugol sa makuting pagborda niini. Pagkadako nga buhat sa gugma!
Nalipay sila sa tanang mga gasa. Dalhon ba ang tanang butang ug ilisan kinig laing butang o kuwarta? Nungka! Karon moabot na ang labing mahigugmaon sa tanan—ang ilang mga ekspresyon sa mga pasalamat. Hatagan ba nila kinig higayon sa paghimo niini?
Ikaw ba nakadawat nag materyal nga gasa, usa ka mahalon o dili mahalong gasa—tingali usa ka pungpong sa bulak, usa ka bukag sa mga prutas, yanong tanom? Diha bay minahal nga higala nga mihinlo sa imong balay dihang nagkasakit ka o milutog pagkaon alang sa imong pamilya dihang dili ka makagahom sa pagluto? Gipasalamatan mo ba sila?
Pagkasimpleng pulong ang “salamat.” Dali kaayo kining isulti. Apan unsa ka subsob nga wala lamang panumbalinga ang pagpahayag niana. Kas-a giuli sa usa ka drayber sa taksi ang pitaka nga nabilin sa usa ka tawo diha sa iyang taksi. Pagkadako nga gasa! Gidawat sa tag-iya ang pitaka nga walay pulong. Handurawa ang kasubo nga gibati sa drayber sa taksi niining pagkaingrato. Siya masub-anong miingon, “Kon miingon lang unta kining tawhana ug ‘Salamat.’”
Usa ka isyu niining magasina mitaho bahin sa usa ka grupo sa mga batan-on sa hayskol nga nagporma ug klab sa katuyoan sa pagtabang sa mga tawo. “Ilang gitabangan ang nabarang mga motorista pinaagi sa pag-ayo sa nahiyos nga mga ligid, mihatag kanilag gas kon wala damhang mahutdan sila, ug gitabangan sila sa ubang mga paagi,” matud pa sa artikulo. ‘Dili sila modawat ug kuwarta alang sa ilang mga serbisyo. Ang ilang gipangayo lamang mao nga ang mga motorista mosulat ug “salamat”alang sa payl sa ilang klab.’ Unsa ang mga resulta? Ang tigpamaba sa klab miingon: “Abi nimo, sa pagkakaron duha lamang ang among nadawat nga sulat, bisan pa nga ang mga rekord sa among klab nagpakita nga nakatabang kamig kapin sa 150 ka motorista sa duha ka tuig sukad nga naorganisar kami.”
Unsa ka subsob nga imong pasalamatan ang usa nga nakaluwas sa imong kinabuhi? Handurawa lang ang gasa nga gihatag sa maong tawo kanimo. Apan, dihay usa ka tawo nga nagpameligro sa iyang kinabuhi aron sa pagluwas sa mga pasahero sa nalunod nga barko, nga nakabirag 17 gikan sa mga pag-angaw sa kamatayon, nga tapos niini siya gialsa tungod sa kakapoy ngadto sa iyang balay. Dihang gipangutana sa milabay ang mga tuig kon unsay nangibabaw sa iyang panumdoman sa bayanihon kaayong buhat sa pagluwas, siya mitubag: ‘Mao lamang kini, sir. Sa napulog-pito ka tawo nga akong naluwas walay bisan usa ang mipasalamat kanako.’
Timaan ba sa kaluya ang pag-ingong “salamat” tungod sa buhat sa kalulot, sa materyal nga gasa, o gasa sa kinabuhi? Pasalamatan ba niining mga tawhana si Jehova nga Diyos, ang Maghahatag-sa-kinabuhi, alang sa ilang kaugalingong kinabuhi? Kon dili sila makapasalamat sa usa ka tawo nga ilang nakita, may kalagmitan bang ilang pasalamatan ang Usa nga dili nila makita?—1 Juan 4:20.
Ikatingala ba nga daghan kaayong mga batan-on karon malisdan sa pagpahayag ug kinasingkasing nga mga pasalamat sa gasang nadawat o sa gipakitang malulutong buhat? Kon dili moingon ang mga ginikanan ug “palihog” ug “salamat,” malagmit nga dili usab mopasalamat ang ilang mga anak.
Ang pagkawalay apresasyon maoy usa sa mga timaan nga kita nagkinabuhi na sa “kataposang mga adlaw.” Si apostol Pablo mipasidaan: “Sa kataposang mga adlaw moabot ang panahon nga malisod sagubangon. Kay ang mga tawo unya mga mahigugmaon sa ilang kaugalingon, . . . dili-mapasalamaton.”—2 Timoteo 3:1, 2.
Kon Unsaon sa Pagpakitag Apresasyon
Dakong negosyo ang pagdesinyo ug pagpamaligyag mga “thank-you” kard. Ang kadaghanan sa mga kard matahom kaayong nagpahayag sa mga pagbati. Dali kaayo ang pagpalit niini ug ipadala sila niadtong nakahatag ug mga gasa o sa gipakitang mga buhat sa kalulot. Apan dugang pa, dili ba mahigugmaon ug maluluton sa pagdugang ug personal nga mensahe, sa pagsulat diha kanila sa atong kaugalingong mga pulong sa apresasyon sa atong kaugalingong agi—tingali sa pagngalan sa gasang nadawat ug sa atong dakong apresasyon niana ug sa kalipay nga kita nakadawat o madawat sa paggamit niini?
Uban niini, kon mahimo, dili ba ang malipayong pagbungat sa ekspresyon sa pasalamat, paglamano, o mainit nga paggakos, o ubang mga ekspresypn sa pagmahal pabilhan sa tighatag? Kon magreklamo kita nga kulang ang atong panahon sa pagbuhat niini, nan hunahunaa ang panahon, paningkamot, ug salapi nga gihatag sa tighatag alang kanato. Ang kalipay sa tighatag sa paghatag mapalambo pinaagi sa atong ipakitang apresasyon.
Maayong atong hinumdoman ang mga pulong sa labing maayong tighatag sa tanan, si Jesus: “Adunay dakong kalipay ang paghatag kay sa pagdawat.” (Buhat 20:35) Sa dili magdugay, sa umaabot nga yutan-ong Paraiso sa pagkamatarong, dili lamang ang tanang tawhanong mga molupyo ang mopasalamat kang Jehova nga Diyos sa adlaw-adlaw alang sa gasa sa kinabuhi kondili sila mopakita usab ug mahigugmaong apresasyon sa usa ug usa sa sinilingang mga buhat sa kalulot. Hinaot nga magpakita kitag apresasyon karon ug makabaton sa kahimuot ni Jehova ug sa atong silingan.