“Kadto ang Kinamaayohang Regalo nga Akong Nadawat”

Kanay giingon sa 13 anyos nga batang babaye dihang giregalohan siyag itoy. Usa ka negosyanteng babaye miingon sab nga nabag-o ang iyang kinabuhi tungod sa computer nga giregalo sa iyang amahan niadtong hayskul pa siya. Usa ka lalaki miingon nga ang kard nga gihimo sa iyang asawa para sa ilang unang anibersaryo mao ang kinamaayohang regalo nga iyang nadawat.

Kada tuig, daghang tawo maningkamot pag-ayo sa pagpangita kon unsay pinakamaayong iregalo sa usa ka higala o paryente para sa espesyal nga okasyon. Ug ang kadaghanan gustong makadungog ug mga apresasyon, sama nianang makita sa ibabaw. Ikaw komosta? Gusto ka bang makahatag o makadawat ug regalo nga makapalipay?

Siyempre gusto ta, dili lang tungod sa kalipay nga bation sa nakadawat kondili sa kalipay pod nga bation sa naghatag. Gani, ang Bibliya nag-ingon: “Adunay labaw nga kalipay sa paghatag kay sa pagdawat.” (Buhat 20:35) Oo, ang kalipay sa paghatag mas mosamot ilabina kon nalipay pag-ayo ang imong gihatagan.

Busa unsay imong himoon aron ang imong paghatag ug regalo makapalipay nimo ug sa imong gihatagan? Ug kon dili man ugaling ka makahatag ug “kinamaayohan” nga regalo, unsay imong himoon aron kana mapabilhan?