Ikaw ba Adunay Espiritu sa Paghatag?
NAKAOBSERBAR ka bang adunay labaw pa sa usa ka espiritu ang nag-agda sa mga tawo sa paghatag? Ang usa ka regalo mahimong maoy usa ka pagpakita sa gugma, sa pagkamanggihatagon, sa apresasyon. Apan wala ka ba makamatikod nga ang regalo mahimong nagagikan usab sa tinguha sa usa ka tawo nga mapaboran? O kaha mahimong gihatag lamang kini tungod sa pagbati nga obligasyon o tungod kay ang naghatag buot nga pagabalosan.
Ang regalo mahimong anaa sa putos nga may ribon. Apan dili ba tinuod nga ang usa ka maayong regalo mahimo usab nga usa ka pungpong sa mga bulak, usa ka potaheng pagkaon, o usa ka maayong buhat? Sa pagkatinuod, ang mga regalo nga pabilhag maayo sagad naglangkit sa paghatag sa kaugalingon.
Adunay Usa ba Kansang Pabor Imong Gitinguha?
Kasagaran sa tawo nga mohatag ug regalo sa usa ka tawo kansang pabor gitinguha. Sa ubang kayutaan ang usa ka ulitawo nga nagtinguhang maangkon ang kasingkasing sa ginalaomang pangasaw-onon tingali magdala kaniyag mga bulak. Apan dili lang regalo ang tan-awon sa maalamong babaye. Tagdon niya kon ang espiritu luyo sa regalo sa ulitawo maoy mahigugmaon nga maghimo usab kaniyang usa ka maayong bana. Ang maong gasa, kon gipabanaag niini ang diyosnong espiritu, mahimong mosangpot ug dakong kalipay sa naghatag ug sa dumadawat.
Ang Bibliya naghisgot bahin sa usa ka okasyon sa dihang si Abigail, ang asawa ni Nabal, dalidaling nag-andam ug ubay-ubayng regalo kang David, kinsa iyang nailhan nga usa nga gipili sa Diyos nga mahimong umaabot nga hari sa Israel. Siya usab nagtinguhag pabor. Giayran sa iyang bana si David ug gisinggitan ug mga kasaba ang mga tawo ni David. Nanguna sa panon sa mga 400 ka armadong mga tawo, si David nagpaingon sa pagpatay kang Nabal ug sa iyang panimalay. Si Abigail nangilabot, nga dalidaling nagpadala kang David ug ubay-ubayng mga suplay sa pagkaon alang sa iyang mga tawo. Siya mismo miabot nga nagsunod sa iyang gasa, ug human sa mapainubsanong pagpangayog pasaylo sa nahimo sa iyang bana, siya naghatag ug pamatuod sa dakong pagkamasinaboton samtang siya nangatarongan kang David.
Halangdon ang iyang tuyo, ug maayo ang sangpotanan. Gidawat ni David ang iyang gasa ug miingon kaniya: “Lakaw nga malinawon ngadto sa imong balay. Tan-awa, namati ako sa imong tingog aron hatagan ko ikaw ug konsiderasyon.” Sa ulahi, human namatay si Nabal, si David misakna pa nga makigminyo kang Abigail, ug malipayon siyang midawat.—1 Samuel 25:13-42.
Sa ubang mga kahimtang, hinunoa, ang pabor nga gitinguha sa usa ka tawo lagmit naglangkit sa pagpakitag pagpihig, pagtuis pa sa hustisya. Sa maong kahimtang, ang gasa maoy usa ka hiphip. Ang maghahatag nagtuo nga siya makabatog kaayohan, apan gikuhaan niya ang iyang kaugalingon ug kalinaw sa hunahuna. Anaa kanunay ang kapeligrohan nga mahibalo ang uban, nga panubagon siya sa iyang mga buhat. Bisan kon ang gitinguhang pabor ihatag, ang usa nga nagtinguha niana basin makakaplag nga siya karon adunay reputasyon sa usa kansang motibo kadudahan. Sa pagpalandong sa diyosnong kaalam, ang Bibliya nagpasidaan batok sa maong mga gasa.—Deuteronomio 16:19; Ecclesiastes 7:7.
Ang Gasa ba Nagagikan sa Andam nga Kasingkasing?
Walay pagduhaduha bahin niana—ang paghatag ngadto sa usa ka tawo nga imong gihigugma tungod kay buot nimong mohimo niana mohatag ug dakong kalipay kay sa paghatag tungod kay gipabati ka sa uban nga mao kanay imong angay buhaton.
Labot sa pagtigom ug mga hinabang alang sa kaubang mga Kristohanon nga nagkinahanglan ug materyal, si apostol Pablo naglatid ug pipila ka maayo kaayong mga prinsipyo bahin sa diyosnong paghatag. “Kon ang pagkaandam anaa nang daan,” siya misulat, “kini ilabinang dalawaton sumala sa kon unsay ginabatonan sa usa, dili sumala sa kon unsay wala kaniya.” Siya midugang: “Ipabuhat sa matag usa ang sumala sa iyang gikahukom diha sa iyang kasingkasing, dili nga kontragusto o pinugos, kay gihigugma sa Diyos ang usa ka masayahong maghahatag.” (2 Corinto 8:12; 9:7) Busa, nagadepende kanag dako kanimo. Imbes mangutang aron magpatuyang ug paghatag ug gasa, mogasto ka ba sumala sa imong maabot? Imbes mobati nga gipugos sa paghatag tungod lamang sa sosyal o komersiyal nga pagpamugos, naghatag ka ba sumala sa nahukom sa imong kasingkasing? Mahitungod sa unang mga Kristohanon nga nagpadapat sa maong diyosnong mga prinsipyo, si Pablo misulat: “Sila sa ilang kaugalingon padayong nagahangyo kanamo uban ang tumang pagpangaliyupo alang sa pribilehiyo sa malulotong pagpanghatag ug sa pag-ambit sa ministeryo nga gikatagana alang sa mga balaan.”—2 Corinto 8:4.
Lahi niana, ang Royal Bank Letter sa Nobyembre/Disyembre 1994 miingon labot sa mga semana una pa ang Pasko: “Ang maong panahon mahimong tan-awon ingong usa ka kahimtang sa artipisyal nga kasadya nga gipukaw sa mga intereses sa negosyo aron aghaton ang mga pumapalit sa pagpalit sa mga butang nga dili sila mopalit.” Kon ang pagpalit himoon pinaagig utang, ang bisan unsang katagbawan nga dala sa paghatag ug mga regalo mawala lang dayon sa dihang bayran na ang utang.
Imong Pangunang Kabalaka—Ang Okasyon? O Usa ka Pagpakitag Gugma?
Nakakaplag ka ba nga ang paghatag nimog mga gasa sa dakong bahin gibuhat tungod sa mga okasyon nga nagkinahanglan niana? Kon mao, ikaw tingali mawad-an ug dakong kalipay nga ikahatag sa kinabubut-on nga paghatag.
Adunay daghang tawo nga dili malipay sa mga resulta sa paghatag ug regalo sa espisipikong mga adlaw. Usa ka inahan kinsa usa usab ka magsusulat miangkon nga ang kahakog manungha sa iyang mga anak samtang magkaduol na ang adlaw sa dihang gilaoman ang mga regalo. Siya miadmiter nga ang iyang kalipay sa maanindot nga regalo nawala tungod kay laing butang ang iyang gilaoman. Daghang taho nag-ingon nga ang mga selebrasyon nga may kasadya ug pagbayloay ug mga regalo maoy mga panahon usab nga daghan ang emosyonal nga kaguol ug pag-abuso sa alkohol.
Kay nakamatikod nga ang pagpasiugda sa paghatag ug regalo sa panahon sa selebrasyon usahay adunay dili maayong mga epekto sa kabataan, usa ka propesor sa sikolohiya nga gikutlo sa The New York Times mirekomendar: “Pagpalandong sa paghatag ug pipila ka gasa sa ubang mga adlaw ingong usa ka paagi sa pagkunhod sa kapit-os.” Nagtuo ka ba nga kana adunay maayong epekto?
Si Tammy, nga 12-anyos diha sa usa ka panimalay nga dili magsaulog sa Pasko ug mga adlawng natawhan, misulat: “Mas makapalipay ang pagdawat ug regalo sa dihang wala ka maglaom niana.” Siya miingon nga imbes maghatag ug mga regalo kas-a o kaduha lamang sa usa ka tuig, ang iyang mga ginikanan naghatag ug regalo kaniya ug sa iyang igsoong lalaki sa tibuok tuig. Apan adunay mas labawng hinungdanon alang kaniya kay sa niadtong mga regalo. Sama sa pag-ingon niya niini, “Ako adunay usa ka malipayon kaayong pamilyahanong kinabuhi.”
Ang librong Secrets of Strong Families prangkang miingon: “Ang kadaghanan kanato mogugol ug panahon ug salapi sa daghang panahon sa tuig sa pagpilig kinanindotang mga regalo sa mga adlawng natawhan, mga anibersaryo, o sa mga selebrasyon alang sa mga tawong atong gihigugma. Ang kinamaayohang regalo sa tanan wala magkinahanglag kuwarta. Ug dili kinahanglang puston nimo kini. Kon motuo ka, sama sa kadaghanang tawo, nga ang imong kinabuhi mao ang labing bililhong kabtangan nga imong nabatonan, nan ang bahin sa imong kinabuhi mao ang labing bililhong gasa nga imong ikahatag. Atong ihatag ang maong bililhong gasa sa gidaghanon sa atong panahon nga ginahatag nato ngadto sa atong mga minahal.”
Imong ikapaabot kana nga paghatag dili lamang sa imong kaugalingong pamilya. Ang kinabubut-on nga paghatag aron katagan-an ang dayag nga panginahanglan sa uban makahatag ug linaing katagbawan. Si Jesu-Kristo nag-awhag kanato sa pagpakita sa maong mahigugmaong kabalaka alang sa kabos, sa bakol, ug sa buta, nga midugang: “Ikaw magmalipayon, tungod kay sila walay bisan unsa man nga ikabayad kanimo.”—Lucas 14:12-14.
Ang Rockland Journal-News (T.B.A.) sa dili pa dugay nagtahog pananglitan bahin nianang matanga sa paghatag. Sa dihang nahagsa ang balay sa tigulang nga babayeng buta, gitukoran siya sa mga higala ug bag-ong balay. Mihatag ug mga donasyon ang ubay-ubayng lokal nga mga kompaniya sa negosyo, ug mihatag ang lokal nga ahensiya sa kagamhanan ug pinansiyal nga tabang. “Labing importante, hinunoa,” matod sa mantalaan, “ang 150 o kapin pang mga tawo, diin ang kadaghanan tigtambongan sa kongregasyon sa mga Saksi ni Jehova sa Haverstraw, midonar ug panahon sa pagtukod sa balay.”
Ang artikulo nagpadayon: “Sa dapit nga gitukoran dihay mga kamada sa mga materyales tapad sa mga lamesang puno ug pagkaon. Sa duha ka adlaw napatindog sa mga trabahante ang duha ka apartment, nga tulo ka andana ang gitas-on. . . . Ang mga Saksi ni Jehova nailhan sa ilang katakos sa paspas nga pagtukod ug mga tinukod. . . . Ang maong kapaspas, hinunoa, lahi sa pagkamapinadayonon sa ilang misyon: sa pagtaganag kalig-on diha sa buhat sa gugma. Dili tuod makita ni Gng. Blakely ang iyang bag-ong balay, apan ang iyang mga kamot makahikap niana, ug ang iyang kasingkasing natandog gayod niining dili-mahakogong buhat.”
Tibuok-Tuig nga Espiritu sa Pagkamahinatagon
Kadtong kinsa tinuod gayod nga mahinatagon sa espiritu dili magpaabot ug espesyal nga mga adlaw. Ang ilang mga kinabuhi wala lamang matukod diha sa ilang kaugalingon. Sa dihang sila adunay madawat nga maayo, sila malipay sa pagpakig-ambit niana sa uban. Wala kini magpasabot nga sila maoy mahinaykon nga mga maghahatag ug gasa. Wala kini magpasabot nga sila naghatag sa usa ka sukod nga mahikawan ang ilang pamilya. Wala kini magpasabot nga sila naghatag nga walay paghunahuna sa epekto diha sa dumadawat. Bisan pa, sila maoy mga tawo nga ‘nagabatasan sa pagpanghatag,’ ingon sa gitudlo ni Jesus nga buhaton sa iyang mga tinun-an.—Lucas 6:38.
Nasayod sila sa mga kahimtang sa mga higala ug sa mga silingan nga mga tigulang, masakiton, o kaha nagkinahanglan ug pagdasig. Ang ilang “regalo” mahimong pagpamalit alang kanila o pagtabang sa mga buluhaton sa balay. Kini mahimong pagbughag kahoy o pagpala sa niyebe. Kini mahimong usa ka panaksan sa linutong pagkaon o usa ka oras sa panahon sa pagduaw ug pagbasa uban kanila. Ang ilang mga kinabuhi mahimong puliki apan dili puliki kaayo aron sa pagtabang. Nakat-onan nila sa kasinatian nga tinuod nga adunay “labaw nga kalipay sa paghatag kay sa pagdawat.”—Buhat 20:35.
Siyempre, ang kinadak-ang Maghahatag sa tanan mao ang atong Maglalalang, si Jehova nga Diyos. Siya “nagahatag ngadto sa tanan nga mga persona ug kinabuhi ug gininhawa ug tanang butang.” (Buhat 17:25) Sa Bibliya, siya usab nagtagana kanatog pagsabot bahin sa iyang katuyoan sa pagtapos sa pagkadaotan, sakit, ug kamatayon, ug sa paghimo niining yutaa nga usa ka paraiso. (Salmo 37:10, 11; Pinadayag 21:4, 5) Sa pagkahibalo bahin niini, kadtong adunay mahinatagong espiritu dili maghupot nianang maayong balita sa ilang kaugalingon. Ang usa sa ilang kinadak-ang kalipay mao ang pagpakig-ambit niini sa uban. Ang ilaha maoy tinuod gayod nga diyosnong espiritu sa paghatag. Ingon ba niana nga espiritu ang imong ginaugmad?
[Hulagway sa panid 7]
Ang pipila sa kinamaayohang mga regalo wala magkinahanglag kuwarta