Mas Maayo pa Kay sa Pagpanghatag sa Panahon sa Pasko

“GISULTIHAN ako sa sayis-anyos nga Christopher, nga morag kadto mao ang labing kinaiyanhong butang sa kalibotan, nga sa panahon sa Pasko siya ‘wala gayoy madawat.’ Apan misulti siya nga walay lama nga nahigawad. Sama usab ang gipahayag ni Alexander (8) nga nag-ingon: ‘Kami mga Saksi ni Jehova.’”

Mao kanay pagsugod sa mantalaang Kölner Stadt-Anzeiger sa usa ka artikulo bahin sa pamilya nga giingon sa peryodiko nga “wala magsaulog sa Pasko tungod kay dili kini ang petsa nga natawhan ni Jesus ug tungod kay kini pagano ug sinugdan.” Apan angay bang kaluy-an si Christopher ug si Alexander? Dili gayod, kay ang artikulo nag-ingon, ang mga dulaan sa mga bata diha sa mga estante wala magpakita nga sila gipasagdan sa mga ginikanan.

Apan, ang ubang mga ginikanan nga mitambong sa tigom sa ginikanan-magtutudlo sa habagatang Alemanya miingon nga ang dili paghatag sa mga Saksi ni Jehova ug pinaskohan sa ilang mga anak mopabati kanila nga walay-kasegurohan. Apan, dili kini tinuod, sumala sa giingon sa magtutudlo. Siya miingon nga ang “mga anak sa mga Saksi ni Jehova bukas kaayong makapadayag sa ilang kaugalingon, maayong pagkatimbang, ug bug-os nga makapatin-aw sa ilang pagtuo, usa ka butang nga dili mahimo sa ubang kabataan.”

Sa pagkatinuod, giilisan sa tinagpulo ka libong mga pamilya sa tibuok kalibotan ang paghatag sa panahon sa Pasko ug usa ka butang nga mas maayo, sa pagtino nga kahatagan ang ilang mga anak ug mga gasa sa tibuok-tuig. Kini nakita nga usa ka tuboran sa kalipay alang sa tanan.

Usa ka bentaha mao nga kini mosangpot ug daghang malipayong mga okasyon sa tuig, ug ang kabataan dugang makaapresyar sa matag indibiduwal nga gasa. Laing bentaha mao nga ang kabataan nahibalo nga ang ilang mga ginikanan mao ang nanghatag ug mga gasa tungod sa gugma, ug giapresyar sila niana. Ang mga ginikanan wala magbubo ug salapi ug kahago nga makakaplag lamang nga ang pasalamat sa ilang mga anak moadto sa usa ka hinanduraw nga Santa Klaus o gihimong mga ingrato ang ilang mga anak, mobati nga obligasyon ni Santa ang pagdala kanilag mga gasa ug nga dili na kinahanglang pasalamatan pa.

Ang Gasa nga Mas Bililhon

Kasagaran si Dominik, edad diyes, ug si Tina, edad sayis, makadawat ug mga sorprisa gikan sa ilang mga ginikanan​—usa ka buok tsokoleyt diha sa ilang unlan, lapis o notbok nga ilang magamit sa eskuylahan, o angay nga dulaan aron may kalingawan sila sa panahon sa mga bulang tingtugnaw. Apan unsa ang ilang labing gipabilhan? Ang ilang mga ginikanan mitubag: “Ang paghatag namog panahon kanila​—pananglitan, sa pagdula diha sa niyebe.”

Daghang ubang ginikanang mga Saksi ni Jehova miuyon. “Niining puliki nga kalibotan,” si Edelgard miingon, “ang panahon mao ang hinungdanon kaayong butang nga akong ikahatag sa akong mga anak.” Ug ang mga batan-on nagauyon! Si Ursula miingon nga giila sa iyang mga anak ang panahong ginasalohan diha sa mga lulinghayaw sa gawas uban sa pamilya ingon nga mao “ang labing maayong gasa sa tanan.” Bisan ang tsirman sa asosasyon sa mga magtutudlo sa Alemanya dili pa dugay miingon nga ang labing maayong pinaskohan nga ikahatag sa ginikanan sa ilang mga anak mao ang panahon ug pailob.

Walay duhaduha niana, ang paghatag sa kaugalingon​—kaugalingong panahon, kabalaka, ug pagtagad—​kauban man sa pamilya o sa mga higala, maoy usa ka gasa nga tinuod nga mas bililhon. Dayag nga ang mga gasang sama niini dili kinahanglan ilimiti lamang sa pipila ka adlaw sa tuig.

Malipayong Paghatag nga Makatagbaw

Palandonga ang mga pananglitan sa mga Saksi ni Jehova nga nag-ambitay sa usa ka butang nga mas maayo pa kay sa paghatag sa panahon sa Pasko. Si Wilfried ug Inge sa Alemanya miingon: “Kami kasagarang mohatag ug gasa kon kami gustong mohatag, apan planohon namo ang mas dagkong mga gasa.” Sa susama, si Dieter ug Debora naningkamot gayod sa paghatag ug mga gasa sa ilang batang anak nga lalaki sa tibuok tuig. Sila miingon nga “ang gidak-on o bili sa gasa ikaduha lamang, ug ang dako o mahal nga mga gasa talagsa ra.”

Daghang kabataan nagalaom nga makadawat ug mga gasa sa panahon sa Pasko, busa ang elemento sa paghatag ug sorprisa mawala. Si Helga miingon nga ang iyang “mga anak mas malipayon dihang makadawat silag mga gasa nga wala paabota kay sa makadawat sila ug mga gasa sa mga okasyong gipaabot ang mga gasa.” Si Natascha, nga 15 and edad, miuyon nga “mas maayong makadawat ug sorprisa nga gasa nga kinasingkasing gihatag kay sa gasa nga ihatag sa tino nga panahon tungod kay maoy kustombre.”

Sa susama, hinungdanong magmaalisto sa matang sa mga gasa nga kalipayan sa mga bata. Mahitungod niini, si Fortunato, nga nagpuyo usab sa Alemanya, miingon: “Ang mga gasa nga among ihatag kadaghanan maoy mga butang nga isulti sa mga bata nga gusto nilang mabatonan. Apan naningkamot kami sa paghatag niini sa panahong wala dahoma. Imong makita ang ilang kalipay!”

Nakita usab sa mga ginikanan nga ang paghatag sa mga anak ug gasa sa panahong may sakit sila diha sa balay makapalipay kanila. Ang uban mohatag ug mga gasa sa dili pa ang bakasyon sa eskuylahan nga motabang sa ilang mga anak nga magmaokupado. Pananglitan, sa wala pa ang bakasyon, si Stefan gihatagan ug mikroskopyo. “Miabot kini nga dako kaayong sorprisa,” miingon ang iyang amahan, “ug sa literal milukso siya sa kalipay.” Sa pagkatinuod, ang kinabubut-on, dili-pinugos nga paghatag mohatag dakong kalipay sa maghahatag ug sa dumadawat.

Tinuod, ang mga bata adunay ilang kaugalingong kagustohan. Si Jörg ug Ursula miingon: “Kon sultihan kami sa among anak nga babaye kon unsay iyang gusto, among ipakig-estorya kini kaniya. Makataronganon ba ang iyang gusto? Ang butang ba angay sa iyang edad? May lugar ba kami alang niana? Kon dili dayon namo mahatag ang iyang gusto, amo kanang hinumdoman ug maningkamot sa paghatag niini sa husto nga okasyon sa ulahi.” Siyempre, dili maayong patuyangan ang mga bata pinaagi sa paghatag sa tanan nilang gusto, nga makawala sa ilang kalipay nga ikadulot sa pagdawat ug mga gasa.

Ang mga ginikanan nga nagabatasan sa paghatag makapasa ngadto sa ilang mga anak sa espiritu nga malipayong mapabanaag. Miingon ang diyes-anyos nga si Sebastian: “Dili kinahanglang maghulat pa ako ug espesyal nga mga okasyon sa paglipay sa akong mga ginikanan ug mga igsoong babaye. Kinahanglang maayo lang ang akong ginhawa ug may pipila ka sensilyo sa akong bulsa.”

Nakaplagan sa mga pamilya sa mga Saksi ni Jehova nga ang mga gasa nga laing matang, usab, mas maayo kay sa paghatag sa panahon sa Pasko. Kini maoy plinanong mga biyahe o mga ekskursiyon, ingnon ta sa zoo, museo, eksibisyon, o sa banika. Kining mga gasaha edukasyonal ug tinuod makalingaw pa sa mga bata.

Ang mga Panalangin sa Malipayong Paghatag

Pinaagi sa pagpadapat sa mga prinsipyo sa Bibliya sa paghatag, malikayan nato ang kalisod ug kabalo nga dala sa paghatag sa panahon sa Pasko. Ug hinumdomi, ang paghatag sa atong panahon ug mga katakos sa paglig-on sa uban sa mental ug sa espirituwal maoy gasa nga mas bililhon kay sa materyal nga mga regalo. Kining labaw nga pagpanghatag makalig-on sa bugkos sa pamilya, makalig-on sa mga panaghigalaay, ug mohatag tinuod nga kalipay sa tibuok tuig dili lamang sa dumadawat kondili ilabina sa maghahatag.​—Buhat 20:35.

Busa imbes ang naandang pinugos nga paghatag ug pinaskohan karong tuiga, nganong dili sulayan ang lahi nga paagi? Nganong dili sulayan ang mas maayong paagi?

[Kahon/Hulagway sa panid 12]

Apan Dili Kaha Kini Handomon sa mga Bata?

Si Rebecca, 16: “Ako wala maghandom ug Pasko, sanglit makadawat man ako ug mga gasa sa tibuok tuig. Mas dako ang akong kalipay sa sorprisa nga gasa kay sa pinugos nga gasa.”

Si Tina, 12: “Malipay kaayo akong makadawat ug angay nga mga gasa, dili sa tinakdang panahon, kondili sa bisan unsang panahon sa tuig​—ug dili sa mga gasa nga kinahanglang pasalamatan nako ug wala magkinahanglan niini.”

Si Birgit, 15: “Ang tanang mga gasa sa kalibotan walay-bili kon may mga suliran ang pamilya. Maoy hinungdan kon nganong ginahimo namo ang daghang butang ingong pamilya.”

Si Janosch, 12: “Kita nga mga anak kinahanglang magahigugma sa atong mga ginikanan bisag dili kita nila hatagan ug mga regalo. Usa na ka dakong gasa mismo ang ilang gugma.”

[Hulagway sa panid 10]

Ang matahom nga gasa​—mao ang imong panahon!