Asul nga Mutya sa Oregon Diha sa Usa ka Bolkan

ANG among paghinamhinam misamot samtang kami misugod sa pagkatbat sa kabukiran sa habagatan-kasadpang Oregon sa kasadpang baybayon sa Tinipong Bansa. Kami gisultihang ang Crater Lake walay kapareho sa bisan unsa nga among nakita. Tingyelo pa kadto, ug ang niyebe napundok sa daplin sa dakong dalan, nga taas pa kaayo sa lebel sa mata. Ingong resulta, sa pag-abot namo sa among destinasyon, amo pang nakita ang bantog nga lanaw. Apan may giwang nga giputol sa buldoser sa pader sa niyebe nga mihatag kanamo sa talan-awon ibabaw sa pangpang. Ug talagsaon gayod nga talan-awon!

Didto, sa ubos kanamo, mao ang Crater Lake, nga dugom kaayong asul nga mutya nga nahimutang sa nahugno nga sentro sa usa ka bolkan. Kami nagsud-ong sa usa ka lanaw nga 589 metros sa giladmon nga napuno sa ulan ug niyebe. Ang nindot nga banaag sa tubig nga daw salamin nakapalisod sa pagtuo nga ang lanaw maoy mga napulo kilometros sa gilapdon. Ang 32-kilometros nga sirkulo sa punog-niyebeng mga pangpang naglibot sa maong mutya.

Kami didto sa ngilit sa dako kaayong lungag nga naporma sa nahugnong tumoy sa usa ka bolkanikong bukid nga gihatagan sa ngalang Bukid Mazama sa 1896. May teoriya ang mga geologo kon kanus-a kana naporma ug sa unsang paagi eksaktong naporma. Kami yanong nagbarog nga nahibulong sa maong talagsaong talan-awon ug nagapasalamat sa Maglalalang tungod sa mga sentido nga nagatugot kanamo sa pagsabot ug pagpabili sa maong katahom.—Tinampo.