Pagpaniid sa Kalibotan
Una Alang sa mga Saksi!
Ang mga awtoridad sa Aprikanhong nasod sa Tanzania nagtugot sa unang panahon sa mga Saksi ni Jehova sa libreng pagtigom alang sa Kristohanong pagsimba. Sa Mayo ug Hunyo sa miaging tuig, ang serye sa lima ka sirkitong asembliya malamposong gihimo sa tibuok nasod. Ang giipong tumatambong sa maong mga panagkatigom maoy 5,177, nga 124 ang gibawtismohan—ang kinadaghanan sa mga bawtismo nga sukad nahitala sa kasaysayan sa buluhaton sa mga Saksi sa Tanzania. Alang sa kadaghanan sa nanambong, kadto ang una nilang asembliya. Usa ka asembliya gihimo sa dakong awditoryum sa kampus sa Unibersidad sa Dar es Salaam.
Mga Katoliko Mibiya
Usa sa matag lima ka tawo nga nagdakong Romano Katoliko “wala na mag-isip sa iyang kaugalingon nga sumusunod sa pagtuo,” nagtaho ang The New York Times. Kon itandi sa gidaghanon sa mga tawong nakombertir sa Katolisismo, ang gidaghanon sa mga namiya, ang surbi nagapakita, maoy tulo ka pilo. Gisitar sa surbi ang pagminyo sa lain ug relihiyon ingong pangunang hinungdan sa mga namiya. Labing menos katunga sa kanhing mga Katoliko nga giinterbiyo nag-ingon nga naminyo silag dili Katoliko, samtang un-kuwarto nag-ingon nga sila diborsiado sa presente o diborsiado sa nangagi ug sa maong panahon naminyo pag-usab. Ang aberids nga edad niadtong nagpalayo sa iglesya maoy 36.
Mga Kiropraktor sa Kahayopan
Ang nagkadaghang kiropraktor nagatambal sa kahayopan ingon man sa mga tawo, nagtaho ang The Wall Street Journal. “Ang pila ka kiropraktor karon nagatambal sa kahayopan sa bug-os panahon, apil ang ubay-ubayng mga beterinaryo usab.” Bisan tuod wala dayega sa tibuok yuta, ang mga kiropraktor sa kahayopan nag-ingong sila nakabatog mga resulta diin napakyas ang tradisyonal nga mga beterinaryo. Apil sa kahayopang gitambalan mao ang mga kabayo, mga llama, mga iring, mga iro, ug mga abukay. Tungod sa gagmitoy o, kadaghanan, dagkong mga bukog, kinahanglang ugmaron ang bag-ong mga teknik. “Ang pila ka kiropraktor nagabutang ug gihanigang 2-por-4 sa tapad sa mga bukog sa dagkong mga hayop ug dukdokon ang tabla pinaagig pakang,” nag-ingon ang Journal.
Pagkabuang sa Prangkiyo
“Sa 1985 lamang, ang kanasoran sa tibuok kalibotan migamag 9,141 [bag-ong mga isyu sa] mga prangkiyo ug 915 gagmayng mga pliego sa mga prangkiyo,” nag-ingon ang The New York Times. “Ang pagpalit lamag usa sa matag usa mokostar sa usa ka kolektor ug kapin sa $12,000.” Ang mga prangkiyo karon usa sa labing maayog-saping mga eksportasyon taliwala sa kanasoran sa South Pacific. Pananglitan, 20 porsiento lamang sa mga prangkiyong gigama sa Tonga ang aktuwal nga gigamit sa koreyo. Ang linaing mga prangkiyong lingin, sa pormang pinya o saging, o ang porma sama sa nasod gipalit dayon sa mga kolektor. “Ang Pitcairn Islands, nga pinuy-anan sa mga 50 lamang ka tawo, nagaisyug bag-ong mga hugpong sa mga prangkiyo upat ka beses sa usa ka tuig ug halos kana lamang ang gieksportar,” nag-ingon ang Times. Ug ang Tuvalu, usa ka nasod nga may 8,000 nga populasyon, “nagaisyu sa aberids nga usa ka bag-ong prangkiyo sa usa ka adlaw.”
Positibong mga Lakang
Ang Belgianong peryodiko nga Le Soir nagtaho nga gihimo ang positibong mga lakang sa bag-ong presidente sa Burundi sa pagpasig-uli sa kagawasan sa relihiyon sa tibuok nasod. Sa 30-minutong pakigpulong sa pagkatapos dayon sa pagpukan sa gobyerno nga nagpalagpot sa kanhing presidente, ang bag-ong gipalingkod nga presidente, si Medyor Pierre Buyoya, naglig-on sa iyang tuyo sa pagtukod pag-usab sa kagawasan sa pagsimba, nga gidahom ang paghanaw sa ubay-ubayng mapig-otong mga lakang nga gitumong sa mga Katoliko, apan sa mga Saksi ni Jehova usab, mga Protestante, ug mga Muslim,” nag-ingon ang Le Soir. Si Presidente Buyoya nagsaway “sa nagkadaghang masantaong mga pagpriso nga tagdugay kaayo, diniktador ug kadaghanan ilalom sa dili-maayong mga kahimtang, ug pagkawalay nagkahiusang baroganan batok sa kriminalidad.” Sa pagtuboy sa polisa sa presidente bahin sa tawhanong mga katungod, ang bag-ong gobyerno sa Burundi nagpagawas sa tanang naprisong Saksi ni Jehova.
Pag-init sa Gatas Pinaagi sa Microwave
Sumala sa librong The Canadian Parents’ Sourcebook, ang pag-init sa mga beberon sa bata sa microwave nga hurno may kapeligrohan sa bata. Sa usa ka seksiyon bahin sa “Pasidaan sa Microwave,” ang mga awtor nagpasidaan nga ang batasan “nakapaso dihang kana dili hustong pagkahimo” kay ang hurno “nagainit sa gatas nga dili uniporme.” Bisan pag ang beberon mismo daw bugnawng hikapon, “ang lainlaing bahin sa gatas lahig mga temperatura,” nag-ingon ang mga awtor. Ang susamang pasidaan gihatag bahin sa pag-init sa mga garapon sa pagkaon sa bata diha sa mga hurnong microwave. Kanunayng susiha ang temperatura sa gatas o pagkaon sa dili pa ipakaon sa bata. Sila nagsugyot usab sa pagsulti sa mga yaya ug uban pa bahin sa maong panagana. Ug kay ang “kusog nga pag-init makapahinabog mga suliran sa bakterya,” sila nagpasidaan batok sa pag-init sa gipayelohang gatas sa suso diha sa hurnong microwave.
Pasidaan sa Pagkaluwas
Ang pagkaluwas sa nukleyar reactor kinahanglang pauswagon, nag-ingon si Dr. Robert Gale, usa ka espesyalista sa transplant sa utok sa bukog nga nagtambal sa mga biktima sa aksidente sa Chernobyl sa U.S.S.R. sa miaging tuig. Siya nagpatuo nga may 25-porsientong purohan sa pagkadisgrasya sa planta sa nukleyar nga enerhiya nga susamag gidak-on sa laing dapit sa sunod napulo ka tuig ug 50-porsientong purohan sa Tinipong Bansa. Ang Alemang mantalaang Hannoversche Allgemeine nag-ingong ang mga estadistikang nahipos sa pagkakaron nagapailang “sa sunod 50 anyos ang gikalkulong 60,000 ka tawo sa tibuok kalibotan mamatay sa kanser ingong resulta sa pagkatunaw sa uyok sa Sobyet nga reaktor . . . Ang dugang 5,000 makaagom ug kadaot sa gene ug abot ug 1,000 ang makaagom sa mga depekto sa panglawas sukad sa pagkatawo ingong resulta sa Chernobyl.” Ang atomikong enerhiya, matud ni Dr. Gale, makaayo kon maayong pagkadumala.
Polis nga mga Leyon sa Dagat
Samtang ang ilang mga isigkaingon sa Florida ug California gibansay sa paghinimbang sa mga bola ibabaw sa ilang mga ilong ug paghimo sa ubang makalingawng kalaki, ang pila ka leyon sa dagat o seals sa New York City gibansay karon sa pagpamolis. Ang mga leyon sa dagat diha sa pantalan gitudloan sa pagkaplag sa mga pusil nga ilabog sa tubig. Ang pagkaplag sa gilabog nga kontrabando ug mga droga, pagkuhag letrato sa ilalom sa tubig, ug pagkaplag sa nalunod nga mga butang gihisgotan usab. Si Stanley, dos-anyos nga leyon sa dagat sa pantalan nga mahibalo nang mangitag mga pusil, nagdugang sa pagbadbad sa mga bakos sa lingkoran diha sa nalunod nga mga tawo sa iyang talaan. Ang maong katakos gidahom nga mapuslanon sa pagkaplag sa mga lawas gikan sa mga katalagman sa dagat.
Makasaysayanhong mga Pagkatawo
Sa miaging Oktubre 1, ang 48-anyos nga taga South Africa nanganak sa iyang tulo ka apo. Si Pat Anthony nagsilbing kapuling inahan ilis sa iyang 25-anyos nga anak babaye, kansang matris gikuha tulo ka tuig nga miagi. Si Gng. Anthony gibutangag upat ka binhi sa iyang anak babaye nga napertilisar sa usa ka laboratoryo pinaagi sa binhi sa iyang umagad-nga-lalaki. Ang triplet, duha ka lalaki ug usa ka babaye, gipanganak pinaagig sesaryan sa usa ka ospital sa Johannesburg. Kining kasoha wala lang magsugnod sa moral ug legal nga lantugi bahin sa pagkahimong kapuling inahan kondili nahimo usab nga relihiyosong gumonhap. Sanglit ang pamilya maoy mga Romano Katoliko, ug ang Batikano nagsaway sa praktis sa pagkahimong ginikanan pinaagi sa kapuling inahan, itugot kaha sa iglesya nga mabunyagan ang mga bata?
Gipasaylo sa Presidente
Ang usa ka opisyal nga pahayag nga giluwatan ngadto sa prensa gikan sa Rwandese Republic Embassy sa Canada nagpahibalo nga ang presidente sa Rwanda, si Medyor Heneral Juvénal Habyarimana, nagtugot sa “bug-os nga pagsuspendir sa mga sentensiya” sa tanang Saksi ni Jehova nga gipriso tungod sa relihiyosong mga hinungdan. Sumala sa pahayag sa embahada, ang maong aksiyon nahitabo sa okasyon sa ika-25 nga anibersaryo sa independensiya sa Rwanda. Sa pagkagawas nila, ang mga Saksi gitugotan sa pag-uli sa ilang mga balay ug pagpadayon sa ilang sekular nga trabaho. Gitahong ang lokal nga opisyales nga napakyas sa pagtuboy sa pagpasaylo sa presidente gikasab-an sa sentral nga gobyerno.