Ang Uniberso—Gilalang kun Sulagmang Hitabo?

SA NAGPADAYONG lantugi bahin sa kon ang uniberso gilalang o mitunghang sulagma, ang mosunod nga mga komento ni Paul Davies, propesor sa theoretical physics sa Unibersidad sa Newcastle sa Gran Britanya, diha sa iyang librong God and the New Physics makapukaw kaayo sa hunahuna:

“Kon yanong aksidente ang uniberso, ang purohan batok sa pagbaton niinig maila nga kahapsay gamay kaayo. . . . Kay tin-aw mang dili kini ang kahimtang, daw lisod ang paglikay sa konklusyon nga ang aktuwal nga kahimtang sa uniberso ‘gipili’ o sa usa ka paagi gipihig gikan sa daghan kaayong kahimtang nga diha, nga gawas lang sa gamay kaayong tipik niana bug-os nga gubot. Ug kon napili ang ingon ka labihang dili posible nga unang kahimtang, tinong may tigpili o tigdesinyo nga maoy ‘nagpili’ niini.”

Sa pagkamatuod, maingong ang usa ka magtutukod magpili sa usa ka desinyo ug sa materyales aron matukod ang usa ka butang sa pag-alagad sa iyang katuyoan, mao usab ang Diyos nga labing gamhanan, kansang ngalan mao si Jehova, naglalang sa uniberso. (Salmo 83:18; Pinadayag 4:11) Tinuoray, ang konklusyon ni Propesor Davies nagpahinumdom kanato sa mga pulong ni apostol Pablo sa Hebreohanon 3:4: “Ang nagtukod sa tanang butang mao ang Diyos.”

[Tinubdan sa Letrato sa panid 13]

Mga letrato sa NASA