Gikan sa Among mga Magbabasa

Depresyon

Maikagon nakong gibasa ang inyong mga artikulo bahin sa “Depresyon—Makadaog Ka sa Bugno!” (Oktubre 22, 1987) Ang inyong presentasyon sa materyal tukma kaayo ug ang mga kinutlo untop ug makatabang. Ugaling, bisan pa sa ekselente ninyong mga pagbatbat sa mga simtoma ug mga pagbati nga hiagoman sa usa ka tawong may depresyon, gibati ko nga ang katibuk-ang pasiugda sa materyal mao nga “tabangi ang imong kaugalingon.” Kanang mga tawhana yanong dili “makatabang sa ilang kaugalingon” bisan unsaon nila pagpaningkamot. . . . Ang sugyot nga ang usa angay “makigbugno” sa depresyon makapasamot lamang sa dili-kinahanglanong mga pagbati sa sala ug pagkawalay-katakos. . . . Ang maong komento wala tuyoa nga pagadawaton ingong direktang pagsaway, hinunoa pila ka punto nga sa akong pagtuo kinahanglang ipasiugda, sa atong panlimbasog nga mugnaon ang usa ka palibot nga may pagsinabtanay ug nahiangayng pag-atiman sa mga may depresyon ug sa ilang mga pamilya. Dakog nahimo ang inyong magasin sa paghisgot sa ulohan sa paagi nga makatabang sa daghan sa pagbatog mas maayong pagsabot bahin sa depresyon.

D. L., Depressives Associated, Inglaterra

Kami tinong wala magpasiugda sa “tabangi ang imong kaugalingon” nga terapiya. Gipakita sa among mga artikulo nga may nagkalainlaing mga gidak-on sa depresyon ug nagkadaiyang mga hinungdan. Dili tanang depresyon ang gipahinabo sa panghunahuna sa usa, ug sa grabeng mga kaso kinahanglanon ang propesyonal nga tabang. Bisan pa niana, gipakita sa tin-aw sa panukiduki nga ang mga pagpasibo sa panghunahuna sa usa kadaghanan kinahanglanon sa pagbuntog sa bug-os sa depresyon. Bisan tuod matuod nga kinahanglan tingali sa tawong may depresyon ang pagbag-o sa iyang panghunahuna, sa tinong mga ang-ang sa depresyon ang usa ka tawo dakog mahimo sa pagsanta nga ang iyang situwasyon mograbe pinaagi sa paghimo sa mga kausabang gihisgotan. Tinagkawhaang tawo, nga nakontak sa “Pagmata!” samtang nagtigom sa mga artikulo, naghisgot nga miabot ang malungtarong kahupayan pinaagi sa pagpasibo sa ilang panghunahuna. Ang mga artikulo yanong nagpasidaan sa atong mga magbabasa sa matang sa panghunahuna nga mahimong makapadako sa suliran o sa pagbugno niini.—ED.

Ang inyong mga artikulo bahin sa depresyon miabot sa husto gayong panahon. Makapahinuklog ang pagkasayod nga ako nakapamulong sa pipila sa mga pamahayag. Sa daghang mga tuig ako nakigbisog sa pagbating ako ubos o inferiority complex, ug may panahong ang akong pagtahod-sa-kaugalingon nawala sa bug-os. Ang kinadak-an sa materyal nga gipahayag nagpahayag sa kompleto sa akong mga gibati. Nakaamgo ako nga sa pila ka bahin kinahanglang makatuon ako sa pagbag-o sa akong panghunahuna.

S. G., Federal Republic of Germany

Salamat kaayo sa inyong mga artikulo bahin sa depresyon. Nag-antos ako sa grabeng depresyon sukad sa pagkabata, nga kanunay nga nakigbisog batok sa mga hunahuna sa pagpatay sa kaugalingon. Sa mga 30 na lang sa edad nga akong nasayran pinaagi sa pagsusi sa pagkaalerdyik nga ang pagkontrolar sa akong ginakaon makahupay sa dakong bahin sa suliran. Apan tungod sa inyong mga artikulo akong naamgohan nga naglungtad pa sa dakong gidak-on ang hunahunang makapahinabog depresyon, nga naghikaw kanako sa kalipay ug, labi pang hinungdanon, nakapahinabong gipasa ko ngadto sa akong mga anak ang mga sumbanang makapahinabog depresyon tungod sa paagi sa pagpakiglabot nako kanila. Ang artikulong “Pagkadaog sa Bugno Batok sa Depresyon” mihatag kanakog paglaom nga adunay paagi sa pagsulbad sa suliran. Makita na nako ang positibo kaayong mga resulta diha sa akong kaugalingon ug sa akong mga anak gumikan sa pagpadapat sa maayong mga sugyot nga inyong gipresentar.

R. G., Tinipong Bansa