“Gihigugma Ko ang Diyos. Siya ang Naghimo Niining Kahoya”
Daghan nakakitag mga kahoy ug nakakitag kuwarta. Kining dos-anyos nga batang babaye nakakita sa mga kahoy ug nahigugma sa Diyos. Dihang magkadako siya, daghan pa ang iyang makita ug dugang ug dugang nga higugmaon niya ang Diyos. Ania ang pila ka impormasyon bahin sa punoan sa kahoy nga iyang gigakos.
Kini puno sa “mga tubotubo.” Ang uban gikan sa mga gamot ngadto sa mga dahon, ang pipila gikan sa mga dahon ngadto sa mga gamot. Ang mga tubotubong nagapaitaas anaa sa sapwood. Sila nagadalag tubig ug mga minerales ngadto sa tanang dahon sa kahoy. Ang mga tubotubo nga nagapaingon sa ubos anaa sa ilalom lang sa panit. Sila nagadalag pagkaon gikan sa mga dahon ngadto sa mga gamot.
Ang tumoy sa tanang gagmayng mga gamot adunay gahi, lanahong taklop ug mobugsok sa yuta, nagatuyok samag tribuson nga mobugsok. Sa likod lamang ug diyutay sa tumoy mao ang gatosgatos ka mga buhok sa gamot nga mosuhop ug tubig ug mga minerales. Kining tubiga makasaka sa gatosgatos ka piye ngadto sa kinatas-ang dahon sa kinatas-ang kahoy.
Ang dahon mokuhag carbon dioxide gikan sa hangin ug enerhiya gikan sa adlaw, ug pinaagi sa tubig ug sa minerales gikan sa mga gamot, kini nagahimog pagkaon alang sa tanom. Ihatod kini sa “mga tubotubo” sa pagkaon ngadto sa tanang mga selula sa kahoy. Ang gahom sa dahon sa paghimo niini wala hisabti. Ug gitawag kining usa ka milagro.
Bahin lamang kana sa nagakahitabo diha sa punoan sa kahoy nga gigakos sa atong batang mahigugmaon ug kahoy.
Karon siyete na ang iyang edad. Nakapalapad na siya sa iyang hunahuna sa pagsabot sa tibuok kahoy—mga dahon ug mga gamot ug sa punoan. Gihigugma gihapon niya ang Diyos, iyang nakita gihapon Siya ingon nga mao ang Magbubuhat sa kahoy, ug busa nakakita ug labaw pa kay sa mga maalamon sa kalibotan.—Roma 1:20; 1 Corinto 3:19, 20.