Gikan sa Among mga Magbabasa

Pagtambal sa mga Paso

Sa dili pa dugay, buot kong pasigahon ang pilot light sa heater sa tubig sa banyo. Gibuksan ko ang gas, ug sa taudtaod, gidagkotan ko ang posporo. Sa kalit, midilaab ang tibuok kong palibot. Ang likod sa wala kong kamot, nga gigamit nako sa pagpislit sa swits sa pilot light, napaso sa bug-os. Nahinumdom ako nga nakabasa sa Pagmata! nga tubig ang idapat, mao nga gipabugnawan nako ang akong kamot. Gisugyot sa akong amahan nga haklapan sa pinutol nga dahon sa aloe, ug gibuhat ko ang iyang giingon. Apan ang kahapdos milukop sa tibuok kong kamot, ug dili ko kadto maagwanta. Sa maong panahon, gisugdan ko pagsusi ang Watch Tower Publications Indexes ilalom sa “Burns” ug nakit-an ko ang artikulong “Unsay Angay Nimong Masayran Bahin sa mga Paso.” (Septiyembre 22, 1980) Sa pagkabasa niadto, akong nakita nga kadto wala mag-ingong ‘pabugnawi sa tubig’ kondili ‘ibutang sa tubig nga may yelo.’ Sulod sa menos sa tulo ka oras akong gibuhat ang giingon sa artikulo. Tungod kay grabeng pagkapaso wala ako maghunahuna nga mamaayo ang tibuok kong kamot. Apan sa pagkabuntag, tan-awa! Walay mga ulat. Ang akong kamot sa hingpit naayo.

M. K., Hapon

Kining pagtambala gihisgotag maayo sa among isyu sa Hulyo 22, 1966 sa Iningles. Ang napasong kamot o ubos nga kulamoy ikahulom sa tubig nga may yelo sa 15 minutos, kuhaon, ug dayon sublion kana hangtod ang kahapdos bug-os mahanaw kon mahigawas sa tubig nga may yelo. Kini kasagarang mahitabo sa mga tulo ka oras. Ang mas dagkong mga bahin sa lawas katambalan pinaagig mga yelong pinutos. Pagahinumdoman nga ang sobra ka bugnaw nga idapat sa dagkong mga bahin sa lawas makapaubos kaayo sa temperatura sa lawas, nga makapahinabog shock.—ED.

Batakang-Balaod sa Tinipong Bansa

Nakaangay ako sa artikulong “Ang Batakang-Balaod sa Tinipong Bansa ug ang mga Saksi ni Jehova.” (Oktubre 22, 1987) Tapos ako makahimog panukiduki sa kasaysayan sa Batakang-Balaod, akong nasayran nga daghan sa mga tawong nagpirma sa Batakang-Balaod maoy rasista ug mapintasong mga tag-iyag mga ulipon, ug sa samang panahon sila relihiyosong mga tigsimba ug nagpugos sa ilang mga doktrina diha sa ilang mga ulipon. Ang mga basahon sa kasaysayan daw naglaktaw niining mga kasayorana.

A. N., Hapon

Matuod nga ang hamiling mga mithi nga gipahayag sa preambola sa Batakang-Balaod, ‘aron pagatukoron ang hustisya, pagatinoon ang domestikong kalinaw, ug paneguroon ang mga panalangin sa kagawasan,’ wala makabenepisyo sa tanang molupyo sa Tinipong Bansa sa dihang kadto gisagop sa 1787. Halos 80 ka tuig ang milabay una idili ang pagpangulipon (1865) ug kapin sa 130 ka tuig una igarantiya sa kababayen-an ang katungod sa pagbotar (1920). Ang bug-os nga pagbaton sa rasanhong pagkamanagsama mas nadugay pa. Siyempre, kini nagapaila sa mga limitasyon sa dili-hingpit, hakog nga mga tawo ug nagapakita sa dakong panginahanglan sa Gingharian sa Diyos pinaagi sa iyang Anak, si Kristo Jesus, diin molungtad ang bug-os nga pagkamatarong. (Isaias 9:6, 7; 32:1, 2; Mateo 6:9, 10) Hinuon, ikaingon nga ang Batakang-Balaod, bisan pa sa tanang kahuyangan niana, nasudlan sa ekspresyon sa mga mithi diha sa usa ka gambalay nga nakapaposible sa mga kauswagan sa paglihok sa gobyerno aron ang maong mga mithi sa kataposan mapahimuslan sa mas daghang tawo ug sa mas dakong sukod karong adlawa kay niadtong 1787.—ED.