Katingalahang Tiil

“ANG tuko nagapanghawid sa iyang kaugalingong mga kamot ug siya anaa sa palasyo sa mga hari.” Nagkanayon ang Bibliya diha sa Proverbio 30:28. Ang iyang mga tiil samag hitsura sa mga kamot, apan ginahimo niini ang mga buhat nga dili mahimo sa mga kamot. Kini maoy laing kaso nga naiwit sa kalalangan ni Jehova ang mga imbensiyon sa tawo sa libolibong mga tuig—niining kasoha ang Velcro nga igpadikit sa panapton nga kaylap gigamit karong adlawa.

Ang mga bisita sa lugar sa Mediteraneo matingala sa pagkakitag gamay komung tuko, Tarentola mauritanica, nga magkapagkapag sa pagdagan sa mga bungbong ug sa mga kisame, ug magkapagkapag bisan sa mga bildong bentana. Kas-a gituohan nga gihimo kini ni Gn. Tuko pinaagi sa mga pangsuyop sa iyang mga tiil o kaha papilit. Apan walay sama ka baol niana!

Ang librong The Grand Design nag-ingon diha sa panid 184: “Ang matag kamot sa tuko dunay pinadingan tagaytayong mga himbis. Ilalom sa mikroskopyo makita kini nga ang kada himbis dunay ginatos ka gagming, samag-buhok nga nanuybo nga gitawag setae. Daw dili pa kini igo, ang dugang pagpadako mopadayag nga ang tagsa-tagsang setae dunay ‘mga brotsa’ sa tumoy nga hangtod sa 2000 ka gagmay kaayong nagsangang mga balhibo, nga dunay samag platitong nga tumoy. Kini mohatag katingalahang total nga mga 100 ka milyong punto sa pagpilit.”

Minilyon sa mikroskopikong gidak-ong mga kaw-it motapot diha sa labing gamayng lungaglungag sa hawan—bisan nianang makita sa mga bildo. Ang mekanismo sa pagtangtang ug sa pagdikit sa mga kaw-it katingalahan. Pikoon sa tuko ang tumoy sa iyang mga tudlo pataas, nga makaukang sa mga kaw-it gikan sa mga lungaglungag sa hawan. Samtang nakapiko pa ang mga tudlo pataas, iyang iabante ang iyang tiil sa sunod nga lakang ug dayon iyang iduot ang iyang mga tiil paubos. Ang mga kaw-it motapot sa mga lungaglungag sa hawan—sama sa iring nga ulhos-ulhos nga nagtikang ug nagtangtang sa iyang mga kuyamoy samtang nagkatkat ug kahoy.

Busa, ang gamayng tuko naghimog katingalahang kalaki sa iyang katingalahang mga tiil.

[Letrato sa panid 31]

Ang lapalapa sa “Velcro” nga tiil sa tuko

[Tinubdan]

Breck P. Kent