Ang Holocaust—Ang Nahikalimtang mga Biktima
“Ang pagpamuo sa mga kaliwat ingong polisa sa mga Nazi miresultag kamatayon sa daghang Polakong mga Hentil ug Polakong mga Hudiyo, ug busa mihimo kanilang mga biktima sa ‘Nahikalimtang Kalaglagan.’”—“The Forgotten Holocaust,” ni Richard C. Lukas
ANG Holocaust—unsay kahulugan niini? Sumala sa pipila ka diksiyonaryo, kini maoy pagpuo sa mga Hudiyong Uropanhon pinaagi sa mga Nazi sa panahon sa Gubat Kalibotan II. Kini nagpaila dayon nga mga Hudiyo lamang ang nag-antos ug namatay sa mga kamot sa mga Nazi. Apan, ang hustisya ug kamatuoran sa nahitabong “Holocaust” ikapadapat ba lamang sa mga biktimang Hudiyo sa panahong Nazi?
Ang magsusulat nga si Richard Lukas miingon: “Ang pulong Holocaust gisabot sa daghang katawhan nga mao ang trahedyang nasinatian sa mga Hudiyo ubos sa mga Aleman sa panahon sa Gubat Kalibotan II. Gikan sa maong panlantaw, atong masabtan nganong ang mga Hudiyo karong adlawa gusto nga ang maong termino ipadapat lamang diha sa ilang naeksperyensiyahan . . . Bueno, kon dili iapil ang uban gikan sa pagkalangkit sa maong Holocaust, ang kalisang nga naagoman sa mga nitibo sa Polandiya, ang ubang mga Slaviko, ug ang mga Gypsies diha sa mga kamot sa mga Nazi ibali wala na lamang, kon di hikalimtan.”
Si Lukas usab miingon: “Para kanila [mga historyano], ang Holocaust maoy talagsaon sa mga Hudiyo, ug busa sila adunay diyutay o walay ikaingon gani mahitungod sa nuybe ka milyong mga Hentil, apil ang tulo ka milyong [Hentil] nga mga taga Poland, kinsa nahanaw usab sa maong dakong trahedyang nahitabo sa kalibotan sukad.”
Ang Tinguha ni Hitler sa Puluy-anan
Sa dihang ang kasundalohan ni Hitler misulong sa Poland niadtong Septiyembre 1939, sila ubos sa mando ingong polisa ni Hitler sa pagbaton ug Lebensraum, puy-anan, para sa Alemang mga tawo. Sa giingon ni Richard Lukas: “Para sa mga Nazi, ang mga Polako maoy Untermenschen (ubos nga mga tawo) kinsa mipuyo sa yutang bahin sa Lebensraum (puy-anan) alang sa superyor nga rasang Aleman.” Busa, si Hitler miawtorisar o mimando sa iyang mga sundalo sa pagpatay nga “walay kukaluoy sa tanang mga lalaki, mga babaye, ug mga bata nga adunay Polakong kagikan o pinulongan. Niining paagiha lamang atong mabatonan ang atong gitinguhang puy-anan.”
Niadtong Septiyembre 1939 misugod ang walay-hunong nga kalisang alang sa Polakong katawhan. Si Hitler miingon: “Ang gubat maoy gubat sa kalaglagan.” Ang pangabaga ni Hitler si Heinrich Himmler mideklarar: “Ang tanang mga taga Poland mahanaw gikan sa kalibotan. . . . Gikinahanglan nga ang bantog nga mga tawong Aleman mag-isip nga ang unang buhaton nila mao ang paglaglag sa tanang mga Polako.” Busa, ang kalaglagan dili lamang sa mga Polakong mga Hudiyo; kini gitumong sa “tanang mga Polako.”
“Ang kalisang mikaylap sa tanang giukupahang mga nasod. . . . Pero diha sa Poland ang matag-usa ilalom sa maong kabangis, ug dinaghang mga pagpatay nga gipasukad sa tiningub nga kasal-anan ang kanunayng nahitabo, tungod kay ang usa ka Polako, walay pili sa edad, sekso, ug panglawas maoy membro sa gihukman sa kalaglagan nga nasod—nga gihukman sa kalaglagan sa magbabalaod sa partidong Nazi ug kagamhanan,” matud ni Catherine Leach, maghuhubad sa Polakong basahong Values and Violence in Auschwitz. Siya miingon nga gilantaw ni Himmler ang mga Polako ingong ubos nga rasa nga maoy mga ulipon.
“Bisan tapos nga misurender ang Poland niadtong [Septiyembre 28, 1939], ang Wehrmacht [kasundalohang Aleman] nagpadayon sa pagtuman sa gitambag ni Hitler niadtong Agosto 22, 1939, sa dihang iyang gimando ang pagpatay ‘nga walay kukaluoy sa tanang mga lalaki, babaye ug mga bata nga adunay kagikang Polako o pinulongan.’” Sa unsang paagi ang kasundalohang Aleman ug ang SS gitukmod sa maong walay kaluoyng pagpatay? Pinaagi sa pagsilsil sa pagtulon-ang halangdon ang rasang Aryan ug ang pagkaubos sa uban. Busa, sa giingon ni Lukas sa The Forgotten Holocaust: “Ang teoriya sa Nazi sa pagbaton ug koloniyal nga emperyo sa Poland gipasukad sa pagsalikway sa katawhang Polako kinsa, sunod sa mga Hudiyo, labing gikasilagan ni Hitler.”
“Negatibong Demograpiyang Polisa”
Sa iyang introduksiyon sa librong Commandant of Auschwitz, si Lord Russell sa Liverpool miingon: “Sa panahon sa gubat lagmit mga napulog-duha ka milyong mga lalaki, mga babaye, ug mga bata gikan sa gisulong ug giukupahang mga teritoryo gipatay sa mga Aleman. Diha sa ugdang nga pag-ihap, utso ka milyon kanila nahanaw sa mga kampo konsentrasyon. Niini, dili mokulang sa lima ka milyon maoy mga Hudiyo. . . . Ang tinong ihap, bisan pa niana dili gayod hisayran.” Diha niining mga ihapa lamang, adunay pito ka milyong mga biktima nga dili mga Hudiyo.
Ang laing pamatuod maoy gikan kang Catherine Leach, nga misulat: “Ang Poland maoy unang nasod nga nailalom sa ‘negatibong polisa sa demograpiya,’ ni Hitler, kansang katuyoan maoy pag-andam sa luag nga teritoryo sa ‘Silangan’ alang sa pagbalhin sa mga Aleman, ug ang Poland nakaagom sa daghan nga nawad-ag kinabuhi kay sa tanang mga nasakop nga mga nasod—220 por 1000 ka mga pumoluyo. Ang tinubdan sa Poland mipahayag nga dili mokulang sa 6,028,000 ka mga lungsuranong Polandes . . . ang nawad-an sa ilang mga kinabuhi.” Niining tanan, 3,200,000 ang mga Hudiyo. Kini nagpasabot nga halos 50% sa mga Polakong namatay maoy dili mga Hudiyo.
Mao nga dili malalis, diha gayoy “Nahikalimtang Kalaglagan” sa minilyong dili-Hudiyong mga biktima, nga kadaghanan kanila maoy mga Slavikong kagikan. Kini naglakip sa minilyong mga Rusong gipamatay sa mga Nazi. Ang maong mga Ruso walay kapilian. Tungod sa rasanhong doktrina sa Nazi, dili mapugngan nga sila gihukman sa kamatayon.
Gani, kining maong estadistika wala mag-apil sa linibong dili-Hudiyong mga Aleman kinsa nag-antos usab ingong biktima sa Holocaust tungod sa pagsupak kang Hitler ug sa iyang pilosopiya mahitungod sa kahalangdon sa iyang kaliwat. Uban kanila mao ang linibong mga Saksi ni Jehova kinsa midumili sa pakiglabot sa militaristikong mga tinguha ni Hitler. Oo, nakatag latas sa Alemanya ug sa mga nasod nga nasakop sa mga Nazi ang linibong katawhan kinsa mihimo sa ilang kaugalingong pagpili nga misangpot sa pagdala kanila ngadto sa mga kampo konsentrasyon ug namatay ang kadaghan kanila ingong mga martir.
Busa, ang angayang pangutana mao, Unsay kalainan tali niadtong mga biktimang namatay sa Holocaust ug niadtong kinsa mga martir?
[Mapa/Mga Letrato sa panid 10]
(Alang sa bug-os nga pagkahan-ay sa teksto, tan-awa ang publikasyon)
Pipila sa mga kampo konsentrasyon ug mga kampo sa pagpamuo nga Nazi latas sa Uropa. Dugang niini, mao ang 165 ka mga kampo nga adunay bug-at nga mga trabaho
ATLANTIC OCEAN
LATVIA
LITHUANIA
NETH.
PRUSSIA
BELG.
LUX.
GERMANY
CZECHOSLOVAKIA
POLAND
FRANCE
SWITZ.
AUSTRIA
ITALY
[Letrato]
Si Hitler miingon: “Ang gubat maoy usa ka gubat sa kalaglagan.” Patya “nga walay kukaluoy ang tanang mga lalaki, babaye, ug mga bata nga adunay kagikang Polako o pinulongan”
[Tinubdan]
Library of Congress
[Letrato]
Si Himmler mideklarar: “Ang tanang mga Polako wagtangon gikan sa kalibotan”
[Tinubdan]
UPI/Bettmann Newsphotos