Ang Holocaust—Oo, Kini Tinuod Nahitabo!

KATINGALAHAN, diyutay lamang sa katawhan ang miangkon nga ang Holocaust wala mahitabo ingon sa gipakita sa modernong kasaysayan. Sa iyang publikasyong Did Six Million Really Die? The Truth at Last, si Richard Harwood miingon: “Ang pangangkon nga adunay 6 ka milyong Hudiyo ang namatay sa panahon sa Ikaduhang Gubat sa Kalibotan, ingong direktang resulta sa plano sa mga Aleman sa pagpamuo, kini wala gayoy pasukaranan.”

Busa ang mga pangutana ikapatungha: Ang Nazi mimando ba sa kalaglagan sa mga Hudiyo sa panahon sa Gubat Kalibotan II? Ang upat ngadto sa unom ka milyong mga Hudiyo namatay ba gayod sa mga kampo konsentrasyon? Diha ba gayoy mga gas chambers? O kini bang tanan maoy pagtuis lamang sa kasaysayan sa mga Aleman?

Ang pipila sa rebisyonistang mga historyano miangkon nga kining tanan wala mahitabo. Sila nakiglalis nga, pila ka libo lamang sa mga Hudiyo ang namatay ug nga ang kadaghanan milalin ngadto sa ubang mga nasod.

Ang bag-ong kaso sa korte sa Canada nagpasundayag niining maong panaglantugi. Usa ka lalin nga Aleman sa Canada ang gidemanda tungod sa “tinuyong pagpatik sa bakak nga mga impormasyon nga makapahinabog kadaot sa sosyal o sa rasanhong pagkamatugoton” pinaagi sa paglimod nga ang Holocaust nahitabo, mitaho ang The Globe and Mail of Toronto, Canada. Ang resulta mao ang sentensiya sa pagkabilanggo sa 15 ka bulan ug ang pagdili sa iyang publikasyon nga nasudlan sa iyang bag-ong panlantaw mahitungod sa Holocaust.

Sa Kasadpang Alemanya ang antidefamation law o batok-sa-pagpakaulaw nga balaod giusab niadtong 1985 aron sa pagtugot nga bisan ang dili-Hudiyong mga tawo mahimong magpasaka ug sumbong batok niadtong “kinsa ginainsulto, ginabugalbugalan, ginapakaulawan o ginapasipad-an nga mga tawo kinsa ‘nawad-an sa ilang mga kinabuhi ingong mga biktima sa Sosyalistang Nasyonal o ubang mga porma sa mapalabilabihong pagmando.’” Ang epekto niining maong balaod mao nga kini “nagpahimo ni bisan kinsang molimod nga ang mga Hudiyo gipatay sa pagmando sa diktadoryang Nazi pagasilotan,” miingon ang Hamburger Abendblatt.

Ang pagpangulipas sa Holocaust kasagarang gitawag nga “Auschwitz lie.” Ang Auschwitz (karon Oświȩcim) maoy daotag-dungog nga kampo konsentrasyon sa Poland diin ang mga Nazi mipatay ug daghan. Sumala sa Kasadpang Alemang medya, ang tuong-bahing mga ekstrimista o tighingapin naningkamot nga ilimod kining maong mga panghitabo ug busa giterminohang “Auschwitz lie.”

Paglalin o Pagkalaglag?

Ang paglungtad karong adlawa sa minilyong mga Hudiyo nga adunay Uropanhong kagikan nagpamatuod nga ang mga Nazi wala molampos sa pagwagtang sa mga Hudiyo sa Uropa. Nga daghan sa mga Hudiyo ang nakalingkawas sa gitinguhang kalaglagan diha sa mga kampo konsentrasyon gipamatud-an sa usa ka historyanong si William L. Shirer, kinsa misulat sa iyang basahong 20th Century Journey—The Nightmare Years 1930-1940: “Dili tanang mga Austriyanong Hudiyo ang nahanaw diha sa mga kampo ug mga bilangguang Nazi. Daghang mga Hudiyo ang gitugotan sa pagpahilayo gikan sa pagkaulipon ug molangyaw. Kasagaran, sila migugol ug bahandi. . . . Tingali duolan sa katunga sa 180,000 ka mga Hudiyo sa Vienna ang mipalit sa ilang kagawasan sa wala pa magsugod ang maong Holocaust.” Kining maong laraw ilabinang miipekto sa mga katuigang 1930.

Bisan pa niana, si Shirer mipahayag nga bisan tuod nga adunay gitukod nga Opisina sa Emigrasyon para sa mga Hudiyo, ubos sa pagdumala ni Reinhard Heydrich, “sa ulahi kini nahimo nga ahensiya dili sa paglalin kundi sa pagpanglaglag, ug dinhi giorganisar ang sistematikong pagpatay sa labaw sa upat ka milyong mga Hudiyo.” Kining “katapusang solusyon” gipalakaw ni Karl Adolf Eichmann, kinsa sa ulahi gipatay sa Israel tungod sa iyang mga krimen sa gubat.

Ang mga kampo konsentrasyon dili lamang maoy paagi sa mga Nazi aron paphaon ang ilang gitamod nga ubos nga tawo ug mga rasa. Aduna pay laing gikahadlokang Einsatzgruppen (Special Action Groups), mga panon sa magpapatay nga anaa sa luyo sa misulong nga mga sundalo “ug kinsang pangunang tumong mao ang bug-os nga pagpatay sa mga Hudiyo. . . . Nga nagpahiduol sa midasdas nga panon aron walay makaikyas, ang Einsatzgruppen walay kukaluoyng mipusil, mibayoneta, misunog, mipaantos, mibunal ngadto sa kamatayon o milubong nga buhi sa halos katunga sa milyong mga Hudiyo sa unang unom ka bulan sa ilang kampaniya.”—Hitler’s Samurai—The Waffen-SS in Action, ni Bruce Quarrie.

Ang maong gidaghanon ba lisod tuohan? Kini adunay aberids nga halos usa ka pagpatay sa usa ka adlaw diha sa grupo nga adunay 3,000 ka mga membro. Sa dihang kining maong espesyal nga mga grupo sa paglihok nahiabot sa Soviet nga mga teritoryo, ang bahin sa gipamatay miabot sa “labaw sa 900,000, nga maoy duha sa tulo ka bahin lamang sa tanang Hudiyong mga biktima sa kampanya sa pagpatay.”—The Destruction of the European Jews, ni Raul Hilberg.

Ang Komandante Miangkon

Unsang katin-awan ang anaa nga gikan gayod sa nakiglabot sa pagpatay sa mga kampo konsentrasyon? Si Rudolf Höss, ang kanhi komandante sa Auschwitz nga kampo mimulo: ‘Tuohi ako, dili ka kanunay malipay sa pagtan-aw sa nagbungtod nga mga patay ug ang baho sa walay-hunong nga pagsunog.’ Siya usab mipahayag sa “kahingangha sa walay-pag-uyon nga ang Espesyal nga Detatsment sa mga Hudiyo (Sonderkommandos) gusto, ilis sa mubong lugway sa ilang mga kinabuhi, nga motabang sa pagpatay pinaagi sa gas sa mga sakop sa ilang kaugalingong rasa.” (The Face of the Third Reich, ni Joachim C. Fest, panid 285) Ang Alemang awtor nga si Fest midugang: “Ang garbo sa madapigon sa kahingpitan nga eksperto mogawas sa gipahayag ni Höss: ‘Sa kagustohan sa SS nga Reichsführer [Heinrich Himmler], ang Auschwitz nahimong sentro sa dakong kalaglagan sa katawhan sa tanang panahon,’ o sa dihang iyang gipakita uban sa katagbawan sa malampusong maglalaraw nga ang gas chambers sa iyang kampo adunay kapasidad nga napulo ka pilo kay sa atua sa Treblinka.”

Sa iyang kasaysayan sa kaugalingong kinabuhi si Höss miingon: “Sa wala palandunga, ako nahimong usa ka bahin sa dakong hinagibang pangpatay sa Third Reich.” “Ang Reichsführer SS [Himmler] mipadala sa nagkalainlaing tag-as ug ranggo nga mga pangulo sa Partido ug mga opisyales sa SS ngadto sa Auschwitz aron ilang makita ang paagi sa paghanaw sa mga Hudiyo. Tanan sila nahingangha sa ilang nakita.”a

Bisan pa niana, sila dayag naapektohan sa kalainan tali sa prase nga “Ang katapusang sulbad sa gumonhap bahin sa mga Hudiyo” ug sa iyang makalilisang nga kamatuoran sa gas chambers. Sa gipangutana sa unsang paagi siya nakabarog niana, si Höss mitubag: “Ang akong dili-mabalhinong tubag nga mao aron ipatuman nga may kalig-on ang mga mando ni Hitler angay nga pukgoon ang imong tanang tawhanong pagbati.”

Busa si Höss, ang madagmalong tawotawo, bukas nga miuyon nga ang Holocaust tinuod gayod ug nga siya usa sa mibuhat niana ingong komander sa kampo sa Auschwitz.

Sa librong Values and Violence in Auschwitz, nga unang gimantala sa Polako ni Catherine Leach, ingong maghuhubad, mipahayag nga adunay 3,200,000 ka mga Hudiyong Polandes nga nawad-an sa ilang mga kinabuhi tungod sa dinaghang pagpatay, pagpaantos, ug pagkaulipon sa trabaho sa mga kampo konsentrasyon. Siya miingon: “Ang holocaust sa mga Hudiyo sa Uropa nahitabo sa Polakong teritoryo.”

Kamatayon Pinaagig Paglumos

Ang kamatayon miabot sa daghang mga paagi diha sa mga kampo—ang kagutom, balatian, usa ka bala sa liog, gas chambers, pagbunal, pagbitay, pagpunggot sa ulo, ug paglumos. Ang paglumos maoy linaing pagdalisay.

Ang magsusulat nga si Terrence Des Pres mipatin-aw: “Ang kamatuoran mao nga ang mga binilanggo sistematikong gipailalom sa kahugawan. Sila gayod ang tumong sa mahugaw nga pangataki. . . . Ang mga binilanggo sa Nazi nga mga kampo ginalumsan sa ilang kaugalingong mga hugaw, ug sa pagkamatuod ang kamatayon pinaagi sa ilang mga tai maoy kumon. Sa Buchenwald, pananglitan, ang mga bangag sa kasilyas nga adunay gidak-ong utso-metros ang taas, kuwatro metros ang giladmon ug kalapdon. . . . Kini kanunayng nag-awas, ug kini gilimasan sa mga binilanggo sa magabii pinaagig gagmay kaayong mga balde.” Miasoy ang usang nakasaksi: “Ang dapit maoy danlog ug ngitngit. Sa katloan ka mga tawo nga nagtrabaho, adunay aberids nga napulo ang mahulog sa bangag sa matag-gabii. Ang uban dili tugotan nga kuhaon ang mga biktima. Sa dihang human na ang trabaho ug ang bangag nahaw-asan na, diha ug diha lamang nga sila tugotan nga kuhaon ang mga patay.”

Daghan pa kaayong mga pamatuod ang atong makutlo sa pagmatuod nga ang pagpamuo nahimong bahin sa polisa sa Nazi samtang daghan pa sa Uropanhong mga nasod ang giukupahan. Ang bibliograpiya niining maong ulohan walay-katapusan, ug ang mga pamatuod sa mga nakasaksi, uban sa gihulagwayng pamatuod, makalilisang. Apan ang Holocaust kasinatian ba lamang sa mga Hudiyo? Sa dihang misulong ang mga Nazi sa Poland, ang mga Hudiyo ba lamang ang gusto nilang pamatyon?

[Mga footnote]

[Blurb sa panid 5]

“Ang mga binilanggo nga [gibalhin sa mga kampo sa trabaho] makalingkawas unta sa hilabihang pagkaalaut kon sila gidala pa dayon sa gas chambers sa Auschwitz.”—Rudolf Höss, ang komander sa Auschwitz

[Blurb sa panid 6]

‘Tuohi ako, dili ka kanunay malipay sa pagtan-aw sa nagbungtod nga mga patay ug ang baho sa walay-hunong nga pagsunog.’—Rudolf Höss

[Blurb sa panid 8]

“Kanunayng nagasingabot ang daghang katawhan, kanunayng daghan, diin wala na kami igong kagamitan sa pagpatay. . . . Ang gas chambers dili na makaarang niini.”—Franz Suchomel, SS nga opisyal

[Kahon sa panid 6]

Ang Bayad sa Pamatuod

“Ang $50,000 nga ganti gitanyag alang sa ‘pamatuod’ nga ang mga Nazi nagpatay pinaagi sa gas sa mga Hudiyong biktima sa mga kampo konsentrasyon kinahanglang ibayad sa usa ka naluwas sa Auschwitz ubos sa terminong gihikay sa korte, miingon ang abogado sa naluwas karong adlawa.

“Ang maghuhukom nga si Robert Wenke sa [Los Angeles] Superyor nga Korte miuyon sa kahikayan ug miagda sa Institute for Historical Review nga bayran si Mel Mermelstein, ang naluwas sa Auschwitz. . . .

“Ang institusyon, nga moingong ang Holocaust wala gayod mahitabo, kinahanglang magabayad usab kang Mr. Mermelstein sa $100,000 alang sa kasakit ug pag-antos sa gitanyag nga ganti, ang abogado miingon. . . .

“‘Ang kadaogan ni Mr. Mermelstein niining kasoha’ [ang abogadong si Gloria Allred, miingon] ‘maghatag nag tin-awng mensahe sa tanan sa tibuok kalibotan kinsa maningkamot sa pagtuis sa kasaysayan ug maghatag kalisod ug pag-antos sa mga Hudiyo nga ang naluwas sa Holocaust makigbisog sa legal nga paagi aron panalipdan ang ilang mga kaugalingon ug pasidunggan ang kamatuoran mahitungod sa ilang mga kinabuhi.’”—The New York Times, Hulyo 25, 1985.

[Kahon sa panid 7]

Sachsenhausen—“Luwas nga Kampo sa mga Binilanggo”?

Ang Sachsenhausen tinuod ba gayong kampo sa pagpamuo? O maoy “luwas nga kampo sa mga binilanggo”?

Si Max Liebster, ang Hudiyong biktima kinsa naluwas sa kalaglagan motubag:

“Ang akong pahayag gipasukad sa akong personal nga kasinatian ug sa akong nasaksihan nianang kampoha. Ako wala na magkinahanglan ug tabang gikan sa gawas aron matino kon unsa gayod ang Sachsenhausen. Tinuod, ang medya ug ang kagamhanang Nazi miangkon nga kadto maoy usa ka Schutzhaftlager, nga maoy ‘luwas nga kampo sa mga binilanggo.’ Ang mosunod nga mga kasinatian mosulti niini:

“Niadtong Enero 1940, ako gidala sa Gestapo (sekretong polis sa nasod) gikan sa Pforzheim ngadto sa bilanggoan sa Karlsruhe, ako giingnan sa Gestapo nga ako dalhon sa kampo sa pagpamuo. Ang Gestapo miabuso kanako ug miingon: ‘Du Stinkjude wirst dort verecken, kommst nicht mehr zurück!’ (Ikaw bahong Hudiyo. Mamatay ka samag hayop. Ikaw dili na gayod makabalik!)

“Ang maltrato sa among pag-abot sa Sachsenhausen maoy labaw sa tawhanong pagpanabot. Ang mga Hudiyo gidala ngadto sa laing kampo sa sulod sa kinadak-ang kampo. Sila daotan kaayog kahimtang kaysa uban. Pananglitan, ang mga Hudiyo walay katulganan, mga sinakong dagami lamang ang anaa sa salog. Ang kwartel guot kaayo nga niana kami mohigda nga samag mga sardinas, nga ang tiil sa usa maanaa sa ulo sa lain. Sa pagkabuntag, makita nga ang patay nga tawo naghigda tapad sa buhi. Walay medikal nga tabang para sa mga Hudiyo.

“Akong nadungog nga ang akong amahan nahimutang mga tulo ka kwartel lamang gikan kanamo. Akong nakita siyang naghigda luyo sa nagpundok nga mga sakong dagami, ang iyang bitiis mihubag diha sa tubig ug ang iyang mga kamot miyelo. Human nga siya namatay, akong gisaling-ay siya sa akong mga abaga ug gidala ngadto sa sunoganan. Didto akong nakita ang mga patay nga nagbungtod kay sa mga nasunog nila.

“Linibo ang namatay sa Sachsenhausen tungod sa dili-tawhanong pagtagad. Para sa daghang mga biktima labihan ka daotan ang mamatay sa Sachsenhausen kay sa gas chambers sa Auschwitz.”

[Kahon sa panid 8]

“Walay Handumanang Mabilin Gayod Kanila”

“Sa dihang gibuksan ang katapusang lubnganan sa daghang mga patay, akong naila ang akong tibuok nga pamilya. Ang akong inahan ug mga igsoong babaye. Tulo ka mga igsoong babaye uban sa ilang mga bata. Silang tanan diha niana. Upat ka bulan sila diha sa yuta, ug kadto maoy tingtugnaw.” “Ang pangulo sa Vilna Gestapo miingon kanamo: ‘Adunay nubenta mil ka tawong naghigda dinha, ug tinong walay handumanang mabilin gayod kanila.’”—Pamatuod sa mga Hudiyong naluwas, Motke Zaïdl ug Itzhak Dugin.

“Samtang kami nagpadayon, ilang gibuksan ang mga pultahan sa gas-chamber, ug ang mga tawo nahulog daw samag mga patatas. . . . Matag adlaw usa ka gatos ka mga Hudiyo ang gipili aron moguyod sa mga patay ngadto sa lubnganan. Sa gabii ang mga Ukrayano midala sa maong mga Hudiyo ngadto sa gas chambers o mipusil kanila. Sa matag-adlaw! . . . Daghang mga tawo ang miabot, kanunayng daghan, diin wala na kami igong kagamitan sa pagpatay. . . . Ang gas chambers dili na makaarang sa maong gidaghanon.”—Franz Suchomel, SS nga opisyal (Unterscharführer), sa iyang unang paghunahuna sa kampong pagpamuo sa Treblinka.

(Kining maong mga pagkutlo nakuha gikan sa mga interbiyo sa documentary film nga Shoah.)