Mga Batan-on Nangutana. . .

May Deperensiya ba Ako?

Ang kaylap nga pagdagsang sa AIDS nakadanig pagtagad sa kalibutan mahitungod sa ulohang homoseksuwalidad, nga nagpadayag sa daghang mga pangutana ug mga kahadlok taliwala sa mga batan-on may kalabutan sa ilang kaugalingong seksuwalidad. Kining artikuloha naghisgot niining pipila ka mga kahadlok sa maligdong, matinabangong paagi.

‘AKO usa ka batang babaye ug ako adunay makapahimuot nga pagbati sa usa sa akong mga magtutudlo. Ako nahadlok nga tingalig ako mahigugma kaniya.’ Matud pa sa sulat sa usa ka 13-anyos nga batang babaye. Ang iyang pagbati maoy kasagaran. Ang librong Adolescence nag-ingon nga ang ulohang homoseksuwalidad “nagpauswag sa daghang mga kabalaka taliwala sa daghang mga batan-on . . . Dili talagsaon para kanila nga mahibulong kon kaha sila maoy mga homoseksuwal.”

Si Alan, nga karon usa na ka hingkod nga batan-on, nahinumdom: “Si Mark maoy una kong higala. Una pa niini, ako nahimong kataw-anan sa among tunghaan, gilikayan tungod sa akong interes sa arts ug walay interes sa sports. Ang pakighigala ni Mark nakapukaw kanako sa mainit nga pagbati sa pagdayeg. Akong gihigugma siya sa paagi nga gusto ko siyang ikauban ug mahimong sama kaniya. Apan ako nabalaka kon kaha kining kalit kusog nga pagbati maoy timailhan sa natagong homoseksuwal nga mga hilig.”

Diin gikan ang maong mga pagbati? Kini ba gayod daotan?

Ang Sinugdan sa Samag-Seksong Kaibog

Walay sayop nga mobatig kasuod sa uban. “Adunay usa ka higala nga mopabilin labaw pa kay sa usa ka igsoon,” nag-ingon ang Proverbio 18:24. Adunay suod nga mga panagkauban, nga walay timailhan sa pagkahomoseksuwal, nga gipasiugda sa Bibliya; sama pananglitan, ug si Jesus ug si apostol Juan, si Noemi ug Ruth, si David ug Jonathan.—Ruth 1:16, 17; 1 Samuel 18:1; Juan 13:23.

Hinuon, ang kaibog sa samag-sekso, lahi sa hamtong nga relasyon nga gipasukad sa panaghigala o pagtahod sa pagkaaging ang maong kaibog maoy infatuation lamang nga kasagaran madapigon. Ang tumong sa maong kaibog sa kanunay maoy hingkod nga batan-on o edaran na (sama sa usa ka magtutudlo) kinsa tingali gipakaidolo.

Nagtuo ang daghang mga eksperto nga ang maong kaibog maoy labaw pa sa kadiyut nga kasakit sa nagtubo, “nga labaw nga timailhan sa pagtubo ngadto sa pagkahamtong kay sa homoseksuwalidad.” (Coping With Teenage Depression, ni Kathleen McCoy) Ang mga batan-on nangapkap nga mahimong inila, pagadawaton. Matud pa sa magsusulat nga si Sally Helgesen: “Kita kanunayng molantaw sa edarang [mga batan-on] kinsa mopatim-awng naghulagway kon unsa unya kita ug naningkamot nga mosundog kanila.”

Ang infatuation o kaibog sa mga membro sa samang sekso motungha usab tungod sa pag-inusara, ang kakulang sa pagpabili-sa-kaugalingon, o ang panginahanglan sa emosyonal nga tabang. Nahinumdom si Alan: “Ang pangunang hinungdan mao ang akong emosyonal nga pagkadili-timbang ug pagpalain-sa-kaugalingon gikan sa akong mga ginikanan. Kay mibating dili makasulti kanila, sa dugang ug dugang ako nakigsuod kang Mark.”

Si Dr. Richard E. Kreipe nag-ingon nga ang “crush nga relasyon dili isipon ingong ‘homoseksuwal’ sanglit sila talagsaong moresulta sa panagsuod. Ingon man usab, ang maong batasan dili timailhan nga sila mahimong mga homoseksuwal nga adulto sa umaabot.” (Medical Aspects of Human Sexuality) Busa si Alan miingon: “Ang akong kahadlok mahitungod sa akong pagbati ngadto kang Mark nahupay. Akong natino nga wala diay akoy deperensiya!”

Ang samang-seksong kaibog hinuon, kanunayng makapatunghag depresyon, pangabugho, mapanag-iyanhon, ug hingaping kabalaka sa usang giidolo—oo, dili gayod mahimsog nga emosyon! Unsaon nimo pagtangtang sa maong pagbati? Sugdi pinaagig bugnaw, timbang nga pagtagad sa tawong imong giidolo. Dili ba tinuod nga siya tawo lamang, ubos sa tanang kahuyangan ug mga kasaypanan? (Roma 3:23) Maayo na lang nga gipalabay sa mga batan-on ang maong mga pangibog sa dihang sila mihamtong ug misugod sa pagbating sigurado sa ilang kaugalingon.

Ang Panginahanglan sa Pagbantay

Apan, unsa man kon ang maong kaibog nag-apil sa erotikong mga hunahuna o mga damgo mahitungod sa usang samag-sekso? Hinumdomi, nga ikaw anaa pa sa “kapiskay sa imong pagkabatan-on”—ang panahon diin ikaw makasagubang sa bul-og sa mga bag-ong mga tinguha ug mga pagbati. (1 Corinto 7:36) Hangtod sa panahon nga ikaw mahibalong modala niining mga tinguhaa, masinati mo ang wala-tinguhaang seksuwal nga kadasig. Ug samtang makapasubo nga mobating nadani sa usang samag-sekso, kini wala magpasabot nga ikaw usa na ka homoseksuwal. Matuboan ra sa daghang mga batan-on ang maong mga pagbati.

Apan bisan pa niana, aduna pa gihapoy panginahanglan sa pagbantay nga malit-agan sa homoseksuwalidad. Ang Bibliya nagpasidaan sa 1 Corinto 6:9, 10: “Walay mga makihilawason, o mga tigsimbag mga diyosdiyos, o mga mananapaw, o mga bayot, (“homoseksuwal nga mahilayon,” Today’s English Version) . . . nga makapanunod sa gingharian sa Diyos.”—Itandi ang Levitico 18:22; 20:13; Roma 1:26, 27.

Ang usa ka batan-on nga nagahunahuna sa imoral nga mga hunahuna namilegro nga mahimong tinuod ang iyang gihanduraw. (Santiago 1:14, 15) Ang surbey nagpakita ilabina nga taliwala sa dili pa mga tin-edyer, ang “dula sa sekso” diha sa samang seksong mga batan-on maoy kasagaran nga makapakurat. Tinuod, daghang mga eksperto miuyon nga kini talagsa rang mohatod ngadto sa kinabuhing homoseksuwalidad. Apan ang maong “dula sa sekso” (bisan tuod gibuhat nga walay igong pagsabot sa iyang moral nga mga suntoan) mahugaw ug mahimong motumbas sa por·neiʹa—ang Gregong pulong nga gigamit sa Bibliya sa paghubit sa imoral seksuwal nga gawi uban sa laing tawo. (Judas 7) Ang maong paggawi dili lamang kay wala kahimut-i ni Jehova kundi mohatod pa gani ngadto sa homoseksuwal nga mga buhat ug magbilin sa emosyonal nga mga ulat sa walay katapusan.

Busa kon ang erotikong mga hunahuna mahitungod sa uban sa samang sekso mahitabo o motugaw kanimo, paningkamoting isilsil sa imong hunahuna ang mga butang ‘matarong, putli ug hiligugmaon.’ (Filipos 4:8) Likayi ang mga butang nga moagda sa imoral nga mga tinguha, sama sa mga salida sa telebisyon, pornograpikong mga sine, ug tingali bisan gani sa pipila ka mga basahon sa urog pagpamaskulado sa lawas nga naghulagway sa wala kaayoy sapot nga mga modelo. Si Dave, kinsa gihampak sa homoseksuwal nga mga handurawan ug mga damgo sa dihang usa pa ka tin-edyer, miangkon: “Ako nakasiguro nga ang masturbasyon ug pornograpiya direktang nakaamot niining maong mga damgo tungod kay ang mga butang nga akong nakita diha sa law-ayng mga basahon ug mga salida sagad motungha sa akong hunahuna sa magabii.” Sa pagpuno lamang sa iyang hunahuna sa maayong mga butang nga iyang naputol ang malaw-ayng handurawan.

Si Jason, nga karon usa na ka Kristohanong ansiyano, gibati usab sa samang seksuwal nga pagkadani sa samang sekso sa batan-on pa. Siya miangkon: “Ako nagtuo nga ang masturbasyon nagpasamot sa akong problema uban sa samag-seksong handurawan. Kini nagtukmod kanako sa paghunahuna sa imoral nga mga butang sa adlaw-adlaw. Kini nagtukod ug lig-ong kaikag sa dugang mahugaw nga mga tinguha.” Kinahanglang imong ‘patyon ang mga sangkap sa imong lawas kon bahin sa pakighilawas.’ (Colosas 3:5) Ang masturbasyon nagpasamot lamang sa daotang mga tinguha.a

Ang pagtug-an sa imong mga ginikanan o sa hamtong nga Kristohanon makatabang usab. Sila makahatag siguro sa praktikal nga mga sugyot ug makapaniid sa imong pag-uswag sa pagbuntog nianang maong mga pagbatia. Si Jason mitug-an niini sa usa ka hamtong nga igsoong Kristiyano ug sa ulahi sa pipila ka ansiano sa kongregasyon. (Proverbio 11:14) Siya nahinumdom: “[Ang akong higala] nag-ingon kanako nga makighigala ug daghan, sa mga lalaki ug mga babaye, nga dili nako gamiton kanunay ang akong panahon sa usa.”

Hangtod nga nakontrol ni Jason ang iyang seksuwal nga mga pagbati, ang dugang pagbantay gikinahanglan. Siya nahinumdom: “Ako kinahanglang mahibalong mag-amping nga dili kaayo makigsuod sa mga tawong samag sekso nako nga akong nabatyagang makaagda kanako sa seksuwal nga paagi. Sa pag-ingong mabination, buot kong ipasabot ang pagsiniaw ug paghalugay.” Ang maong disiplina sa kaugalingon nahiuyon sa tambag ni apostol Pablo nga ‘bun-oga ang imong lawas, pantona kini, bansaya kini sa butang nga angay pagabuhaton, dili sa butang nga gusto niyang buhaton.’—1 Corinto 9:27, The Living Bible.

Pagwala sa Pagbating Sad-an

Daghang mga batan-on ang gihasol sa pagbating sad-an ug pagduhaduha human nga ang ilang infatuation nga gugma nabugnaw. Ang uban usab gitulisok sa ilang mga tanlag, tungod sa ilang mga kaagi nga samtang batan-on pa nakipagsekso sa homoseksuwal nga paagi.

Diyutay lamang ang mahimo sa pagkaguol tungod sa mga butang nga nangagi, ilabina kon taas nga panahon ang milabay na nga natuboan na kining samang seksong pagbati.b Kon hunahunaon, si Jehova ‘nagapasaylo sa madagayaon gayod’ ug magahatag ug konsiderasyon niadtong kinsa limitado ang pagsabot sa seksuwal nga mga butang ingong usa ka bata. (Isaias 55:7) Busa kita ‘makatino sa atong mga kasingkasing atubangan sa Diyos dihang kini nagabadlong kanato, tungod kay si Jehova labaw sa atong mga kasingkasing ug nahibalo sa tanang mga butang.’ (1 Juan 3:19, 20) Apan sa gihapon, ang pakighisgutay niini uban sa atong mga ginikanan o uban sa Kristohanong mga ansiyano napamatud-ang makatabang.

Ang pagkaibog sa usa diha sa samang sekso tingalig makauulaw ug makapasubong kasinatian. Apan kini kinahanglang dili unta magbilin sa tibuok-kinabuhing ulat. Oo, laing dugang pagsulay kini sa mga batan-on nga pagabuntogon pinaagig desiplina-sa-kaugalingon ug sa tabang ni Jehova nga Diyos.

[Mga footnote]

[Letrato sa panid 23]

Ang pagpakigsulti sa imong pagbati uban sa mga ginikanan o sa usa ka hamtong nga Kristiyano motabang kanimo sa pagbaton sa hustong panlantaw