Mga Batan-on Nangutana . . .

Unsaon Nako Pagwagtang Kining Pagbatia?

“Bisag daotan sa akong panglantaw ang homoseksuwalidad karon, may mga panahong makita nako ang akong kaugalingon nga nadani niana. Natugaw ako niining pagbatia, usahay adlaw ug gabii. Kanunay akong nag-ampo kang Jehova, ‘Wagtanga kining mangil-ad nga pagbati!’ Mawagtang pa ba kaha kini?”​—Dennis.a

DAGHANG Kristohanong mga batan-on​—lalaki ug babaye​—naghimog samang desperadong mga pagpangayog tabang. Mikiling sila sa homoseksuwalidad apan dili buot makigbahin sa kalaw-ayan, sakit, ug moral nga kadaot nga maoy kinaiyahan niining paagiha sa kinabuhi. Labing hinungdanon, buot nilang pahimut-an ang Diyos, ug diha sa iyang Pulong prangka niyang gisaway ang homoseksuwalidad.​—Roma 1:​26, 27; Colosas 1:10.

Kasagarang gipangangkon nga ang mga homoseksuwal dili makabag-o. Apan, bakak kini. Ang pipila sa unang mga Kristohanon kanhi nalangkit sa homoseksuwalidad, apan sila nagbag-o. (1 Corinto 6:​9-11) Oo, sukwahi sa popular nga mga patuotuo, ang mga tawo mahimong magbag-o. Ugaling, samtang molampos ang usa ka batan-on sa paglikay sa homoseksuwal nga mga buhat, siya tingali maglisod sa pagwagtang sa bug-os sa homoseksuwal nga kailibgon. Mitug-an ang usa ka batan-ong lalaki: “Naningkamot ako sa pagbag-o sa akong pagbati. Nangayo ako ug tabang kang Jehova diha sa pag-ampo. Nagbasa ako ug Bibliya. Nakadungog akog mga pakigpulong bahin sa ulohan. Apan naglibog ako kon asa modangop.”

Walay samag madyik o dihadiha nga sulbad. Si Dennis nahinumdom: “Gitulod nako ang akong kaugalingon sa heteroseksuwal nga buhat sa kang bisan kinsa sa paningkamot nga mahimong ‘lalaki.’ Kining tanan walay kapuslanan ug nagmugna lamag dugang kasakit sa hunahuna.” Bisan pa niana, pinaagi sa pagpadapat sa mga prinsipyo sa Bibliya, ang usa makabuntog niining mga pagbatia.

Pag-ila sa Sayop nga mga Sumbanan sa Hunahuna

Una sa tanan, sayri nga mag-una ang mga hunahuna sa mga lihok. (Isaias 55:​6, 7; Santiago 1:​14, 15) Sa pagkatinuod, si Dr. Wayne W. Dyer miingon: “Dili ka mahimong mobati (emosyon) nga dili una makahunahuna.” Busa ang gamot sa homoseksuwal nga mga kailibgon tingali mao ang sumbanan sa sayop nga panghunahuna bahin sa kaugalingon, sa kaatbang nga sekso, sa gugma, ug uban pa. Sa dili pa ang ‘usa makabag-o sa kaisipan’ ug sa pag-usab sa maong mga hunahuna, kinahanglang ilhon una kini. (Roma 12:2) Ang pagbuhat niini makahatag sa tawo ug hinungdanong pagsabot kon nganong siya maibog sa kaparehas niya ug sekso.

Sa unsang paagi mahimo kini sa usa ka tawo? Ang usa ka paagi mao ang pag-ampo, sama sa gihimo sa salmista: “Susiha ako, Oh Diyos, ug hibaloi ang akong kasingkasing. Sulayi ako, ug hibaloi ang akong natugaw nga mga hunahuna, ug tan-awa kon aduna bay dalan sa pagkadaotan kanako.” (Salmo 139:​23, 24) Mahimong makatabang usab nga ipakigsulti ang imong mga pagbati uban sa usa ka maalamon ug hamtong nga Kristohanon. Sama sa pagkapadayag niana sa Proverbio 27:​17, “ang puthaw mapahait sa puthaw.” Busa gipadayag sa usa ka batan-ong lalaki ang iyang tinagoan sa usa ka Kristohanong ansiano nga ilado sa pagkamasinabtanon ug pagkamahangawaon. Dili masayon kaniya ang pagtug-an sa usa ka tawo sa iyang tinagoan, apan usa ka maayong relasyon ang naugmad. “Makasulti ako kaniya bahin sa bisan unsang butang,” siya miingon. Ang ansiano wala lamang namati kondili, pinaagi sa hanas nga pagpangutana, nakatabang sa batan-on sa pagpadayag sa mga pagbati ug mga hunahuna.​—Itandi ang Proverbio 20:5.

Kon ang batan-ong lalaki adunay walay pagtagad ug abusadong amahan, iyang makita nga ang iyang pagkaibog sa kaparehas niyag sekso sa pagkatinuod maoy usa ka walay kapuslanang pagsulay sa pagtagana sa panginahanglag gugma sa amahan. Kay wala gayod makabaton ug maayong sumbanan nga lalaki, siya tingalig mobati usab ug sama nianang gitawag ni Dr. Joseph Nicolosi nga “usa ka pagbati sa kahuyang ug kakulangan labot sa mga hiyas nga nalangkit sa pagkalalaki, nga mao, ang gahom, awtoridad, ug kusog.” Kon palandongon sa usa ka tawo ang espisipikong mga hiyas nga iyang gibati nga kulang, tingali iyang maamgohan sa iyang katingala nga kining mga hiyasa mismo ang nakita niyang madanihon diha sa pipila ka mga lalaki.

Makasubong mga “Leksiyon” sa Nangagi

Ang ubang mga batan-on nakaamgo nga ang ilang problema nalangkit sa nangaging masakit nga mga kasinatian. Nahinumdom ang usa ka dalagita: “Naladlad ako sa pornograpikong materyal nga may homoseksuwal nga mga tema. Misugod ako sa pag-ugmad ug dili-kinaiyanhong mga kailibgon.” Usa ka batan-ong lalaki miingon: “Biktima ako sa pag-abuso sa akong amahan. Ingong sangpotanan, ang pakigsekso uban sa lalaki daw normal na kanako.” Kining makatugaw nga mga kasinatian mahimong magtudlo sa mga biktima sa pag-ayad o sa pagkahadlok sa kaatbang nga sekso o sa paglantaw sa gugma ingong pisikal nga mga panagtandogay. Busa gibatbat sa usa ka biktima ang iyang seksuwal nga kailibgon ingong “usa ka emosyonal, dili pisikal, nga panginahanglan​—usa ka panginahanglan sa kalumo ug pagsabot.”

Apan, sa pagkatinuod, ang mga hinungdan sa homoseksuwalidad makalibog, ug daghang kaso dili yanong mahubit.b Hinunoa, bisan unsa pay hinungdan sa sayop nga panghunahuna, daghan ang mahimo sa pagtul-id niana.

Pagbag-o sa Kaisipan

Ang labing maayong paagi mao ang paggamit sa Pulong sa Diyos. Tagda, pananglitan, ang usa ka batan-ong lalaki nga naibog sa mga lalaki nga nagpakitag lalaki gayod nga mga hiyas nga iyang gibating maoy kulang kaniya. O tagda ang usa ka batan-ong dalaga nga mahadlok sa kaatbang nga sekso. Ang usa ka paagi nga maugmad sa duha ang maayong panglantaw sa pagkalalaki mao ang pagtuon sa panig-ingnan ni Jesus. (1 Pedro 2:21) Siya mao ang hingpit nga sulondan sa gahom sa pagkalalaki nga gitimbangan sa kalumo. (Mateo 19:14; Juan 19:5) Busa nakita sa usa ka batan-ong lalaki nga nakatabang ang pagtuon sa librong Ang Labing Bantogang Tawo nga Nabuhi Sukad.c “Ang pagkaila kang Jesus nagpatin-aw sa akong hunahuna kon unsa gayod ang lalaki,” siya miingon.

Ang pagpalandong sa mga teksto sa Bibliya sa mga ulohan sama sa hunahuna sa Diyos bahin sa sekso, gugma, ug mga pakighigala sa kaparehas ug sekso makatabang usab sa pagtul-id sa hunahuna.​—Genesis 1:​27, 28; Ruth 1:​16, 17; 1 Samuel 18:1; Proverbio 5:​18, 19; 1 Corinto 13:​4-8.

Hinungdanon usab nga likayan ang pagpalandong kanunay sa daotang mga hunahuna. Sagad kini nga mga gana kusganon kaayo ilabina kon ang usa nagmamingawon, naguol, o nahigawad. (Proverbio 24:10) “Ang paagi lamang sa pagbag-o sa atong pagkatawo mao ang pagpuli sa daotang mga hunahuna ug maayong mga hunahuna,” miingon ang usa ka Kristohanong babaye. Sa dihang abton siya ug malaw-ayng gana, iyang pahinumdoman ang iyang kaugalingon sa hunahuna sa Diyos bahin sa homoseksuwalidad. Usa ka tin-edyer nga lalaki miingon: “Sa matag panahong abton ako ug homoseksuwal nga gana, magpalandong ako sa akong paboritong teksto sa Bibliya.” (Itandi ang 2 Corinto 10:4; Filipos 4:8.) Nakita sa uban nga nakatabang sa pagkatulog ang pagpatokar sa nagkalainlaing binase-sa-Bibliya nga mga audiocassette sa Watch Tower Society.

Kon unsay atong panghunahuna makaapektar sa paagi sa atong paglihok, ang paagi sa atong paglihok makaapektar sa atong panghunahuna ug pagbati. Busa kinahanglang mohunong usab ang usa sa pagbatasan ug pag-ubanay nga makapukaw o makapasamot sa daotan nga kailibgon. (1 Corinto 15:33) Kinahanglang ang usa usab ‘magbantay’ kon bahin na sa mga kasilyas sa publiko, mga baybayon, mga locker room, ug ubang mga dapit nga magladlad sa usa ngadto sa tentasyon.​—Salmo 119:9.

Ang masturbasyon maoy laing mangil-ad nga buhat nga pagalikayan. Alang sa kadaghanang homoseksuwal nga mga lalaki ug babaye, kini maoy usa ka dili-mapugngang pangagda. “May suliran na ako sa masturbasyon sukad sa sayis anyos pa ako,” miadmiter ang usa ka batan-ong lalaki. “Ang pagpanghanduraw sa sekso nagpasamot sa akong homoseksuwal nga mga pagbati.” Buntoga kining malaw-ayng batasan!d​—Colosas 3:5.

Sa laing bahin, importante usab nga ang usa maghimog maayong mga sumbanan sa batasan. Ang uban nagsugyot nga kon maugmad sa batan-ong lalaki ang lalaki gayod nga mga hiyas, dili kaayo siya maibog sa ubang mga lalaki. Siyempre, tingali dili mahibalo ang batan-ong lalaki kon unsaon kini paghimo kon siya wala sukad makabaton ug malig-ong sumbanang lalaki sa bata pa. Tingali lainan siya sa iyang kaugalingong lawas ug mobatig kabakikaw o pagkadili-lalaki. Ang pagbuhatbuhat, kasarangang ehersisyo, o makaparelaks nga mga dula sagad makatabang niining bahina. (Itandi ang 1 Timoteo 4:8.) Apan maingon nga ang batan-ong lalaki nga si Timoteo nahisamag anak nga lalaki ni apostol Pablo, makita sa usa nga ilabinang makatabang ang pag-ugmad ug maayong pagsabot sa usa ka timbang edaran nga Kristohanong lalaki. (Filipos 2:​19-22; 2 Timoteo 3:10) Pinaagi sa pagtukod ug tin-awng mga utlanan sa batasan ug pag-ugmad ug madayganong komunikasyon, ang ingon nga relasyon mahimong mainit ug masaligon, apan walay bisan unsang seksuwal nga kailibgon.

Labaw sa tanan, kinahanglang magbaton ang usa ug malig-ong espirituwal nga pang-atake. Ang regular nga pagtuon sa Bibliya, pag-ampo, ug ang pagpakigbahin sa pagtuo sa uban makatabang sa pagsentro sa hunahuna sa espirituwal nga butang. (Salmo 55:22; 119:11; Roma 10:10) Usahay ang pagbating walay-bili magpalisod sa pagpakig-uban sa isigka-Kristohanon, apan ang Bibliya nagpasidaan batok sa paglain sa kaugalingon. (Proverbio 18:1) Ang maayong panag-ubanay uban sa mga Kristohanon nga lainlaig sekso makatabang sa usa nga makapabiling timbang.​—Hebreohanon 10:​24, 25.

Kon gisamok ka sa homoseksuwal nga kailibgon, kining mga sugyota basin makatabang. Apan, ayawg pasulabi sa pagkaluya sa buot kon magpabilin ang dili-maayong pagbati. Ang Diyos nakasabot sa imong mga pagbati ug may kahangawa niadtong naningkamot sa pag-alagad kaniya. (1 Juan 3:​19, 20) Diha sa bag-ong kalibotan, ang katawhan makasinatig pagkaayo gikan sa tanang mga balatian nga nagahasol kanato. (Pinadayag 21:​3, 4) Kasamtangan, salig sa Diyos ug pakig-away batok sa daotang mga kailibgon. (Galacia 6:9) Uban sa panahon ug hugot nga paningkamot, tingali bisan ang daotang mga kailibgon mismo mamenosan.

(Sugod sa among sunod nga isyu, ang “Mga Batan-on Nangutana . . .” mogula kas-a sa usa ka bulan.)

[Mga footnote]

[Blurb sa panid 22]

Ugmara ang maayong kaisipan bahin sa pagkalalaki pinaagi sa pagtuon sa panig-ingnan ni Jesus