Tibuok-Yutang Parke—Sa Unsang Paagi?
ARON sa pagtagbaw sa ilang natural nga pangandoy sa pagsabot ug kalingawan sa kalalangan, minilyon sa katawhan matag tuig moduaw sa mga parke. Siyempre malipay kitang mopuyo sa matahom nga dapit sama sa makita dinhi. Lagmit makaplagan nimo kining talan-awon nga makapahinumdom sa Paraiso sa Eden diin ang atong Maglalalang nagpahaluna sa unang tawhanong pares.
Makahuluganon, duha sa upat ka suba kansang tinubdan didto sa Eden sa gihapon nag-agos pa karon. Mao kini ang Hiddekel, nga kumong nailhang Tigris, ug ang Euprates. (Genesis 2:10-14) Ang maghuhubad sa Bibliya nga si Hans Bruns mikomento mahitungod niining talaan sa Bibliya, nga miingon: “Ang mga suba may katuyoan sa pagpaila nga dili kini sugilanong engkantohanon, kondili butang nga aktuwal nga nahitabo dinhi sa yuta.”
Maingon nga daghang parke karon dunay gamay nga sinugdanan apan midako sa makadaghan sa orihinal nga gidak-on, sa ingon ang Diyos dunay samang katuyoan maylabot sa samag-tanamang parke sa Eden. Ang mga utlanan niini palaparon sa nagtubong tawhanong pamilya hangtod ang Paraiso molukop sa entirong yuta ug modayandayan niini uban sa nindot natural nga katahom.
Matuod, ang pagkamasupilon sa unang tawhanong pares nakawala kanila sa pribilihiyo sa padayon nga pagtagamtam niadtong orihinal nga Paraiso. Apan ang katuyoan sa atong Maglalalang alang sa mga tawo sa pagtagamtam sa yutan-ong paraiso wala mausab. (Isaias 46:11; 55:11) Busa, ang Bibliya sagad mopunting sa paglalang-usab sa Paraiso sa yuta ubos sa pagmando sa Gingharian sa Diyos. Pananglitan, usa ka tagna miingon: “Kay tinong lipayon ni Jehova ang Sion. . . . Himuon niya ang iyang kamingawan sama sa Eden ug ang iyang disyertong kapatagan sama sa tanaman ni Jehova.” Sa ulahi, ang tagna namolong usab mahitungod sa mga tawo nga magtukod ug mga balay, mananom ug mga parrasan, ug magapahimulos sa bunga sa yuta.—Isaias 51:3; 65:21-23.
Sa susama, diha sa Pinadayag, ang kataposang basahon sa Bibliya, dunay panan-awon sa umaabot nga “bag-ong langit ug usa ka bag-ong yuta.” Ang “bag-ong langit,” o bag-ong pagmando sa Diyos, makita nga nagdapit pagtagad sa yuta. Uban sa unsang resulta? “Tan-awa!” gitug-anan kita, “ang balongbalong sa Diyos magauban sa katawhan [matikdi nga ang Diyos gihisgotan nga magauban sa katawhan, dili ang katawhan magauban sa Diyos sa langit], ug siya magapuyo uban kanila, ug sila mahimong iyang katawhan. Ug ang Diyos mismo magauban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni aduna pay pagbalata ni paghilak ni kasakit pa man. Ang unang mga butang nangagi na.”—Pinadayag 21:1, 3, 4.
Kining mga saad sa Bibliya sa paraiso nga ipasig-uli dili hinandurawng mga tagnatagna lamang. Samtang ang mga tiggalam ug mga naturalista may mga panan-awon sa limitadong mga parke sa kalasangan, nga nagadepende sa may simpatiyang mga magbabalaod, ang mga saad sa Bibliya dunay ilang Tigpaluyo ang Maglalalang sa uniberso, si Jehova nga Diyos, kansang Pulong dili mahimo ug dili mahitabo nga dili matuman.
Karon, labi na sa mga parke sa kabukiran, ang mga magbabaklay makasinati ug kakulba. Apan sa umaabot nagasirkulo sa globong paraiso, ang mga mananap dili modaot sa katawhan o mahimong hulga kanila, ni ang mga mananap managan ug mangurog inigkakita sa tawo, kay ang Bibliya nagsaad: “Ang lobo aktuwal nga mopuyo uban sa nating karnero, ug uban sa nating kanding ang leopardo mismo mohigda, ug ang nating baka ug ang may lambungay nga nating liyon ug ang mananap nga maayong pagkapakaon moipon sila tanan; ug ang usa ka batang gamay magamando kanila. Ug ang baka ug ang oso mismo mosibsib; moipon ang ilang mga nati sa paglubog. Ug bisan ang liyon mosibsib sa kompay sama sa torong baka.”—Isaias 11:6-9.
Pagkalalim unya ang molakaw sa kakahoyan nga ubayan makadiyot sa usa ka liyon sa bukid tapad nimo o kaha sa usa ka dako, mahigalon oloabohon nga oso! Wala na unyay buhing linalang nga mahadlok sa usa ug usa.
Ang mga tagmugna sa matahom nga mga parke karon dunay dungganong mga tuyo, nga naggahin ug mga dapit alang sa proteksiyon sa tanom ug ihalas nga kinabuhi. Apan ang gibutyag nga katuyoan lamang sa Diyos sa usa ka sistema sa globonhong parke ubos sa iyang kagamhanan sa Gingharian ang makagarantiya sa permanente nga pagtipig sa mga bahandi sa yuta. Kining maong Gingharian lamang sa mga kamot sa iyang Anak, si Jesu-Kristo, ang makahimo sa usa ka permanente tibuok-yutang paraiso ug matuod nga kalinaw taliwala sa tawo ug tawo ug taliwala sa tawo ug mananap.