Gagmay Apan Bililhong mga Ebidensiya

DEOXYRIBONUCLEIC ACID. Diyutay ra ang makalitok niini, unsa pa kayha ang makahinumdom niini. Ang kadaghanan nahibalo ra niini pinaagig inisyal nga ngalan: DNA. Ang molekulang DNA gamitoy kaayo nga ang mga siyentipiko wala gayod makakita niini pinaagi sa tanan nilang gamhanang mikroskopyo hangtod sa dili pa lang dugay. Bisan pa niana ang maong mga molekula nasudlan sa dako kaayong pondo sa impormasyon nga magaapektar sa kinabuhi natong tanan. Ang imong kataas, grano sa buhok, kolor sa mata ug panit—kining tanan matino daan, nga girekord diha sa imong DNA.

Apan kining kemikal nga tigdesisyon karon gigamit sa pagtabang sa paghimog laing matang sa desisyon: kon kaha ang mga tawo malibre o mapriso, mabuhi o mamatay. Ang pagkalinain kaayo sa DNA sa matag indibiduwal nag-abli sa dalan sa usa ka bag-ong metodo sa pag-ila sa mga indibiduwal, nga gitawag DNA fingerprinting.

Sanglit ang DNA hikaplagan diha sa halos tanang selula sa lawas ug sa kadaghanang pluwido sa lawas, ang mga kriminal tingali mahukmang sad-an tungod sa pagbilig pila ka lugas sa buhok o tipik nga panit, bisan sa inusap nga chewing gum. Ang bag-ong teknik epektibo ilabina batok sa mga manglulugos. Nga nahitabo na, ang mga manglulugos nga hugot milimod sa ilang sala nahukmang sad-an pinaagi sa ilang kaugalingong DNA. Ang usa ka mamumuno gihukman sa silya elektrika pinasukad sa kalig-on sa maong pamatuod.

Ang DNA fingerprints nagahimo sa mga abogado sa depensa nga walay mahimo. Ang The National Law Journal sa Tinipong Bansa mikutlo sa usa nga miingon: “Makapahugno kini sa balatian. Sa dihang moabot ang usa ka eksperto ug moingon nga may usa sa 700 milyong purohan nga ang imong tawo dili mao [ang nakahimo sa krimen]—kini makapalusno kanimo.” Sa laing bahin, ang DNA fingerprinting makapagawas sa sayop nga gikiha ug busa makapamenos sa riyesgo sa pagpriso o pagpatay sa inosente.

Bisan pa niana, walay siyentipikanhong metodo, bisag unsa ka abante, ang makasolbar sa tibuok-yutang trahedya sa krimen. Gawas pa, ang kadaghanang mabangisong mga krimen dili magbilig DNA nga ebidensiya. Dili, sa adlaw lamang nga ang mga daotan pagaputlon gikan sa yuta nga ang krimen mahanaw na.—Salmo 37:10, 11.