Kapasidad sa DNA sa Pagtipig ug Impormasyon

ANG mga tiggamit ug computer daghan kaayog digital nga impormasyon nga kinahanglang tipigan ug ma-access kon gikinahanglan. Ang mga siyentista naglaom sa pag-imbentog bag-ong paagi sa pagtipig ug impormasyon pinaagi sa pagsundog sa mas maayong sistema nga makita diha sa kinaiyahan​—ang DNA.

Hunahunaa: Ang DNA, nga anaa sa buhing mga selula, nasudlag bilyon-bilyong impormasyon bahin sa disenyo sa kinabuhi. “Kami makakuha niini gikan sa bukog sa balhiboong mga mammoth nga nabuhi libolibo ka tuig kanhi, ug may makuha gihapong impormasyon gikan niini,” miingon si Nick Goldman sa European Bioinformatics Institute. “Kini giming usab kaayo, dasok ug wala magkinahanglag koryente sa pagtipig, busa dali kini ibiyahe ug tipigan.” Ang DNA ba makatipig ug digital nga impormasyon? Oo, matod pa sa mga siyentista.

Ang mga siyentista nakahimog artipisyal nga DNA nga ilang nasudlan ug encoded text, mga hulagway, ug mga audio file, sama sa pagkatipig niini diha sa mga gamit nga digital. Sa ulahi, nabadbad sa mga tigdukiduki ang gitipigang impormasyon nga 100 porsiyento ang katukma. Ang mga siyentista nagtuo nga sa ngadto-ngadto, pinaagi sa paggamit niini nga pamaagi, ang usa ka gramong artipisyal nga DNA makatipig ug impormasyon nga katumbas sa 3,000,000 ka CD ug nga kining tanang impormasyon matipigan sa gatosan o kaha libolibo ka tuig. Kini nga sistema may potensiyal nga makatipig sa tanang digital nga impormasyon sa tibuok kalibotan. Busa, ang DNA gitawag nga “kinalabwang hard drive.”

Unsay imong hunahuna? Ang kapasidad ba sa DNA sa pagtipig ug impormasyon sulagma lang nga mitungha? O kini ba gidisenyo?